Lliteratura

Chusé Raúl Usón ye’l primer autor en llingua aragonesa en ver traducida una obra suya al asturiano. La editorial Trabe ye la responsable de la publicación de ‘Les cien llaves’, una novela del escritor mañu que s’ufierta en versión d’Héctor Xil y que presenta esti xueves n’Uviéu el propiu autor introduciu por Xuan Bello.

Usón, nacíu en Zaragoza nel añu 1966, ye un de los autores más prolíficos de la nueva lliteratura aragonesa, con obres como ‘Dezinueu repuis d’una bida dallata'(1986); ‘Ixe buxo biello –entre fierros–(1988); ‘Luna, arto y poemas de bardo’ (1989); ‘Fuellas chobenas’, 1991; ‘Trista boira baxa'(1994) y el so últimu llibru: ‘Benzina’, (2003). Cola novela qu’agora se publica en llingua asturiana: ‘Les cien llaves’ algamó’l Premiu Arnal Cavero del Gobiernu d’Aragón.

L’actu de presentación de ‘Les cien llaves’ de Chuse Raúl Usón va ser esti xueves 29 na llibrería Trabe d’Uviéu a les 20,00 hores y van asistir a él, amás del propiu autor, el traductor de la obra, Héctor Xil y l’escritor Xuan Bello.

L’escritor Xulio Vixil publica la so segunda novela embaxo’l títulu de “L’Inmoral”(Trabe, 2005), una apasionada defensa de les utopíes lliteraries y vitales na que’l narrador yerbatu da rienda suelta a les sos obsesiones nun llinguaxe llaráu de llirismu y humor.

La novela de Vixil cuenta la trayectoria esistencial de Mon Legué, un personaxe perteneciente a la categoría social de los “bantu” y que se defín como “comedor de caparines”, obligáu a vivir nun mundu domináu polos “undanda”, la categoría inferior. En palabres del tamién escritor Pablo Rodríguez Medina la narración de Xulio Vixil (Bimenes, 1964) ye “muncho más qu’un ensayu o un estudiu, ye’l retratu llíricu de Mon Legué, un simple ya inmoral bantu” y que con esta novela, el narrador yerbatu “vuelve a refrescar la prosa asturiana de llirismu, ritmu, fantasía y un humor y amor especiales como mui pocos saben facer”.

La nueva obra de Xulio Vixil preséntase esti martes 27 na llibrería Trabe d’Uviéu a les 20.00 hores nun actu nel que l’escritor Inaciu Llope va glosar el llibru y falar del so autor.

Pablo Texón Castañón (Felechosa, 1977)acaba de publicar el volume de poemes col que ganó en 2003 el premiu Nené Losada Rico: “Toles siendes”, una declaración de principios lliterarios que tien el sellu d’una nueva voz xeneracional y al empar xenuinamente personal.

Referencies a la esperiencia asimilada d’un llector y d’un home del so tiempu al que nun-y son ayenos los guiños de la cultura pop o del universu multimedia, una voz íntima y el verbu cenciellu de la poesía de llinia clara definen el conxuntu de poemes de “Toles siendes” (Trabe, 2005).

Texón Castañón nacíu en Felechosa en 1977 apurre nel so llibru dalgo más qu’un primer volume: toa una llección d’estrena nel panorama de les lletres asturianes más actuales. Una voz que busca el so propiu rostru ente les sombres de la realidá y un autor qu’al pesar de publicar la so opera prima amuesa la so destreza sabiamente ensayada en publicaciones disperses anteriormente. Agora axunta una colección cerrada de poemes onde s’albidren intenciones de continuar la serie en futures nueves entregues.

La revista dixital Lliteratu acaba de colgar na rede el so tercer númberu dedicáu a los autores mozos na nuestra llingua. La nueva entrega ufierta entrevistes con Pablo Texón, Chechu García y Elías Veiga, xunta reseñes, esbilla de poemes y noticies relacionaes cola actualidá lliteraria asturiana.

