Portada Lliteratura El congresu lliterariu de Verines celebró el so venti aniversariu embaxo’l signu de la diversidá

El congresu lliterariu de Verines celebró el so venti aniversariu embaxo’l signu de la diversidá

by asturnet

La pluralidá ye’l rasgu común de les distintes poesíes que s’escriben nel estáu. Esa ye la principal conclusión cola que se pesllaron los XX Alcuentros Lliterarios de Verines, aconceyaos nesta ocasión pa discutir a cuentu de la realidá poética actual. Autores y críticos de toles lliteratures hispániques, incluída l’asturiana, repasaron a lo llargo de dos díes el momentu que vive anguaño la poesía española

El respetu a la diversidá de corrientes estétiques, tendencies xeneracionales y espresiones llingüístiques ye una característica d’esta cita añal coles lliteratures del estáu dende la so primer edición en 1985. Nesi sen los Alcuentros de Verines son una rara escepción, reconoz Xuan Bello, xunto a Esther Prieto, los únicos autores n’asturiano invitaos al congresu. L’escritor apunta, sicasí, lo positivo que fuera ampliar la presencia d’autores en llingua asturiana en futures ediciones: ‘Non namás porque se celebre equí y col patrociniu d’instituciones d’Asturies, sinón pol interés de les aportaciones que podíen facer los nuestros escritores al alcuentru’.

Luisa Castro, Pablo García Baena, Luis García Montero, Amalia Iglesias, Yolanda Castaño, Andrés Neuman o Julia Uceda fueron dellos de los participantes nel congresu de Verines. L’alcuentru pellóse con una merienda-cena ufiertada pola Conseyería de Cultura a los asistentes nel Archivu d’Indianos de Colombres.

Tamién te podria gustar