Gastronomía

El cocineru Lluis Nel Estrada, autor de llibros como ‘Con tastu a sidra’ y ‘Cocina tradicional asturiana en cuatro estaciones’, presentaba ayeri na carpa de LlibrUvieu el so tercer llibru de cocina, editáu por Picu Urriellu, que lleva por títulu ‘Cuarenta quesos, cuarenta platos’ y que percuerre gastronómica y xeográficamente les cuarenta variedaes queseres d’Asturies.

Industriales cárnicos, técnicos de los servicios agroalimentarios del Principáu y autoridaes del conceyu de Tinéu aconceyaron esti miércoles 21 col fin d’entamar los trámites afayadizos pa solicitar pal popular Chosco,la Indicación Xeográfica de Productu (IGP). L’embutíu, fechu a base de llingua y llombu de gochu ente otros ingredientes, namás se fabrica nel conceyu tinetense y goza d’una gran aceptación en tola rexón occidental.

Na reunión col Principáu informóse de la documentación presentada pa que los técnicos del Ministeriu d’Agricultura puedan facer l’informe preceptivu pa la obtención de la IGP énte la Unión Europea, y nel que se detalla el procesu d’elaboración del chosco, los sos ingredientes, maneres de fabricación y funciones que va tener el so conseyu regulador.

Al términu del aconceyamientu los sos participantes manifestaron que tanto chacineros como responsables de les distintes administraciones tán perinteresaos en que la elaboración d’esti productu respuenda a criterios de la másima calidá, calteniendo les característiques tradicionales.

El Chosco homologáu de Tineo ha pesar ente’l mediu y los dos kilos y nel corte ha presentar un color arroxáu característicu, con distinción de los cachos de carne y untu, amás del arume intensu propiu del embutíu adobáu y afumáu.

El conceyu lleonés d’Oseya de Sayambre quier sumase a la iniciativa por consiguir la Identificación Xeográfica Protexida pa los Quesos de los Beyos na que participen los otros conceyos productores: Amieva y Ponga. Los alcaldes de los tres conceyos reuniéronse esti martes 24 cola directora xeneral d’Industria Agroalimentaria del Principáu pa entamar los primeros pasos nel camín pola marca.

La Conseyería de Mediu Rural lleva unos cuantos meses trabayando , por petición espresa de los queseros de Ponga y Amieva, nel espediente que hai de remitir a la Unión Europea pa la obtención de la marca de calidá. El conceyu de Sayambre manifestó la so voluntá de xuntase a esta iniciativa col fin de que los queseros d’esa fastera -administrativamente asitiada na comunidá de Castiella y Lleón- puedan utilizar esta marca, que ye coincidente col tipu de quesu que s’elabora ende.

Agora, al xuntase un conceyu dependiente d’otra comunidá autónoma la tramitación administrativa d’espediente pa consiguir la marca de calidá pasa a ser responsabilidá del Ministeriu d’Agricultura, Pesca y Alimentación. Nesi sen los Alcaldes pidieron a la Directora Xeneral d’ Agroalimentación del Principáu, Tomasa Arce, que s’aproveche el trabayu fechu hasta anguaño pola administración asturiana, una cuestión a la que Arce nun punxo oxeción dalguna. Los tres alcaldes delegaron na Conseyería de Mediu Rural la responsabilidá de siguir manteniendo les reuniones que sean necesaries colos queseros implicados.

Anguaño hai cuatro queseríes asturianes de Quesu de Beyos rexistraes y la producción añal supera los 50.000 kilos.

L’aprebación definitiva pola Unión Europea de la Denomación d’Orixen protexida de la sidra asturiana recíbese nel sector con una estremadura d’opiniones, ente l’enfotu de los productores qu’apuesten pola marca de calidá y l’escepticismu de los que siguen sacando al mercáu la bebida ensin denomación.

Los propios empresarios sidreros qu’apostaron pola producción d’Orixen reconocen qu’ésta enxamás va representar un consumu masivu n’Asturies y que’l futuru de la marca propio pasa pola so promoción nel esterior y la diversificación n’otros productos. L’administración autonómica, consciente del problema, anunció per voz de la conseyera d’Agricultura, Servanda García, la intención d’entamar una campaña de difusión de la sidra asturiana per tol estáu col oxetivu de dar salida a una producción que s’espera se multiplique por diez nos prósimos años. La campaña publicitaria va escomenzar nos primeros meses de 2006 con cuñes publicitaries en diversos medios d’ámbitu estatal.

Les cifres de la sidra con D.O. siguen siendo perbaxes en comparanza cola bebida ensin etiquetar. Asina, ente 2004 y 2005 nun algamó más que les 350.000 botelles frente a los noventa millones de litros (ente natural y achampanao) que produxo’l sector en sidra ensin denomación.

