Gastronomía

Un total de 27 establecimientos hosteleros del conceyu Samartín del Rei Aurelio van participar otru añu más na que yá ye la cuarta edición d´una cita gastronómica, dende´l vienres 6 al domingu 8 de marzu, que tien a les tortielles como protagonistes y qu’amuesa la cartelería y papelería fecho íntegramente n´asturianu, como vieno faciendo ECOSAM dende qu’entamara a organizar esti eventu.

La hostelería venceyada a ECOSAM propónse cellebrar otra vuelta el SAMARTÍN DE LES TORTIELLES ente los díes 6 y 8 d’esti mes de marzu de 2015, tiendo como exe central ser les tortielles creatives, diferentes y orixinales que van presentar los establecimientos participantes y que va votar la clientela de los establecimientos participantes.

En SAMARTÍN DE LES TORTIELLES podrán degustase 27 tortielles diferentes y orixinales, con ingredientes tan variaos como´l pulpu, oricios, centollu, llagostinos, almexes, gambes, amás de tortielles con carne guisao, morciella matachana, carne picao, xamón, salchiches, tando dalgunes d´elles complementaes con setes, xampiñones, calabacinos, pimientos o diferentes quesos, incluso con almendres, como ya se ficiere nos trés años precedentes.

Variedá y creatividá para la cuarta edición d´esti eventu gastronómicu nel que la clientela fai de xuráu, previa degustación de cuatro tortielles que se vienden al preciu de 1,5 euros y que puen acompangase con cerveza a un preciu especial. Too ello col aliciente del sortéu de 100 € en compres ente los votantes que depositen la so papeleta en dalguna de les urnes instalaes nos establecimientos participantes.

Como vien siendo habitual, fixáronse dos rutes pol conceyu, una ente Sotrondio y Blimea, y otra pol L´Entregu. Pa facilitar el desplazamientu, la llocalización y l´información de les diferentes tortielles que se servirán, editáronse 2.000 “gastromapas” distribuios polos llocales participantes y que tamién puen descargase n’Internet.

Pa alcontrar más información de los establecimientos participantes habrá que acceder al blog de noticies de la web de ECOSAM (www.ecosam.es/blog), o a la páxina de Facebook de la asociación (www.facebook.com/comerciodesanmartin).

D´igual manera, ECOSAM continúa col fechu diferencial que tien tamién SAMARTÍN DEL PINCHU, esto ye la utilización de la llingua llariega como llingua oficial del eventu gastronómicu, ayudando d´esta manera a la normalización de la llingua asturiana fuera de los tradicionales ámbitos de la cultura. Pa too ello, ECOSAM cuenta col asesoramientu de la Oficina de Política Llingüística de Samartín del Rei Aurelio.

Gastromapa de Samartín de les Tortielles coles dos rutes pel conceyu

El númberu de La Sidra correspondiente al mes d’agostu que fai’l númberu 128 yá ta disponible pa la so descarga en pdf, con una bayura conteníos venceyaos a la cultura sidrera y que recueye les sos secciones de siempre (muyeres del llagar, l’axenda sidrera, ect..) y dedica-y abondu espaciu a eventos como’l XVIII FESTIVAL INTERCÉLTICO DEL OCCIDENTE o’l XIV FESTIVAL DE LA SIDRA VILLA DE NAVIA.

Númberu 128 de la revista La Sidra en pdf

El prósimu sábadu 16 d’agostu la revista LA SIDRA cellebrará una Xornada de Tastia de sidre monovarietal vasco y asturiano, con quesu de Bedón. Na xornada de tastia prebaranse dos sidres monovarietales vasques del programa d’investigación lleváu alantre pola Asociación de Sidres de Gipuzkoa en collaboración cola Universidá del País Vascu (cortesía del asesor enolóxicu Juan Zuriarrain) , feches de mazana Gezamina y Urtebi Txiki respeutivamente y otres dos asturianes: Villacubera de nuea espresión, del llagar de Cortina (Regona) y otra esperimental d’otru llagar asturianu.

Trátase d’una oportunidá única pa conocer de primer man los resultaos y les posibilidaes qu’ufierta la sidre monovarietal. La tastia complementaráse con un maridaxe con quesos de cabra y vaca de la quesería llanisca de Bedón.

La Xornada de Tastia cellebraráse’l prósimu 16 d’agostu a les 12:30 del meudíi nel llocal de LA SIDRA en Xixón, y p’apuntase habrá que facelo previamente al mail info@lasidra.as o al teléfonu 652 594 983, y el preciu ye de 10 € normal y 6 € en casu de soscritores o collaboraores.

La próxima fin de selmana, 12 y 13 de xunetu, celébrase la segunda edición de les Xornaes Gastronómiques del Corderu Xaldu Ecolóxicu, entamaes pol Conceyu d’Ayer y polos restoranes del conceyu, con un menú a 20 euros. El Centru Cultural de Moreda acoyó esta mañana la presentación del eventu gastronómicu, que foi llevada a cabu pol Alcalde del Conceyu d’Ayer, David Moreno Bobela, y por representantes de los establecimientos hosteleros que participen na iniciativa.

