Unes Xornaes Gastronómiques pa sofitar el Cabritu Bermeyu

L’Asociación de Sidreríes de la cai Gascona empecipió ayeri les II Xornaes Gastronómiques del Cabritu Bermeyu que se van celebrar hasta’l próximu 9 de xunetu y de camín punxo en valor la importancia d’esta raza autóctona de la mano de José López, miembru de l’Asociación de Criadores del Cabritu Bermeyu, qu’esplicó nel Bulevar de la Sidra que la especie ta en peligru d’estinción con solo 3.065 exemplares censaos.

Los establecimientos de la Cai Gascona van ufiertar el cabritu guisáu, rustíu, estofáu, con pataques, a la sidra, n’hamburguesa o en chuletes dientro de les sos cartes, qu’hasta’l 9 de xunetu van tener esta aportación especial.

L’oxetivu amosábase nidiamente esti xueves na presentación:”apostar pol nuesu compromisu con Asturies, coles races autóctones y los productos de la tierra”. L’encargáu de presentar les Xornaes, Ángel Álvarez Uría, en representación de l’asociación, dexó bien claro en tou momentu l’apueste de los restauradores uvieinos por esti productu asociáu tradicionalmente a les cuenques mineres y otres zones de la rexón.