Hestoria

La Casa Cultura de Grau va acoyer na tarde de güei, vienres 5 de xunu, y de magar les ocho la tarde, el primer volume del “Álbum Nostálgico de Grado” obra del editor moscón César García Santiago. Na publicación al traviés de les sos 96 páxines contémplense un centenar de semeyes del pasáu del conceyu, dende 1905 hasta anguaño.

La obra ta yá nes llibreríes llocales Sandra, Trasgu, Orbayu, Santa Ana, Dos Vías y Anacón, amás de delles de Xixón y Uviéu, al preciu de 10 euros.

Güei miércoles va presentase’l programa del segundu Alcuentru Internacional Sobre la Guerra de la Independencia, dedicáu nesta ocasión al Bicentenariu de la 1er Invasión Napoleónica d’Asturies. Les xornaes, que van celebrase hasta’l próximu sábadu 23 na Delegación de Defensa n’Asturies y nel Aula Magana de la Universidá d’Uviéu.

L’Alcuentru inclúi conferencies, comunicaciones, meses redondes, homenaxes, visites hestorico-culturales y recreaciones de momentos hestóricos.

Programa completu de les xornaes

El Salón de Recepciones de la Casa Conceyu de Xixón foi’l llugar escoyíu esti miércoles 22, pa la presentación del llibru “Llingua, clase y sociedá”, que recueye les conferencies lleíes nel seminariu celebráu en 2006 na Universidá d’Uviéu y embaxo’l mesmu nome. Na presentación, que cuntó con una importante asistencia, participarón los coordinadores de la obra, Rafael Rodriguez Valdés, Xulio Viejo y Rubén Vega; y el conceyal de cultura tradicional y llingua asturiana, Jesús Montes Estrada.

Rubén Vega destacó la importancia d’esti llibru que “vien a enllenar un espaciu necesariu na hestoriografía asturiana”, mientres que Xulio Viejo destacó la importancia d’estudiar “la problemática del asturianu dende dellos puntos de vista estremaos o complementarios al del llingüística”, como ye’l casu del llibru, onde apaecen hetoriadores y persones con otres formaciones.

La intervención de Rafael R. Valdés recordó los problemes qu’atopen los investigadores asturianos que quieren “investigar n’asturianu”, lo mesmo nes instituciones académiques que na prensa o ente la clas política.

L’Academia de la Llingua Asturiana ufre na rede los discursos institucionales lleíos polos presidentes de l’Academia dende l’añu 1982. Los discursos tán firmaos, ente esi añu y el 2000 por Xosé Lluis García Arias, mientres qu’en 2001 foi Miguel Ramos Corrada, como presidente en funciones, l’encargáu de redactalu. Dende 2002 los discursos tán escritos por Ana Mª Cano, presidenta anguaño.

Discursos xubíos a la páxina de l’ALLA

Güei, xueves 16 d’abril, a les 19:30 hores, l’Atenéu Xovellanos de Xixón acueye la presentación del llibru “Asturias, los astures y la administración romana durante el Alto Imperio” de Narciso Santos Yanguas, catedráticu d’Hestoria Antigua de la Universidá d’Uviéu. Esti llibru supón un pasu más nes sos investigaciones sobre los ástures, que vien a completar al trabayu “Asturias, los astures y la cultura castreña”, qu’espublizare con KRK.

Santos Yanguas (Añe, Segovia, 1949) curso estudios de Filoloxía Clásica y Hestoria Antigua nes Facultaes de Filoloxía y Xeografía y Hestoria de la Universidá Complutense de Madrid, llicenciándose n’entrambes les dos especialidaes en 1972. Dende 1990 ye catedráticu d’Hestoria Antigua Universal y d’España de la Universidá d’Uviéu.

El Club de Prensa Asturiana de La Nueva España va acoyer güei xueves un coloquiu sobre’l sententa aniversariu del fin de la Guerra Civil cola presencia de Julio García García, presidente de la Confederación de Combatientes d’Asturies y Fermín Alonso Sádaba, presidente de la Hermandá de Defensores d’Uviéu.

L’actu va celebrase a partir de les ocho la tarde.

L’Asociación pa la Recreación Hestóricu-Cultural d’Asturies (ARHCA) ta acabante anunciar que dos de los sos miembros, José Luis Calvo, collaborador y Antonio Luis Pérez, presidente, descubrieron los llibros d’actes de la Xunta Suprema d’Asturies, lo que supón un “hestóricu y perimportante impulsu col descubrimientu d’una documentación, en paraderu desconocíu dende va cuasi doscientos años”.

Los papeles, comenten, “contienen información de primera mano alredor de la parte de la llucha escontra l’invasor francés que se llibró n’Asturies”.

Los documentos desapaercieren en mayu de 1809 y diéronse por perdíos ente 1814 y 1815, cuando se recompuso l’archivu de la Xunta Xeneral d’Asturies. Estos “llibros o cuadernos d’actes” daben testimoniu de tolo alcordáu pola Xunta, primera en declarar la guerra a Napoleón en mayu de 1808, de les sos delliberaciones y los oficios y noticies que recibía.

Dende esti mes los documentos tán dixitalizaos y al algame de cualesquier investigador, incluyendo los “llibros d’alcuerdos” de la Xunta dende setiembre de 1808 hasta payares de 1809. Los investigadores nun descarten más afayos.

Güei, miércoles 18 de febreru, a les 18:30 hores nel CMI Pumarín-Xixón Sur, el Conceyal de Memoria Social, Cooperación, Cultura Tradicional y Llingua Asturiana, va participar na inauguración del Congresu “La Memoria de l@s niet@s” organizáu pola Asociación “Todos los nombres de Asturias”.

Nel actu va participar l’Alcalde de Xixón en funciones José Manuel Sariego; la Conseyera de Bientar Social y Vivienda, Noemí Martín; y el presidente de l’asociación organizadora, Luís Miguel Cuervo.

Na tarde d’ayeri, miércoles 28 de xineru, presentóse’l segundu númberu de la revista Erada d’hestoria contemporánea d’Asturies nel chigre El Cafetón, asitiáu na Cai del Sol d’Avilés.

La revista ta dirixida por Rafael R. Valdés y asoleyada por Trabe Ediciones y nesti númberu 2 pon el güeyu na Guerra Civil n’Asturies con dellos articulos sobre’l tema.

Esti domingu, 21 d’avientu, Javier Cubero de Vicente, investigador y presidente del Atenéu Cultural Xuan María Acebal, dio una conferencia titulada “Les guerres carlistes” nel Foru Social de San Miguel de las Dueñas, llocalidá asitiada n’El Bierzu (Lleón).

La charra-alderique tuvo llugar a les cinco la tarde nel edificiu d’usos múltiples d’esti pueblu lleonés y dientro del cilcu d’actividaes culturales de l’asociación de vecinos del mesmu. Dempués de la conferencia celebróse una visita al conocíu como “L’Ecorial d’El Bierzu”, el monesteriu de la orde del Císter, de más de 1.200 años d’antigüedá.