Hestoria

La Conseyeria de Cultura ta acabante editar el llibru “Un matemáticu asturianu del sieglu xviii: Agustín Bernardo de Pedrayes y Foyo (1744-1815)”, una versión estendida de la conferencia que’l doctor Pablo Suárez preparó pal I Día de les Ciencies Asturianes, celebráu’l pasáu 10 de payares de 2008 n’Uviéu col envís d’afalar l’usu del asturianu nun ámbitu nel que nun ye habitual.

La Conseyería de Cultura y Turismu pon al algame de tolos interesaos el testu, des descargándolu de baldre en formatu PDF o solicitando l’unviu de baldre nel corréu opll@princast.es. Cola iniciativa d’esta publicación, un fondu estudiu de Pablo Suárez García de la vida y aportaciones a destremaos campos de la matemática del científicu llastrín, la Conseyería de Cultura y Turismu quier contribuir “a un meyor y mayor conocimientu d’esti destacáu intelectual asturianu”.

Descarga’l llibru de baldre, calcando equí

Espublizastur va asoleyar, nun tardando, el segundu volume de la so coleción “Ensayu”, un espaciu de reflexón de temática asturiano y na nuesa llingua. Xaviel Viareyo y Villamil, cola definición y analís del ethnos o Nación Asturiana y los sos ámbitos, entra dafechu na problemática de les llendes de la Nación Asturiana en “Los ámbitos de la Nación Asturiana” .

“La Nación Asturiana” de Carlos X. Blanco foi’l libru qu’abrió esta coleción y que tres el segundu volume de Vilaeyo va siguir con títulos d’otros autores asturianos como José Carlos Loredo Narciandi o David M. Rivas.

Anque Vilareyo tien asoleyaos abondos artículos, collaboraciones periodístiques y ensayos en delles revistes, con “Los ámbitos de La Nación Asturiana” espubliza’l so primer llibru d’ensayu.

Al traviés d’esti analís sobre la conformación del ethnos asturianu a lo llargo la historia, l’autor peracaba l’ensayu cola concreción de los ámbitos de la Nación Asturiana anguaño. Cuáles son les llendes qu’algamen el conceutu d’ethnos o Nación Asturiana, o cuálu ye’l so ámbitu, son entrugues que l’autor igua nesti ensayu que dibuxa la Nación Asturiana al traviés de la hestoria teniendo como referencia los sos ámbitos .

Esti Ensayu ye un bon entamu pal debate al nun coincidir l’ambitu espacial del ethnos asturianu coles llendes alministratives d’anguaño. En pallabres de Xaviel Vilareyo y Villamil “el fechu de que l’ámbitu espacial del ethnos asturianu nun coincida coles llendes alministratives o provinciales actuales nun significa que se tengan qu’asimilar éstes como l’únicu marcu posible de referencia”.

Xaviel Vilareyo y Villamil (Mieres, 1967), llicenciáu en Derechu, profesor d’Institutu y escritor foi gallardonáu con dellos premios lliterarios tien publicaes delles obres: Cróniques del recuerdu (Ed. del Norte,1997), Más que probable (Ed. Vitrubio,1998), Os novos poemas (Xeira,1999), El camín d’inquietú (Ed. del Norte, 2001) y La causa más probable, (Trabe, 2007). Amás tamién publicó en delles revistes como “Lliteratura” y “Lletres Asturianes”, ente otres munches.

Esti martes 18 a les 19 hores, na Llibrería Asturiana de Trabe (Uviéu), va presentase’l númberu 2 de la revista Erada.

Rafael Rodríguez Valdés (Uviéu, 1978) llicenciáu n’Hestoria pola Universidá d’Uviéu y autor, d’ente otros trabayos, de “Llingua Asturiana y Movimientu Obreru. 1899-1937”, ye’l coordinador d’esta revista d’historia.

La revista d’investigación “N’ast” asoleya un númberu nuevu con siete artículos de divulgación ya investigación nos qu’apecen temes como’l banzáu de Caliao, la reforma l’Estatutu y temes hestóricos rellacionaos cola lliteratura, la hestoria militar d’Asturies y otres cuestiones con Asturies y los asturianos como protagonistes.

El volume ábrelu un Entamu “Nel estatu, munchu más qu’oficialidá”, Paloma García Fernández, llicenciada en Ciencies de la Mar analiza la problemática del Banzáu de Caliao. Xaviel Vilareyo, llicenciáu en Drechu, ufre “El societarismu familiar asturianu”.

L’arquitectu Xuan Pedrayes Obaya revisa’l conceptu d’aldea asturiana “Urbanismu semiola. De los comancheros al Estatutu Parroquial”. Per otru llau, Faustino Zapico y Antón Martínez, hestoriadores, espublicen los artículos “La concreición n’Asturies del estáu lliberal” y “Unes notes de los refuxaos y la política sobre la población refuxada n’Asturies de la Guerra Civil”.