José Luis Fernández ye l’autor del llibru “La cocina popular asturiana”, un recetariu nel que repasa los platos más representativos de la gastronomía del país siguiendo les enseñances de les guisanderes tradicionales. El volume preséntase esti miércoles nel Aula Abierta de la Llibrería Trabe d’Uviéu.

Publicáu n’edición bilingüe asturianu/castellanu, el llibru de Fernández ta dividíu en cuatro secciones: ³Cremes, sopes y potaxes², ³Pescaos y mariscos², ³Carnes y caza² y ³Postres². En total son delles decenes de platos “de los de tola vida los que se proponen nesti llibru pa disfrutar cocinándolos y por supuesto comiéndolos”, afirma’l so autor.

Los menús que se proponen nel recetariu de José Luis Fernández van dende un pote a un llombu de gochu con mazanes, y dende la fabada a les truches, un xabalí al estilu Ibias o unos simples frixuelos, recetes que, como diz l’autor na so breve pero contundente introducción, tán “mui llonxe de deconstrucciones y minimalismos”.

“La cocina popular asturiana” preséntase esti miércoles a les 7 la tarde na Llibrería Trabe d’Uviéu (c/Buenaventura de Paredes, 4). Nel actu van participar l’autor, José Luis Fernández, y Antón García, editor del llibru.

Asturies ye una de les comunidaes que cuenta con más restaurantes señalaos cola marca “Q” de calidá. El nuestru país, xunta’l País Vascu, son según un estudiu del Institutu de Calidá Turística, les zones onde meyor se come. Dieciséis restaurantes asturianos tienen anguaño la másima marca de la bona mesa.

L’estudiu del Institutu de Calidá Turística afita que namás setenta y cuatro establecimientos de tol estáu cuenten cola “Q” y el mayor númberu d’ellos tan asitiaos n’Asturies, el País Vascu y la Comunidá Muerciana. Esta marca ye una distinción que concede Turespaña a los restaurantes que xunten les meyores característiques de calidá.

Los establecimientos asturianos cola másima calificación gastronómica son: Carnestolendas, Casa Conrado, Casa Fermín, La Más Barata, La Taberna del Zurdo y la Taberna Pelayo, n’Uviéu; en Xixón, Casa Zabala, La Pondala, Las Delicias y Los Nogales;Amandi en Villaviciosa;el restaurante Aeropuertu d’Asturies;Casa Edelmiro , en Les Regueres; en Siero, la Costana de Granda; La Venta del Jamón, en Pruvia; y en Tapia, el restaurante Palermo.

El Café Español d’Uviéu ye’l marcu onde se puede visitar la esposición “Una mirada sobre la sidra”, una amuesa sobre’l mundu de la nuestra bebida autóctona entamada en colaboración col Muséu de la Sidra de Nava.

El ciclu de producción de la sidra y el del cultivu de la mazana son los exes sobre los que s’articula esta amuesa que va poder contemplase hasta’l prósimu 28 d’agostu.

L’oxetivu de la esposición “Una mirada sobre la sidra” ye dar a conocer al través del siguimientu del ciclu de primavera a primavera tol procesu d’elaboración de la bebida y la cultura alrodiu del que se crea. Esti filu conductor val pa adientrase nel mundu de los trabayos y los díes d’un llagar asturianu dende que recibe la mazana hasta qu’embotella la sidra.

L’apuesta de l’administración autonómica tocante a la sidra asturiana ye pola que tea homologada con Denominación d’Orixen. Asina lo aseguró ayer en Nava, nun debate con llagareros y collecheros, la directora xeneral d’Agroalimentación de la Conseyería de Mediu Rural, Tomasa Arce, qu’anunció la puesta en marcha d’una campaña de promoción estatal de la bebida autóctona d’Asturies pa la prósima seronda. La política siguida pol Principáu tocante a la sidra nun axuntó’l contentu de tolos sectores implicaos y llagareros con sidra de mazana seleccionada (la que nun tien Denominación) pidieron que tamién s’apueste poles sos marques.

El debate calteníu ayer en Nava punxo enriba la mesa les espectatives y tamién contradicciones que tien anguañu el sector de la sidra. Per un llau la Denominación d’Orixe que garantiza la calidá y l’autenticidá de la sidra fecho con mazana del país nun acaba d’afayar la so aceptación nel mercáu asturianu y amás el sector en xeneral presenta una sobreufierta de marques que lu atasquen.

Énte les crítiques que recibe la política del Principáu en materia de sidra, la representante de la Conseyería de Mediu Rural, Tomasa Arce foi clara al asegurar que l’apuesta de l’administración autonómica ye pola sidra con Denominación d’Orixe y qu’a ello van dedicar los sos esfuerzos. Un d’ellos va ser una campaña publicitaria a nivel del estáu pa promocionar la bebida asturiana. Arce afirmó que “na Conseyería tenemos claro que tamos nun proyectu rexonal pa la sidra que ye la denominación d’orixen, respetando l’autonomía decisoria de toles empreses qu’elaboren sidra y marques privaes ya iniciatives empresariales”. La directora d’Agroalimentación animó a “sumar esfuerzos y non dispersalos” nel sector.