La oveya xalda ye una raza autóctona d’orixe celta, que va años tuvo a puntu d’escastase. Nos últimos años lleváronse a cabu llabories de recuperación, qu’evitaron la so desapaición. El corderu “xaldu” tien una carne bien sabroso y tienra, si a esto añedímoslu que la so crianza realizóse so los parámetros establecíos pol Conseyu de la Producción Agraria Ecolóxica del Principáu d’Asturies, la resultancia ye inmeyorable.

Los restoranes del conceyu ellaboraron una propuesta gastronómica bien curiosa pa esta fin de selmana, basada na calidá de la materia primo, que brinda la oportunidá de tastiar la esquisita carne de corderu xaldu ecolóxicu, certificada pol COPAE (organismu de control y certificación autorizáu).

Nes xornaes participen nueve restaurantes de les localidaes de Moreda, Murias, Cuergo, Felechosa y la Raya, que van ufiertar un menú compuestu por melón con xamón ibéricu, caldereta de corderu xaldu ecolóxicu y requesón con frutos coloraos. La propuesta inclúi pan, bebida y café al preciu de 20 euros per comensal.

Amás, los Ayer Adictos que s’averen al conceyu pa tastiar les xornaes van poder esfrutar d’un preciu especial, una y bones amosando la so tarxeta nos restoranes participantes van llograr un 10 % de descuentu sobre’l preciu del menú.

ECOSAM entama del 9 al 11 mayu una aición pa dinamizar el comerciu ya la hostelería del conceyu de Samartín del Rei Aurelio desenvuelta dafechamente en Llingua Asturiana y coincidiendo col Día de les Lletres. Esti evento que algama la segunda edición recibe´l nome de “TAPES&COMPRES”, y nel mesmo la clientela podrá tastiar tapes a dos euros cuyu importe será devueltu nun billete a descontar en compres en cualquiera de los 35 comercios y servicios de profesionales participantes.

La pieza angular d´esta prestosa aición serán los propios comerciantes y profesionales que seldrán quienes asuman estos descuentos frente´l cliente. Del 9 al 11 de mayu dir de tapes per cualquiera de los 25 establecimientos hosteleros participantes será un verdaderu chollu, ya que podrán tastiase sabroses tapes a un importe perreducíu, de dos euros, y amás qu´esi importe seya devueltu en compres a los díes siguientes, del 12 al 24 de mayu.

P´alcontrar más información de los establecimientos participantes habrá que acceder al blog de noticies de la web de ECOSAM (www.ecosam.es/blog), o a la páxina de Facebook de l´asociación.

D´igual mena, ECOSAM continúa col fechu diferencial que también tienen los dos eventos gastronómicos qu´organiza SAMARTÍN DEL PINCHU (11800 pinchos vendíos) y SAMARTÍN DE LES TORTIELLES (8.019 porciones vendíes), eventos d´esitu que utilizen la llingua llariega como llingua oficial del eventu en cuestión, ayudando d´esta manera a la normalización de la llingua asturiana fuera de los tradicionales ámbitos de la cultura. Pa too ello, ECOSAM cuenta col asesoramientu de la Oficina de Política Llingüística de Samartín del Rei Aurelio.

“TAPES&COMPRES” contará col patrociniu de Caja Rural, y forma parte de les iniciatives del Plan Estratéxicu del Comerciu de Samartín del Rei Aurelio que ECOSAM lleva implantando dende 2008 en collaboración con la Direición Xeneral de Comerciu del Principáu d´Asturies, el Ayuntamientu de SMRA y la Cámara de Comerciu d´Uviéu.

Páxina en Facebook del Eventu

Desque nació la Cofradía d’Amigos de les Fabes del Principáu d’Asturies, nun dexaron de trabayar en pos de la defensa d’esti productu tan amestáu a la nuesa rexón. Ye por ello y conscientes de la gran potencialidá que tien el cultivu d’esta llegume como una nueva vía de trabayu pal gran númberu de mozos que riquen una mira de futuru y un mediu de vida, qu’esta entidá va entamar el vienres a partir de les 18:30 hores nes instalaciones del restorán Amandi de Villaviciosa, una interesante conferencia-mesa redonda col títulu “Retos de la producción y consumu de les fabes”, na que van participar dalgunos de los principales espertos nesta materia ente los que destaquen, Dña. Ana Elena Pérez Vega, Doctora ya Inxeniera Agrónoma del Programa de Xenética Vexetal del Serida; D. Juan José Ferreira, Doctor en Bioloxía y Director del Programa de Xenética Vexetal del Serida; D. Guillermo García González de L.lena, Técnicu de l’ Área d’Esperimentación y Demostración Agroforestal del Serida; D. Juan José Menéndez García, Llabrador y Presidente del Conseyu Regulador de la IGP Faba Asturiana; D. Pedro Morán Riestra, Restaurador y Propietariu de Casa Gerardo; D. Iván Gonzalez de la Plata, Académicu de l’Academia de Críticos Gastronómicos d’Asturies y Director Xeneral de Fenicia y D. Santiago Fernández Jove, Director Xeneral de Lisfersa (Comercializadora y Distribuidora adscrita a la I.G.P. Faba Asturiana).