El númberu 3 de Lliteratu amuesa testos inéditos d’Héctor Blanco, Henrique G. Facuriella, Juan Carlos Crespo Lanchas, amás de Pablo Texón Castañón. La publicación dixital ufierta tamién reseñes de la novela de Xandru Fernández “Les ruines”(Trabe, 2004) y de l’antoloxía “Trece por docena”(El Caballo de Troya, 2005) de Constantino Bértolo, asina como les sos avezaes secciones d’esbilla de poemes unviaos polos llectores, remembranza d’autores clásicos y noticies.

La prósima entrega de la revista va ser un especial dedicáu a los premios lliterarios n’Asturies con publicación de testos inéditos de los últimos ganadores del Teodoro Cuesta: Pablo Rodríguez Alonso, el Xosefa Xovellanos: Ismael González Arias y del Xuan María Acebal: Xabiero Cayarga.

Lliteratu

L’escritor y periodista Naciu Varillas acaba de publicar la so primer novela: “Carretera ensin barru”, una crónica directa y enfotada del esbarrumbe del mundu tradicional narrada al través de la esperiencia humana de la emigración. Los cambios y tensiones vivíos pola Asturies rural nes últimes décades refléxense nesta novela que nun refuga l’aposientu nes narraciones breves.

Varillas traza en “Carretera ensin barru”(Trabe, 2005) una novela moderna, que trata un tema d’actualidá (l’urbanismu qu’invade lo rural cola disculpa de meyorar la calidá de vida de la xente de los pueblos, obligándolos a marchar), pero poco avezáu hasta agora na narrativa asturiana y compón una hestoria entevenada con un puñáu de cuentos que nun son un añadíu más pol caprichu del autor, sinón que van dir apurriéndonomos delles claves pa entender el relatu principal.

Naciu Varillas presenta la so novela esti miércoles 21 a les 19.00 hores na Casa de Cultura de La Felguera nun actu que va cuntar cola participación del tamién escritor José Luis Rendueles y la presencia de l’alcaldesa de Llangréu, María Esther García.

Pablo Rodríguez Alonso col so llibru “La lluz del nordés” ye’l flamante ganador del Premiu Teodoro Cuesta de poesía que se falló en Mieres esti viernes 16. L’alcalde de Mieres propunxo nel cursu del actu de recordanza de les quince ediciones del premiu lliterariu que’l conceyu del Camín se tresforme nun foru permanente de debate ente los escritores en llingua asturiana.

El nuevu ganador del Teodoro Cuesta recibió la noticia en Mérida onde s’alcontraba recoyendo otru premiu, nesti casu d’investigación por un trabayu sobre la identidá nacional asturiana. Rodríguez Alonso súmase a la nómina de ganadores del premiu de poesía que convoca’l conceyu de Mieres y qu’esti viernes xuntáronse nel patiu del Institutu Bernaldo Quirós p’acoyer la recordanza del Ayuntamientu nun emotivu actu que tuvo’l so broche final con una actuación de la cantadora Anabel Santiago.

Nel cursu del actu d’homenaxe a los ganadores del Teodoro Cuesta l’alcalde Luis María García nuna breve intervención n’asturiano propunxo que Mieres se tresformare nun llugar d’alcuentru ente los autores en llingua asturiana y remembró la tradición cultural de la villa dende los tiempos nos que se dio a conocer l’escritor que da nome al prestixosu premiu de poesía. L’actu tuvo presidíu pola conseyera de Cultura, Ana Rosa Migoya, que tamién intervieno en llingua asturiana pa felicitase pol “altu nivel de calidá y interés”, según les sos palabres, de la creación nel nuestru idioma.