El debate celebróse nel marcu de les actividaes de la Fiesta de la Sidra de Nava que se va entamar el prósimu domingu. Llagareros del conceyu criticaran a la Conseyería en díes anteriores por nun unviar nengún representante a la presentación del festival.

L’Antigua Fábrica de l’Águila Negra de Cualloto acueye dende esti miércoles 29 y hasta esti caberu día de xunu unes xornaes gastronómiques dedicaes a amosar la variedá de quesos artesanos que se producen na nuestra tierra. Unes xornaes que finen güei y que tan organizaes poles empreses agroalimentaries Crivencar y Tierra Astur embaxo’l títulu de “Asturies, el país de los cuarenta quesos”.

Nestes xornaes van poder gustase a lo llargo de tola xornada de güei xueves toles modalidaes esistentes de quesos artesanos, acompangaes con sidra de tonel y vino de Cangas. Tamién pa poer vese cómo mayestros artesanos macen dalgunos d’esos quesos y de metanes afondar na conocencia de la elaboración y el calter d’un de los productos más ricos de la nuestra gastronomía.

Les xornaes presentáronse esti martes 28 nel Club Prensa d’Uviéu nun actu nel que ufiertóse una degustación de los productos que protagonicen les xornaes y de sidra. Nesta presentación proyectóse tamién un video sobre los quesos asturianos y de siguío entamóse una mesa redonda cola participación de la Directora Xeneral d’Agroalimentación, Tomasa Arce; Jaime Izquierdo, xefe del serviciu de programes de Desarrollu Rural del Principáu; Andrés Navarro, biólogu; el cocineru Lluis Nel Estrada y el periodista César Álvarez.

A lo llargo d’esti miércoles 29 la sidrería-restaurante “Tierra Astur” de Cualloto ufiertó yá y va siguir ufiertando güei xueves n’horariu de xintes y cenes menús especiales con toles variedaes de quesos asturianos, acompangaes con ensalaes y regaes con sidra de pipa y vino de Cangas. El miércoles hebo na xinta una amuesa de la elaboración de quesu casín a cargu de l’artesana Mª Ángeles ÁLvarez Martinez y pela nueche una cata popular dirixida por Andrés Navarro. Na xinta d’esti xueves van ser Francisco Sánchez y Daniel Sánchez los encargaos d’amosar cómo se prepara, nesti casu, l’Afuega’l Pitu; y pela nueche, los asistentes a les xornaes van tar animaos pola actuación en directo de La Bandina.

L’Antigua Fábrica de l’Águila Negra de Cualloto acueye los prósimos díes 28, 29 y 30 unes xornaes gastronómiques dedicaes a amosar la variedá de quesos artesanos que se producen na nuestra tierra. Organizaes poles empreses agroalimentaries Crivencar y Tierra Astur embaxo’l títulu de “Asturies, el país de los cuarenta quesos”, nestes xornaes van poder gustase toles modalidaes esistentes, acompañaes con sidra de tonel y vino de Cangas; tamién ver cómo maestros artesanos macen dalgunos d’esos quesos y de metanes afondar na conocencia de la elaboración y el calter d’un de los productos más ricos de la nuestra gastronomía.

Les xornaes preséntense esti martes 28 nel Club Prensa d’Uviéu y darréu del actu ufiertaráse una degustación del productos que protagoniza les xornaes y sidra. Nesta presentación va proyectase un video sobre los quesos asturianos y de siguío va entamar una mesa redonda cola participación de la Directora Xeneral d’Agroalimentación, Tomasa Arce; Jaime Izquierdo, xefe del serviciu de programes de Desarrollu Rural del Principáu; Andrés Navarro, biólogu; el cocineru Lluis Nel Estrada y el periodista César Álvarez.

A lo llargo del miércoles 29 y el xueves 30 la sidrería-restaurante “Tierra Astur” de Cualloto va ufiertar n’horariu de xintes y cenes menús especiales con toles variedaes de quesos asturianos, acompañaes con ensalaes y regaes con sidra de pipa y vino de Cangas. El miércoles va haber na xinta una amuesa de la elaboración de quesu casín a cargu de l’artesana MªÁngeles ÁLvarez Martinez y pela nueche una cata popular dirixida por Andrés Navarro. Na xinta del xueves van ser Francisco Sánchez y Daniel Sánchez los encargaos d’amosar cómo se prepara, nesti casu, l’Afuega’l Pitu; pela nueche, los asistentes a les xornaes van tar animaos pola actuación en directo de La Bandina.