Lliteratura

L’Entregu va acoyer ente los díes 22 y 29 d’ochobre la celebración de la tercera Selmana del Llibru Infantil y Xuvenil. Les xornaes tán organizaes poles conceyalíes d’Educación y Cultura del ayuntamientu de San Martín del Rei Aurelio y a lo llargo de siete díes van desenvolvese diverses actividaes empobinaes al fomentu de la llectura ente los más mozos y a dar a conocer la lliteratura escrita pa un públicu tan desixente como agradecíu.

La tercera edición de la Selmana del Llibru Infantil y Xuvenil inaugúrase mañana viernes 22 a les 19,00 hores cola asistencia del alcalde de San Martín del Rei Aurelio. La primer actividá de les xornaes va ser una conferencia ufiertada pola responsable de lliteratura infantil y xuvenil de la editorial Anaya, Isabel Morueco titulada “Encuentro con la lectura”. Al empar de la inauguración de les xornaes ábrese al públicu nel Teatru Municipal de L’Entregu la esposición ’75 años de Tintín’, ellaborada polos alumnos y profesores del colexu El Parque de Blimea.

Los díes 23 y 24 d’ochobre la compañía de teatru llangreana ‘Kumen’ va entamar nel parque La Llaguna l’actividá ‘Cuentos den la Caja’, pensada especialmente pa un públicu mozu. Hasta’l día 29 d’ochobre van desendolcase una serie d’actividaes complementaries a la Selmana del Llibru Infantil y Xuvenial como talleres d’animación a la llectura, de globoflexa, presentaciones de llibros y obres de teatru. Mientres duren les xornaes les llibreríes del conceyu de San Martín del Rei Aurelio van ufiertar un descuentu del 10 por cientu na lliteratura empobinada a neños y rapaces.

La V Xunta d’escritores asturianos ya tien feches y llugar de cellebración. L’alcuentru va desenvolvese a lo llargo de los díes 26, 27 y 28 de payares en Llanes. Una cincuentena d’autores de les diverses xeneraciones actuales de la lliteratura en llingua asturiana van debatir alrodiu de los frutos daos a lo llargo estos últimos trenta años y la realidá presente de les nuestres lletres.

Según confirmó a Asturnews, l’escritor Xuan Bello, coordinador de la Xunta, el programa del conceyu inda ta por cerrar, non asina’l conteníu y la dinámica d’esti alcuentru d’escritores. Escontra lo avezao en xuntes anteriores, programaciones abondo sobrecargaes, l’alcuentru d’esti añu va ser en palabres de Bello “un sitiu onde se fomente’l diálogu ente los propios autores, con xornaes de non más de cuatro o cinco actividaes”, un conceyu, según el coordinador del mesmu “allonxáu de la rixidez y sobreprogramación de los congresos de corte académicu”. Precisamente’l diálogu ente los diversos escritores que conviven anguaño na lliteratura asturiana ye’l leit-motiv de la V Xunta, “una puesta en común de les inquietúes, necesidaes y ambiciones de los autores qu’escriben n’asturianu”, afirmó Xuan Bello.

Llanes ya acoyera va quince años la II Xunta d’escritores y traductores en llingua asturiana, dende entós cellebráronse otros dos alcuentros na villa de Lluarca y en Villaviciosa. Nel conceyu que va acoyer la villa llanisca en payares va ser la primer vez qu’asistan autores d’una nueva xeneración que nun conoció los anteriores alcuentros.

Radio Nacional d’España ta acabante concede-y al autor asturianu José Luis Piquero el Premiu “Ojo Crítico” de Poesía por “Autopsia”, qu’axunta los sos tres llibros espublizados hasta’l momentu: “Las ruinas” (1989), “El buen discípulo” (1992) y “Monstruos perfectos” (1997), xunta una amplia sección de poemes inéditos.

