Asturies fizo brillar l’anovada Gran Parade de Lorient

La propuesta yera dafechu anovada y venturera: un nuevu percorríu pa un nuevu modelu de Gran Parada, de Gran Desfile, d’una de les señes d’identidá del Festival intercélticu de Lorient, xuntu coles nueches máginas que tuvieron que pasar a denominase nueches intercéltices por problemes de derechos d’autor. Una propuesta na qu’Asturies yera la invitada d’honor y que brilló col calter que yera preciso, dexando’l pabellón bien altu pala Irlanda que tendrá de coyer el relevu l’añu que vién.

La inauguración d’esa una nueva ruta nun pudo acabar meyor pal Gran Desfile de les Naciones Celtes: Cerca de 60.000 aficionaos, según los datos más pesismistas y cerca de los 100.000 según los más optimistes, invadieron na mañana del apodero les cais de Lorient y llevaron a un bon númberu de visitantes y músicos al puertu de pesca recuperáu como llugar de comida familiar dominical na villa bretona.

L’impresionante ascensor de barcos convirtióse de sópitu nel puertu pesqueru de Lorient nun arcu de trunfu pa la Banda de Gaites Llacín (qu’abría’l Desfile como representante principal de la delgación asturiana) y pa la bagad Kemper, que coronó’l día col beneplácitu mayoritariu de los lorienteses. Con un sol más qu’arrogante pa lo que ye habitual nestos díes de branu yá tardíu, l’estadiu Moustoir camudó’l so calter de puntu final d’alcuentru n’arranque de la Grand Parade que per primer vegada tenía como sistema de pagu complementariu a la posibilidá de siguir poles cais gratuitamente el pasu de los músicos y artistes un “badge” o pin que al preciu de 3 euros dexa l’accesu a toles actuaciones qu’antaño yeren gratuites en Lorient, incluyendo’l visionado cómodu de la Gran Parade. El domingu vendiérense cerca de 28.000 “badges” lo que supon casi 90.000 euros pa les arques del festival, precisaes de músculu nestos años de crisis.

Pero una cosa nun camudó: l’entusiasmu popular polo que significa Lorient y el desfile, en concretu, pa tolos que s’averen por esta villa na primer fin de selmana de agostu. L’ensame, ente la siella plegable o taburete sol brazu, axuntábase sobremanera na llarga recta na que France 3 (la televisión rexonal que retresmitía en diferíu’l desfile a partir de les 15,30 hores) asitiara toles sos cámares y estraordinariu esplegue. Y ende, y en realidá en tol recorríu, esfrutose d’un maraviyosu espectáculu de cuatro hores ensin interrupción, que combina dende les gaites del país homenaxáu anguaño, Asturies, a los primos escoceses ya irlandeses y los encaxes tallaos de los vistíos tradicionales bretones. Nunca la rue de la Ferriere, el corazón palpitante del puertu pesqueru de Lorient, fuera tan allegáu nun domingu pela mañana del branu. Ente 60.000, según los medios locales y los cerca de 100.000 calculaos pola televisión y refrendáu pola organización, siguieron l’acontecimientu en directu, a pié de cai. Y de ellos, 7.600 aficionaos prefirieron l’estadiu de Moustoir p’animar a la familia de les naciones celtes na parrilla de salida.

La delegación asturiana

Los asturianos salieron nos primeros puestos y nos postreros, colo que dexaron una presencia notable nel desfile. Abrieron el mesmu cola bandera ástur la Banda de Gaites Llacín que con una harmonía inusitada combinó pasacais en columnes d’a ocho con otres d’a cuatro magníficamente remanaes en pasos angostos y curves pronunciaes del percorríu ente l’Estadiu y el puertu pesqueru.