Esti xueves 13 de marzu va celebrase nel Colexu Públicu Ramón Menéndez Pidal el taller de cocina asturiana: ¡De la panoya al platu! Taller de tortos. Un taller empobináu a escolares d’educación infantil, que s’imparte íntegramente n’asturianu y promovido pola Oficina de Normalización Llingüística y la FMCE y UP dientro del marcu de la ufierta qu’estes entidaes realicen mientres el cursu escolar a los centros de Xixón.

Nesti taller los menores conocen el procesu de fabricación de la farina, el so orixe y realicen tortos dulces y salaos.

Pero’l Taller d’esti xueves va ser especial y va tener un ingrediente sorpresa: la presencia d’Alejandro G. Urrutia, unu de los prestixosos cocineros de la ciudá. La selmana pasada collaboró Esther Manzano y na prósima selmana va haber nueva sorpresa pa unu de los colexos participantes.

La participación del cocineru ta prevista pa les 11:00 hores.

Alejandro G. Urrutia Formáu en Cambrils (Tarragona), ganador del Campeonatu d’Asturies de Cocina, el d’España y del mundialmente conocíu Bocuse d’’Or mentres taba al frente del restorán Paladares. Nel añu 2005, y siguiendo al mandu de Paladares, da vida a un nuevu proyectu nomáu Gallery Art and Food. Gracies al esfuerzu y al tiempu dedicáu tantu a Paladares como a Gallery Art and Food, ve compensáu’l so trabayu con sendes estrelles michelín (Paladares 2003 al 2007, Gallery Art and Food 2006 al 2008). Tres la finalización d’estos proyectos y de dos años de reflexón, inaugura’l Restorán que lleva’l so nome y que rexenta na actualidá: AgU.

Esti prósimu vienres 15 de marzu tendrá llugar la renaguración del Llar d’Andecha en Xixón, dempués d’un importante procesu de remocicamientu. Andecha Astur de Xixón quier cellebrar con militantes y amigos la renaguración del so llar en Xixón, dempués de dellos meses n’obres de remocicamientu pa da-y al llocal l’aspeutu y los conteníos precisos pa meyorar la so presencia y funcionalidá.

L’actu tendrá llugar el prósimu vienres 15 de marzu de magar les 20 hores, y al mesmu tan invitaos militantes, simpatizantes y amigos d’Andecha Astur.

Un total de 25 establecimientos hosteleros del conceyu Samartín del Rei Aurelio participen na tercera edición d´una cita gastronómica, dende´l vienres 7 al domingu 9 de marzu, que tien a les tortielles como protagonistes y que tien la cartelería y papelería fecho íntegramente n´asturianu.

Tres l´ésitu de SAMARTÍN DEL PINCHU nel pasáu mes d´ochobre, la hostelería venceyada a ECOSAM propónse cellebrar la tercera edición de SAMARTÍN DE LES TORTIELLES, prósima cita gastronómica a desendolcar nel conceyu esta fin de selmana, ente los díes 7 y 9 de marzu, cuyu exe central van ser les tortielles creatives, diferentes y orixinales.

En SAMARTÍN DE LES TORTIELLES podrán degustase 25 tortielles diferentes y orixinales, con ingredientes tan variaos como´l pulpu, oricios, centollu, llagostinos, almexes, gambes, amás de tortielles con carne guisao, morciella matachana, carne picao, xamón, salchiches, tando dalgunes d´elles complementaes con setes, xampiñones, calabacinos, pimientos o diferentes quesos, incluso con almendres.

Variedá y creatividá para la tercera edición d´esti eventu gastronómicu nel que la clientela fai de xuráu, previa degustación de cuatro tortielles, col aliciente del sortéu de 100 € en compres ente los votantes que depositen la so papeleta en dalguna de les urnes instalaes nos establecimientos participantes.

Como vien siendo habitual, fixáronse dos rutes pol conceyu, una ente Sotrondio y Blimea, y otra pol L´Entregu. Pa facilitar el desplazamientu, la llocalización y l´información de les diferentes tortielles que se servirán, editáronse 2.000 “gastromapas” distribuios polos llocales participantes.

Pa alcontrar más información de los establecimientos participantes habrá que acceder al blog de noticies de la web de ECOSAM (www.ecosam.es/blog), o a la páxina de Facebook de la asociación (www.facebook.com/comerciodesanmartin).

D´igual manera, ECOSAM continúa col fechu diferencial que tien tamién SAMARTÍN DEL PINCHU, esto ye la utilización de la llingua llariega como llingua oficial del eventu gastronómicu, ayudando d´esta manera a la normalización de la llingua asturiana fuera de los tradicionales ámbitos de la cultura. Pa too ello, ECOSAM cuenta col asesoramientu de la Oficina de Política Llingüística de Samartín del Rei Aurelio.

Páxina en facebook del eventu