El xuráu de la XV edición de los Premios “Ojo Crítico-Segundo Milenio” -formáu por Amalia Bautista, poeta; Fernando Beltrán, poeta; Jesús García Calero, Xefe de Cultura d’ABC y especialista en poesía; José Méndez, poeta; Luis Antonio de Villena, poeta y críticu; Javier Lostalé, poeta y redactor del programa “El Ojo Crítico” y Arrate Sanmartín, direutora del mesmo programa de RNE- seleccionó a Piquero por “un libro que es una obra reunida con inéditos. En función de la alta calidad de su poesía, que ha estado en los umbrales del reconocimiento y que no ha conseguido plenamente, por publicar en editoriales con poca difusión, siendo un poeta joven de alta calidad”.

José Luis Piquero (Mieres, Asturies, 1967) ye periodista y críticu lliterario y tornare ente otros autores al asturianu a Dickens, Melville, Tennessee Williams y Arthur Miller. La so obra figura nuna docena d’antoloxíes de la poesía española actual, ente les que se puen nomar les de José Luis García Martín, Joaquim Manuel Margalhães y Luis Antonio de Villena.

Sigún s’asoleta na páxina web de RNE onde se da anuncia del Premio, la poesía de Piquero indaga na propia biografía para desplicar los mecanismos que rixen l’amor, l’amistá y el deseyu con un llinguax coloquial y realista que nun dexa de lláu la complexidá que carauteriza la so obra, de la que diz Luis Antonio de Villena: “Típico y atípico en su grupo generacional, José Luis Piquero es un romántico nuevo que vivisecciona sus sentimientos, un poeta realista que busca mirar más hondo y un descontento -un joven Caín- a quien ni Orden ni Realidad cuadran del todo. Un rebelde existencial. Un muy notable poeta que ha forjado ya una voz -un tiembre- fielmente propios”.

XV edición de los premios

Radio Nacional de España otorga, dende 1990, los Premios Ojo Crítico pa distinguir los trabayos de los xóvenes creadores nes disciplines de Música Clásica, Artes Plástiques, Cine, Teatru y Narrativa y, dende 1997, otorga también el Premio Ojo Crítico de Poesía y l’Especial, esti caberu a una trayectoria destacada.

Dende’l so nacimiento en 1997, foron Premios Ojo Crítico Especial Ana María Matute, Alfredo Kraus, Josep Mª Flotats, Luis García Berlanga, José Hierro, Antonio López y María Jesús Valdés.

“El Ojo Crítico” ye l’únicu espaciu cultural de radio que lleva 21 años nes antenes y ta Codirixíu y copresentáu esta temporada por Juan Carlos Soriano y Arrate Sanmartín, repasando diariamente, de 16:00 a 17:00 hores, l’actualidá cultural al traviés d’entrevistas, cróniques y reportaxes ellaboraos pol equipu del programa y los profesionales del Área de Cultura de RNE.

“Monstruos perfectos” ye ún de los poemarios que componen “Autopsia”

L’escritor cangués Xosé María Rodriguez ta acabante publicar la so novela ‘Tiempos de nublina’, una hestoria ambientada nel mundu rural del suroccidente asturianu que tenta recuperar la memoria escaecía de les xeneraciones que vivieron la guerra civil y la represión posterior de los vencedores. Ye la primer novela d’esti autor, conocíu hasta agora polos sos llibros de relatos, y la primera que s’escribe na variante occidental de la nuestra llingua alrodiu d’esi periodu de la hestoria d’Asturies.

Remembrar “por xusticia y homenaxe a unos homes y muyeres que tuvieron vivir un momentu hestóricu mui difícil” ye la intención principal cola que l’escritor Xosé María Rodríguez (Bimeda,1956) encaró la so primer novela ‘Tiempos de nublina’ (Trabe, 2004). Escrita en clave realista, con retayos costumistes, el relatu de Rodríguez somórguiase nel tiempu de la guerra civil y la postguerra nun llugar aparentemente allonxáu de los frentes más activos de la confrontación armada n’Asturies, como son los montes del suroccidente.

Según afirma’l propiu autor, la so novela “básase en fechos reales que me refierieron alcuando los sos propios protagonistes o testigos directos de lo asocedío, dellos tán ficcionalizaos, siempre respetando’l fondu de verdá y la memoria d’esos fechos”. Pal escritor cangués “hai una delda con esa xeneración que vivió la guerra y esi momentu hestóricu del que cada vez queden menos testigos vivos”.