El volume piésllenlu l’artículu del estudiante d’Hestoria Javie Cubero de Vicente, qu’espubliza “Tres escritores carlistes na lliteratura asturiana: Xuna María Acebal (1815-1895), Manuel Fernández Castro (1834-1905) y Enrique García-Rendueles (1880-1955)”, amás d’una entrevista a Lluís Maria Xirinacs recuperada de la revista “El Glayíu” del añu 1978 por mor de la so muerte l’añu pasáu.

La llibrería Alborá Llibros de Xixón acoyó esti vienres la presentación d’un nuevu colectivu, l’Atenéu Cultural Xuan María Acabel, una organización na que participen investigadores de la hestoria, la cultura y la lliteratura asturianes. Nel actu celebróse un recital de la obra de Xuan María Acebal na que personalidaes de la cultura asturiana como Xosé Lluis Campal, Xurde Morán o Xuan Xosé Sánchez Vicente, ente otros.

El presidente de la institución, Javier Cubero, abrió l’actu esplicando los oxetivos de la organización, que pasen “principalmente por da-y un puntu de vista asturianu al estudiu de la hestoria d’Asturies”. Un proyectu col que quieren, comentó Cubero “contrarrestar determinaos posicionamientos oficiales que nun respuende a la verdadera hestoria del país”. Cubero recordó amás que la organización convida a tolos investigadores asturianos “a collaborar cola organización nes sos actividaes”.

El siguiente n’intervenir foi Inaciu Galán, miembru del colectivu, que comentó los llabores na estaya de la investigación lliteraria que va siguir la organización cultural. “Nun val con recuperar la lliteratura clásica asturiana ya investigala, vamos buscar tamién promocionala, dala a conocer al pueblu asturianu”, comentó Galán. Amás, la organización, anunció, “trabaya yá pa consiguir la edición d’una colección de clásicos de la lliteratura asturiana nuna edición de calidá y axustada la norma actual”, xunto con un proyectu d’estudiu de los autores, “principalmente anteriores al Surdimientu”, campu nel que dixo “queda muncho por facer y por conocer”.

N’esti trabayu de recuperación Galán comentó tamién como dende l’Atenéu van afalar “el trabayu n’andecha perimportante con una lliteratura tan dispersa como l’asturiana”.

Dempués de les intervenciones inaugurales, un recital de poemes de Xuan María Acebal ocupó l’actu. Xuan Xosé Sánchez Vicente, escritor, investigador y políticu asturianista; Xurde Morán presentador de televisión y etnógrafu; ya Ignacio G. López Dóriga, empresariu asturianu, lleeron el poema “El amor del hogar” del que se cumplien esti vienres 130 años de la so escritura.

Darréu, l’investigador y escritor Xosé Lluis Campal dio llectura al poema “La fonte de fascura”, terminando l’actu con un pinchéu.

Asturnews ufre los vidios de les llectures de poemes del actu d’inauguración del Atenéu Cultural Xuan María Acebal.

Xuan Xosé Sánchez Vicente:

Xurde Morán:

Ignacio G. López-Dóriga:

Xosé Lluis Campal:

Páxina del Atenéu Xuan María Acebal

Sol títulu “Poder y simboloxía na Europa altomedieval. Conmemoración centenaria de les cruces d’Uviéu” el Gobiernu d’Asturies, cola collaboración de la Universidá d’Uviéu, la Xunta Xeneral, el Conceyu d’Uviéu y l’Arzobispáu, inauguren mañana un symposium internacional nel que va falase del poder n’Europa nos sieglos VIII a X, el cultu a les cruces y sobremanera, el papel d’Asturies y de les sos cruces centenaries nesos sieglos.

El títulu del Symposium trata de responder, según los organizadores, “a la problemática xeneral plantegada pola investigadores sobre la hestoria d’Europa d’estos trés sieglos”. Nel congresu van dase a conocer a fondu les característiques de los cambios nel ordenamientu de la población nesos sieglos, amás de falar con detenimientu de la hestoria de les cruces uviedines, la de la Victoria y la de los Ánxeles, depositaes na Cámara Santa de la Catedral d’Uviéu.

El folletu editáu poles instituciones organizadores vien billingüe ya inclúi tolos actos que van celebrase dende mañana, llunes 22 de setiembre, hasta’l sábadu 27, nel Hotel Reconquista d’Uviéu. Y va ser nesi últimu día cuando se faiga una visita a los monumentos del arte asturianu, rematando’l Symposium con una recepción oficial na Xunta Xeneral d’Asturies.

Programa completu del Symposium

El Parque de la Prehistoria de Teberga va incorporase a la rede mundial de museos al ser aceptada la so candidatura pa formar parte, como miembru de plenu derechu, del Conseyu Internacional de Museos, el ICOM, una prestixosa organización empobinada a la conservación y preservación del patrimoniu natural y cultural. Nes sos conclusiones, el ICOM valora que, anque’l Parque de la Prehistoria asturianu nun ye un muséu, cumple los principios qu’inspiren esta organización, como l’espardimientu científicu y la función educativa.

Les actividaes del ICOM, que caltién una rellación formal cola UNESCO y tien estatus d’órganu consultivu del Conseyu Económicu y Social de les Naciones Xuníes, respuenden a les necesidaes de los profesionales de los museos y céntrense na cooperación y l’intercambéu profesional, l’espardimientu de conceptos básicos, l’atención al público de los museos, la formación de personal, l’ameyora de la calidá profesional, la defensa de la ética profesional, la preservación del patrimoniu y la llucha escontra’l tráficu illícitu de bienes culturales.