Al actu de Mieres acudieron prácticamente tolos ganadores del Teodoro Cuesta, a nun ser Berta Piñán, Fonsu Velázquez y Martín López-Vega, ausentes por residir fuera d’Asturies y nun haber podío desplazase hasta Mieres. Nel homenaxe sí tuvieron presentes Lourdes Álvarez, Xuan Bello, Esther Prieto, Ana Vanessa Gutiérrez, Chechu García, Xuan Santori, Anxelu Morán, Marta Mori, Xabiero Cayarga, Ánxel Álvarez Llano, Antón García y Pablo Antón Marín Estrada.

El patiu de la Conseyería de Cultura valió esti xueves 15 como escenariu pal actu d’entrega de los premios lliterarios en llingua asturiana que convoca añalmente’l Principáu. Ismael María González Arias cola so novela ‘L’alcordanza del agua’ algamó’l Xosefa Xovellanos de Narrativa y Xabiero Cayarga recibió’l Xuan María Acebal de Poesía por ‘Les llingües de la hidra’. Cristóbal Ruitiña ya Inaciu Galán algamaron los galardones de les dos categoríes periodístiques del Premiu Enriqueta González Rubín.

Los nomes de los ganadores diéronse a conocer esti xueves nel mesmu actu nel que tamién se facía la entrega. González Arias repite premiu por segundu añu consecutivu inda en diferente categoría (l’añu pasáu consiguió l’Enriqueta González Rubín) y ye tamién la segunda vez que recibe’l Xosefa de Xovellanos, después de que lu algamara en 1992 cola so novela “El cuartu negociu”.

El ganador del Xuan María Acebal de Poesía, Xabiero Cayarga, tampoco nun ye nuevu nel panorama de los premios lliterarios n’asturiano. Asina llogró en 1994 el Premiu de Narraciones de l’Academia de la Llingua cola so obra “El boleru de Xabel”, en 2000 recibió’l Teodoro Cuesta de Poesía por “Pequeña Europa” y en 2003 algamó’l Premiu Teatru Xovellanos pola so pieza “Fabila”.

Cristóbal Ruitiña ye un periodista que colabora en diversos medios, ente ellos el semanariu Les Noticies y desenvuelve los sos llabores como responsable de prensa del Ayuntamientu de Cangas del Narcea. EL trabayu pol que lu premió’l xuráu del Enriqueta González Rubín fue’l reportaxe tituláu: “Una historia de la mina poco conocida” publicáu en Les Noticies. L’otru galardonáu na categoría audiovisual, Inaciu Galán, empobina l’espaciu radiofónicu d’Onda Peñes “Asina foi el surdimientu” y el trabayu pol que recibió’l premiu fue “Homenaxe n’alcordanza de Mánfer de la Llera”.

Los premios Xosefa Xovellanos y Xuan María Acebal tán dotaos con 6.000 euros caún y les dos categoríes del Enriqueta González Rubín con 3.000 euros.

La sé de la Conseyería de Cultura n’Uviéu va acoyer esti xueves 15 a les 19.00 hores un actu nel que van dase a conocer los nomes de los ganadores de los premios Xosefa Xovellanos de Novela, Xuan María Acebal de Poesía y Enriqueta González Rubín de Periodismu. Na mesma ceremonia el director xeneral de Promoción Cultural y Política Llingüística, Carlos Madera, va facer entrega de los galardones.

El premiu Xosefa Xovellanos de novela llega con ésta a la so XXVI edición y a él podíen presentase obres inédites y sin premiar n’otros concursos, escrites en llingua asturiana y con una estensión mínima de setenta y cinco fueyes. Ta dotáu con 6.000 euros. El premiu Xuan M.ª Acebal algama la XI edición y tá empobináu a premiar poemarios con una estensión mínima de quinientos versos. La so dotación ye tamién de 6.000 euros.

El premiu Enriqueta González Rubín celebra esti añu la so III edición y convócase en dos categoríes: a) Periodismu escritu, pa trabayos publicaos en periódicos y revistes ente’l 1 de xineru y el 30 d’ochobre, dotáu con 2.000 euros; b) Periodismu audiovisual, pa emisiones radiofóniques o televisives de tema llibre y de cualquier xéneru emitíos nes mesmes feches y con una dotación de 4.000 euros.