La novela empieza con un allegamientu a la vida cotidiana nos montes y vais d’ente Cangas y el puertu L.leitariegos, un marcu tranquilu y cuasi idílicu que de sópitu vese bastiáu pola llegada de les tropes de Franco y con elles la guerra, la violencia, el silenciu.

Na edición fecha pola editorial Trabe incúise un Cd cola traducción de la novela al español. Entrugáu l’autor si el fin ye facilitar un posible interés d’editores enfotaos en publicala traducida, Rodríguez declara que la intención “ye bien diferente, si alcuando se publica en castellano va ser cola mesma editorial, vivo en Madrid de cuantayá y equí tengo munchos amigos a los que-yos prestaba lleer el llibru y quería poné-yoslo más fácil”

Xosé María Rodríguez foi ún de los fundadores del Conceyu d’Asturies en Madrid y tien publicaos los llibros de relatos: ‘Nueite de filandón’ y ‘Xuan Canas’.

La novela “Las últimas voluntades del caballero Hawkins” del escritor asturianu Jesús del Campo algamó el llunes 27 n’Italia el Premiu Internacional Ciudá de Gaeta pa Lliteratura de Viaxes y Aventures. L’escritor recibió la noticia nel so domiciliu de Xixón y declaró sentise “sorprendíu y contentu” pola distinción, una de les más prestixoses del panorama lliterariu italianu. El xuráu escoyó por unanimidá la obra del asturianu énte les d’otros autores como’l francés Jean Christophe Rufin, el suecu Bjorn Larsson o los itialianos Luciana Capretti y Giuseppe Cerdona.

Jesús del Campo afirmó qu’esti reconocimientu internacional a la so obra lléga-y nun momentu creativu “de parada técnica”, motiváu, ente otres razones pola so “escasa fé nel camín que sigue anguaño la lliteratura, emburriada polos intereses comerciales”. El xixonés manifestó que’l so escepticismu “afortunadamente nun llega a descreer del poder verdaderu de la escritura, un llibru a veces puede dar un ‘golpe d’estáu’ contra la realidá, puede llegar a tener esa fuerza impulsiva”.

La novela cola qu’algamó el premiu ‘Las últimas voluntades del caballeru Hawkins’ afonda nel puxu de la imaxinación y l’azar al través d’una recreación de la segunda vida de Jim Hawkins, el guaje de ‘La isla del tesoru’. Del Campo apuesta por una narrativa “abierta a la fantasía y al desllume poéticu, a que les palabres s’encendan de maxa”. La concesión del premiu significa pa él “un vientu favorable que m’ayuda a inflar el fuelle nel camín inciertu del escritor ente les sos obres”.

L’autor de la novela premiada pola ciudá italiana de Gaeta collechara enantes de publicar ‘Las últimas voluntades del cabellero Hawkins’ un importante ésitu editorial cola so obra ‘Los cuadernos secretos de Blancanieves’, entrambes publicaes por Debate. Del Campo enfótase en que’l premiu va vali-y pa facilita-y la so entrada n’Italia cola traducción de la so obra: “ye un estímulu, porque ún nunca sabe’l destín que van correr los sos llibros y cuando siguen nueva ruta ye como si empezaran otra vez el viaxe”, afirmó el novelista.

L’escritor Berto Cobreros Gil ta acabante publicar la so última novela: ‘Abocaos’, una hestoria realista que’l propiu autor define como ‘una vuelta de tuerca más a la visión de toa una xeneración que n’Asturies nun tien otros caminos a nun ser el de la emigración forzosa’. El relatu, nel que nun falten pincelaes costumistes de la realidá asturiana actual, tenta espeyar los problemes y desenfotos d’una mocedá abocada, talo diz el títulu, a un caleyón ensin salida “nun país ‘abocáu’ tamién a nun tener futuru, a morrer, como la so cultura, la so llingua”.

Cobreros Gil válese d’una imaxe pergráfica pa definir la realidá que tenta espeyar na so obra: “trátase d’una estructura d’embudu nel qu’una clase A, cola so llingua, la so situación social privilexada, vive na parte ancha y una clase B, condergada a vivir na parte más estrecha del embudu, primíos hasta consiguir que salgan pel furacu pequeñu”.