El ICOM, creáu en 1946, cuenta con miembros de 140 países. Toos ellos participen nes actividaes rexonales, nacionales ya internacionales de la organización: congresos, xornaes, seminarios, espublizaciones, programes de formación y la organización del Día Internacional de los Museos, que se celebra cada añu, dende 1977, el 18 de mayu. Toes estes actividaes desendólquense al través de 115 comités nacionales y 30 comités internacionales.

El Parque de la Prehistoria abrió les sos puertes al público’l 24 de marzu de 2007. Dende entós recibió 68.260 visites y convirtióse nún de los cinco equipamientos autonómicos más visitaos, xunto al Muséu del Xurásicu, el Muséu de la Minería, el Muséu de Belles Artes y Llaboral Ciudá de la Cultura.

El Parque ta concibíu como un monumental sitiu d’interpretación de la primer gran cultura europea, la que permitió allumar el prodixosu arte rupestre paleolítico, ente’l 35.000 y el 10.000 a.d.C. Pa ello reproduxéronse de manera eshaustiva los paneles pictóricos principales y de grabaos de les más importantes cueves con arte rupestre d’Europa, ente elles les cinco cueves asturianes recientemente incluyíes na llista de Patrimoniu Mundial de la UNESCO, recreando al máximu l’ambiente orixinal nel qu’esi arte vio la lluz.

A xuiciu de la Conseyera de Cultura y Turismu, Encarna Rodríguez Cañas, la decisión del ICOM “supón la reconocencia al llabor d’espardimientu y científica que vien faciendo’l centru dende la so creación y constitúi un revulsivu pa un equipamientu qu’en namas nun añu y mediu treformóse nun referente cultural y científicu, amás d’un auténticu motor d’atracción del turismu cultural y familiar n’Asturies”.

Según la Conseyera de Cultura, el Parque ye un nodu escepcional ya imprescindible pa esplicar y entender toles manifestaciones de pintura rupestre del periodu paleolíticu tan presentes en tol Cordal Cantábricu. “Quien quiera conocer esti periodu humanu y les sos manifestaciones pictóriques tien de conocer Teberga non solo polos sos facsímiles sinon pol discursu interpretativu de la Galería. La intervención ye exemplar nel respetu ya integración de les obres arquitectóniques nueves nun paisax tan singular y paradigmáticu como’l de la comarca”.

El Centru de Cultura Vieyu Institutu Xovellanos de Xixón, va acoyer güei la inauguración de la esposición “50 Aniversariu del Festival Vaqueiru y de la Vaqueirada”, una amuesa onde va poder conocese la hestoria de la fiesta que se celebra cada añu na braña d’Aristébanu y que ta declarad “d’Interés Turísticu Nacional”.

Nel actu va presentase tamién un llibru na alcordanza del mediu sieglu de Vaqueirada y van tar presentes, l’alcaldesa de Xixón, Paz Fernández Felgueroso, les conseyeres de la Presidencia y de Cultura y Turismu, María José Ramos y Encarnación Rodríguez y el Conseyu Rector del Festival Vaqueiru, los Vaqueiros d’Honor de les sucesives ediciones y los alcaldes de les comarques vaqueires.

El periodista y escritor Miguel Rojo va ser l’encargáu de facer esti miércoles a partir de les 19,30 hroes la presentación del llibru “La Diosa contra Roma” de Pilar Sánchez Vicente nel Foru Abiertu de la Llibrería Cervantes n’Uviéu.

La próxima presentación sedrá en Xixón el día 28 de xunu.

Sol títulu “Poder y simboloxía na Europa altomedieval. Conmemoración centenaria de les cruces d’Uviéu” el Gobiernu d’Asturies, cola collaboración de la Universidá d’Uviéu, la Xunta Xeneral, el Conceyu d’Uviéu y l’Arzobispáu, van organizar en setiembre un symposium internacional nel que va falase del poder n’Europa nos sieglos VIII a X, el cultu a les cruces y sobremanera, el papel d’Asturies y de les sos cruces centenaries nesos sieglos.

El títulu del Symposium trata de responder, según los organizadores, “a la problemática xeneral plantegada pola investigadores sobre la hestoria d’Europa d’estos trés sieglos”. Nel congresu van dase a conocer a fondu les característiques de los cambios nel ordenamientu de la población nesos sieglos, amás de falar con detenimientu de la hestoria de les cruces uviedines, la de la Victoria y la de los Ánxeles, depositaes na Cámara Santa de la Catedral d’Uviéu.

El folletu editáu poles instituciones organizadores vien billingüe ya inclúi tolos actos que van celebrase dende’l llunes 22 de setiembre y el sábadu 27, nel Hotel Reconquista d’Uviéu. Y va ser nesi últimu día cuando se faiga una visita a los monumentos del arte asturianu, rematando’l Symposium con una recepción oficial na Xunta Xeneral d’Asturies.

Programa completu del Symposium