El tríu italianu Brigan gana’l primer concurus internacional Uviéu Universu Folk

El tríu italianu BRIGAN ye la formación ganadora del “I Concursu Internacional Uviéu Universu Folk” actividá que forma parte del programa de conciertos de folk internacional previstos p’amosar na capital d’Asturies a lo llargo del añu. A dicir del xuráu tres una intensa deliberación: “Cualesquier de los cuatro grupos que participaron na final d’Uviéu Universu Folk pudo algamar el trunfu nesta primer edición. Puesta n’escena bien aceptable, propuesta musical igualmente correcta y convincente, desemeyada conexón col públicu asistente, pluralidá d’estilos propuestos per caúnu de los finalistes en fusión col folk y con ciertu protagonismu pa la música de raigañu cumplieron dende cada unu de los directos de los cuatro finalistes coles premises marcaes por un concursu al que s’apuntaron una ventena llarga de formaciones llegaes dende toa España y diversos puntos d’Europa”.

El xuráu del certame tuvo conformáu pol portugués Mário Correia (director de Sons da Terra, del Festival Intercélticu de Porto, del Festival Intercélticu de Sendim y del Douro Celtic Fest en Gaia); por Ángel Goyanes (músicu de folk y director de la revista “Interfolk”); por Antonio Martínez Corzo (director de RCFM Radio Crónica Folk de Mérida, emisora especializada íntegramente en músiques tradicionales del mundu); por Alberto Balboa (coordinador y director artísticu del Festival Internacional do Mondo Celta d’Ortigueira – Galicia) y tuvo presidíu pol asturianu Aurelio Argel (director del veteranu programa folk “Música para raptar princesas” nos 40 Principales, collaborador musical nel diariu La Nueva España y otros medios de comunicación especializaos, coordinador y responsable de la publicación y Premios AMAS y del Anuario del Principáu, amás de xuráu del Premiu al Meyor Cantar n’Asturianu y del Concursu Liet International de Lengus Europees Minoritaries).

El xuráu decantóse pol trunfu del grupu italianu BRIGAN considerando pa ello “la mayor orixinalidá y diversidá de la so propuesta musical na que s’apiguren los soníos tradicionales propios de la so tierra d’orixe y un cuidadosu tratu dáu a les melodíes orixinales (instrumentales o cantaes en diversos dialectos y llingües) coles que’l tríu ufiertó un mostrariu de natural, equilibráu y con credibilidá sofitáu de la mesma nel agregu, nada estridente, de melodíes tradicionales d’otros puntos xeográficos qu’arriquecen y amplíen el so llabor d’espardimientu del folclore universal”.

BRIGAN (Ti Sfondo I Brodhán / Tradizione y contaminazione) ye un tríu que recrea na so obra musical l’arcaica y orixinal tradición sonora de la so tierra del sur d’Italia (instrumental y cantada en dialectos y llingües de la zona o en griegu antiguu) y, xunida al folk célticu” del Arcu Atlánticu, ritmos como la tammurriata o la pizzica y otros aires itálicos tán presentes de manera festiva al pie de muñeires gallegues y asturianes, xigues irlandeses, reels escoceses y An Dro de la Bretaña.

Magar la so mocedá, BRIGAN (Francesco Di Cristofaro a los whistles, gaites, xiblata irlandesa, curdión, bansuri y voz; Emilio Cozza al tamborín y panderos, darbuka, vigulín, bodhrán y voz y Danilo Parolisi a la guitarra, bouzouki, mandolina y voz) yá cunten con delles grabaciones discográfiques y estudios tradicionales según numberoses participaciones en festivales y eventos destacaos por toa Italia, Croacia, Eslovenia, Suiza ya Inglaterra a les qu’han de sumar agora’l trunfu nesta primer edición del Concursu Internacional Uviéu Universu Folk”.

Esta resultancia va dexar el regresu de BRIGAN a Uviéu pa participar como grupu convidáu nel segundu conciertu del programa Uviéu Universu Folk que’l día 14 de Setiembre va cuntar cola mítica formación Gwendal. El tercer conciertu incluyíu nesta primer andadura d’Universu Folk va presentar na seronda el nuevu discu conxuntu (“Triad”) del bretón Sylvain Barou y el irlandeses Padraig Rynne y Donal Lunny.

Uviéu Universu Folk desenvolvió los sos dos xornaes de concursu nel Teatru Campoamor la pasada fin de selmana de San Xuan cuntando con aceptable presencia de públicu qu’igualmente respondió de manera favorable al primer gran conciertu del cartelu protagonizáu pol grupu irlandés Lúnasa.