L’autor xixonés reconozse un escritor comprometíu cola so propia realidá “na mesma midida que lo toi como ciudadanu”. Enantes d’esta novela, Cobreros Gil, publicara dellos títulos de lliteratura infantil y xuvenil, sicasí refuga la dixebra xeneracional pa clasificar los xéneros: “nun creo qu’esista de verdá una lliteratura que namás pueden lleer los llectores más mozos, cualquier llector mínimamente formáu puede lleer llibros d’adultos y interpretalos dafechu”, afirma y considera que “la dixebra tien más de ver con ciertos criterios pedagóxicos o n’otres llingües col puxu comercial de les editoriales dica un públicu curiosu”.

‘Abocaos’ preséntase mañana nel Atenéu Obreru de Xixón a les 19,00 de la mano del caderalgu de lliteratura Benigno Delmiro Coto.

La pluralidá ye’l rasgu común de les distintes poesíes que s’escriben nel estáu. Esa ye la principal conclusión cola que se pesllaron los XX Alcuentros Lliterarios de Verines, aconceyaos nesta ocasión pa discutir a cuentu de la realidá poética actual. Autores y críticos de toles lliteratures hispániques, incluída l’asturiana, repasaron a lo llargo de dos díes el momentu que vive anguaño la poesía española

El respetu a la diversidá de corrientes estétiques, tendencies xeneracionales y espresiones llingüístiques ye una característica d’esta cita añal coles lliteratures del estáu dende la so primer edición en 1985. Nesi sen los Alcuentros de Verines son una rara escepción, reconoz Xuan Bello, xunto a Esther Prieto, los únicos autores n’asturiano invitaos al congresu. L’escritor apunta, sicasí, lo positivo que fuera ampliar la presencia d’autores en llingua asturiana en futures ediciones: ‘Non namás porque se celebre equí y col patrociniu d’instituciones d’Asturies, sinón pol interés de les aportaciones que podíen facer los nuestros escritores al alcuentru’.

Luisa Castro, Pablo García Baena, Luis García Montero, Amalia Iglesias, Yolanda Castaño, Andrés Neuman o Julia Uceda fueron dellos de los participantes nel congresu de Verines. L’alcuentru pellóse con una merienda-cena ufiertada pola Conseyería de Cultura a los asistentes nel Archivu d’Indianos de Colombres.

Los alcuentros lliterarios de Verines cellebren a partir de güei na llocalidá de Pendueles, en Llanes, el so venti aniversariu con un exame de les diverses tendencies estétiques de la poesía española. Destamiente remémbrase l’asuntu que centró los debates de la primer edición en 1985 baxo’l títulu: ‘L’estáu de les poesíes’. Poetes como Luis García Montero, Joan Margarit, Luisa Castro o los asturianos Esther Prieto y Xuan Bello van tar presentes na cita

Los alcuentros, organizaos pola Universidá de Salamanca en colaboración col Ministeriu de Cultura, quieren centrase nesta edición n’amosar la bayura y diversidá de la poesía que s’escribe anguaño nel estáu.

El congresu lliterariu de Verines ye dende la so primer edición un puntu d’alcuentru d’autores que desenvuelven la so obra en cualquiera de les llingües del estáu, incluyida l’asturiana. A lo llargo de les sos venti ediciones desfilaron pola casona de Pendueles escritores y especialistes de toles procedencies culturales, estétiques o xeneracionales. L’alcuentru cuenta col patrociniu de la Conseyería d’Educación y Cultura y la Fundación Príncipe d’Asturies.

El premiu ‘Café Gijón’ viaxa a Barcelona. L’autor arxentín Lázaro Covadlo, afincáu na Ciudá Condal y con una decena de títulos yá nel mercáu, algamó a última hora de la tarde d’ayeri el prestixosu galardón de novela cola obra ‘Criaturas de la noche’, depués d’imponese en sucesives votaciones a los restantes 259 orixinales que concurrieron al certame. El xuráu, presidíu pola directora de la Biblioteca Nacional, Rosa Regàs, emitió’l so fallu nel popular ‘Café Gijón’ de Madrid.

