El Parque de la Prehistoria de Teberga entra na rede internacional de museos al ser aceptáu pol ICOM como miembru de plenu derechu

El Parque de la Prehistoria de Teberga va incorporase a la rede mundial de museos al ser aceptada la so candidatura pa formar parte, como miembru de plenu derechu, del Conseyu Internacional de Museos, el ICOM, una prestixosa organización empobinada a la conservación y preservación del patrimoniu natural y cultural. Nes sos conclusiones, el ICOM valora que, anque’l Parque de la Prehistoria asturianu nun ye un muséu, cumple los principios qu’inspiren esta organización, como l’espardimientu científicu y la función educativa.

Les actividaes del ICOM, que caltién una rellación formal cola UNESCO y tien estatus d’órganu consultivu del Conseyu Económicu y Social de les Naciones Xuníes, respuenden a les necesidaes de los profesionales de los museos y céntrense na cooperación y l’intercambéu profesional, l’espardimientu de conceptos básicos, l’atención al público de los museos, la formación de personal, l’ameyora de la calidá profesional, la defensa de la ética profesional, la preservación del patrimoniu y la llucha escontra’l tráficu illícitu de bienes culturales.

El ICOM, creáu en 1946, cuenta con miembros de 140 países. Toos ellos participen nes actividaes rexonales, nacionales ya internacionales de la organización: congresos, xornaes, seminarios, espublizaciones, programes de formación y la organización del Día Internacional de los Museos, que se celebra cada añu, dende 1977, el 18 de mayu. Toes estes actividaes desendólquense al través de 115 comités nacionales y 30 comités internacionales.

El Parque de la Prehistoria abrió les sos puertes al público’l 24 de marzu de 2007. Dende entós recibió 68.260 visites y convirtióse nún de los cinco equipamientos autonómicos más visitaos, xunto al Muséu del Xurásicu, el Muséu de la Minería, el Muséu de Belles Artes y Llaboral Ciudá de la Cultura.

El Parque ta concibíu como un monumental sitiu d’interpretación de la primer gran cultura europea, la que permitió allumar el prodixosu arte rupestre paleolítico, ente’l 35.000 y el 10.000 a.d.C. Pa ello reproduxéronse de manera eshaustiva los paneles pictóricos principales y de grabaos de les más importantes cueves con arte rupestre d’Europa, ente elles les cinco cueves asturianes recientemente incluyíes na llista de Patrimoniu Mundial de la UNESCO, recreando al máximu l’ambiente orixinal nel qu’esi arte vio la lluz.

A xuiciu de la Conseyera de Cultura y Turismu, Encarna Rodríguez Cañas, la decisión del ICOM “supón la reconocencia al llabor d’espardimientu y científica que vien faciendo’l centru dende la so creación y constitúi un revulsivu pa un equipamientu qu’en namas nun añu y mediu treformóse nun referente cultural y científicu, amás d’un auténticu motor d’atracción del turismu cultural y familiar n’Asturies”.

Según la Conseyera de Cultura, el Parque ye un nodu escepcional ya imprescindible pa esplicar y entender toles manifestaciones de pintura rupestre del periodu paleolíticu tan presentes en tol Cordal Cantábricu. “Quien quiera conocer esti periodu humanu y les sos manifestaciones pictóriques tien de conocer Teberga non solo polos sos facsímiles sinon pol discursu interpretativu de la Galería. La intervención ye exemplar nel respetu ya integración de les obres arquitectóniques nueves nun paisax tan singular y paradigmáticu como’l de la comarca”.