Santolaya de Cabranes va remembrar a la escritora y filóloga María Xosefa Canellada cuando se cumplen venticinco años de la publicación de ‘Montesín’, obra pionera de la lliteratura infantil en llingua asturiana. Una esposición con ilustraciones del relatu de Canellada, charres y llectures públiques de ‘Montesín’ igüen el programa del homenaxe que se celebra esti viernes 16.

La conseyera de Cultura Ana Rosa Migoya va presidir los actos del 25 anivesariu de la publicación del cuentu de María Xosefa Canellada y a inaugurar la nueva Casa de Cultura que lleva’l nome de la escritora cabraniega. Enantes, dende les 10.00 de la mañana van entamase diverses actividaes en Santolaya: la primera una convivencia d’escolinos del conceyu natal de Canellada siguida d’un espectáculu d’animación a cargu de Kamante Teatru y llectures de ‘Montesín’ por cuenta d’alumnos y maestros de les escueles cabraniegues. Al meudía va celebrase l’actu institucional col descubrimientu d’una placa col nome de la escritora y académica de la Llingua nel nuevu centru cultural.

Les actividaes siguen pela tarde con una llectura per parte d’autoridaes y vecinos de la obra infantil de Canellada a les 17.30. Una hora después remembraráse la dimensión filolóxica y lliteraria de l’autora de ‘Montesín’ con entrambes comunicaciones: “María Xosefa Canellada, muyer de ciencia y escritora” y “Aproximación pedagóxica de Montesín”. Darréu, a les 19.00 hores va entamase una mesa-alderique sobre la figura de la homenaxeada cola participación de Severino Antuña y Xuan Busto. Pieslla los actos la proyección d’un audiovisual sobre la vida y los llabores de María Xosefa Canellada.

Al empar na nueva Casa de Cultura de Santolaya va tar abierta hasta’l 23 d’avientu una esposición coles ilustraciones de les dos ediciones de Montesín: la primera d’Ayalga de 1980, a cargu d’Ababa Zamora, y la segunda de Trabe, de Violeta Monreal

.

El conceyu de Mieres va reunir esti viernes 16 nun actu públicu a tolos autores ganadores del Premiu de Poesía Teodoro Cuesta a lo llargo de les sos quince ediciones. El certame ye’l más prestixosu que se concede en llingua asturiana y algamáronlu los más representativos autores de poesía de les xeneraciones del Surdimientu.

La primer ganadora del Premiu Teodoro Cuesta fue la escritora Berta Piñán en 1991 col so llibru “Vida privada”. Dende entós autores como Lourdes Álvarez, Xuan Bello, Esther Prieto, Xuan Santori, Xabiero Cayarga o Ana Vanessa Gutiérrez fueron engrosando la nómina de los premiaos. La última convocatoria repartió’l galardón ente l’académica Marta Mori d’Arriba -qu’algamara’l premiu en solitariu dos años enantes- y Xelu Gutiérrez Morán. El ganador o ganadora d’esti añu va conocese esti viernes 16 nel cursu de la gala que va celebrase en Mieres.

L’actu de remembranza de les quince ediciones del Teodoro Cuesta va escomenzar a les 19.30 na Sala de Columnes del IES Bernaldo de Quirós cola llectura del acta del xuráu del XV Premiu de Poesía y de siguío l’alcalde de Mieres va facer entrega de la Pluma de Plata del conceyu a los autores ganadores de les anteriores ediciones, que, darréu, van recitar los sos poemes. La gala va rematar con una actuación de la cantadora Anabel Santiago, que va interpretar poemes de dalgunos de los escritores premiaos col Teodoro Cuesta, y una degustación de productos gastronómicos locales.

Más información