Por unanimidá, les personalidaes encargaes de designar la obra ganadora reconocieron la especial calidá de la novela de Covadlo, que definieron como “una fábula moderna intrigante, espléndida y d’argumentu orixinal”. Na obra, l’autor arxentín narra les peripecies d’un ciudadanu al qu’una pulga agospiada nel oyíu va dictando-y normes de comportamientu social que-y garanticen l’ésitu a cambiu d’apropiase d ela so voluntá.

Emigrante d’España dende 1975 y con esperiencia llaboral como parrilleru, camioneru y titular d’un quioscu de prensa, Covadlo retomó la escritura nos años ochenta depués d’un ‘parón’ y resultó finalista por dos vegaes del premiu Planeta Biblioteca del Sur, coles obres ‘Conversación con el monstruo’ y ‘Remington Rand’. Bon conocedor de la lliteratura española, Lázaro Covadlo señala ente los sos autores favoritos a los lliteratos Quim Monzó, Juan Bonilla y Antonio Muñoz Molina.

El premiu de novela ‘Café Gijón’ recibió esti añu un total de 260 orixinales a concursu, la cifra más alta na hestoria’l certame. La mayoría de los trabayos taben unviaos dende España y 24 d’ellos yeren obra d’autores afincaos n’Asturies.

Al concursu presentárense 36 orixinales procedentes de países estranxeros, ente los que figuren Arxentina, Estaos Xuníos, México, Venezuela, Chile, Cuba, Guatemala, Ecuador, Colombia, Bélxica, Italia, Francia, Israel y Portugal, toos escritos dafechu en llingua castellana y con un llargor mínimu de 150 páxines, como establecen les bases del certame.

L’emblemáticu premiu de novela ‘Café Gijón’ nació en 1949, alitáu por un grupu d’intelectuales encabezaos por Fernando Fernán-Gómez, Eduardo Haro-Tecglen, Manuel Aleixandre y el premiu Nobel Camilo José Cela. Dende 1989, el Conceyu de Xixón revitalizó’l concursu asumiendo la dotación y promoción del premiu, que na so última edición recayó nel ayerán Fulgencio Argüelles, pola novela ‘El palacio azul de los ingenieros belgas’.

Web personal de Lázaro Covadlo

Los equipos de rescate de Protección Civil y la Guardia Civil de Montaña atoparon a primer hora d’esta tarde nes inmediaciones de los Picos d’Europa al escritor xixonés Xuan Porta, que llevaba desapaecíu dende’l pasáu domingu y que foi llocalizáu con feríes de diversa consideración, según precisó’l serviciu d’emerxencia ‘112 Asturies’. Un helicópteru evacuó al autor al hospital de Les Arriondes.

L’operativu de busca pusiérase en marcha esta mesma mañana, de sutaque foi atopáu nel Mirador de La Reina el vehículu nel que viaxaba l’escritor, coche que llevaba tres díes estacionáu unos seis quilómetros más allá de Cuadonga, na carretera que conduz a los Llagos.

Al rodiu de les 14 hores de güei, Porta foi llocalizáu nesa mesma zona y sometíu a un primer reconocimientu mélicu ‘in situ’. Depués, l’helicópteru de Bomberos d’Asturies treslladó al escritor al hospital de Les Arriondes.

La familia del autor xixonés alertara a la Policía de la so desapaición, depués que l’escritor s’ausentara del domiciliu familiar, nel barriu de Los Campos, a primer hora’l domingu pasáu, y nun regresara esa mesma nueche.

Xuan Porta Allende (Xixón, 1971) ye llicenciáu en Ciencies Biolóxiques y participa activamente nel movimientu asturianista, con presencia destacada nel Conceyu d’Estudiu y Proteición de la Llingua Asturiana (Cepla) y na Tertulia Cultural ‘El Garrapiellu’.

Porta algamó en 1997 el premiu ‘Elvira Castañón’ col poemariu ‘Xirúa’, y nesi mesmu añu asoleyó, en collaboración con María Xosé Llope, el volume ‘Xuegos infantiles p’anguañu’.