Oseya de Sayambre quier xuntase a la marca xeográfica Quesu de los Beyos

El conceyu lleonés d’Oseya de Sayambre quier sumase a la iniciativa por consiguir la Identificación Xeográfica Protexida pa los Quesos de los Beyos na que participen los otros conceyos productores: Amieva y Ponga. Los alcaldes de los tres conceyos reuniéronse esti martes 24 cola directora xeneral d’Industria Agroalimentaria del Principáu pa entamar los primeros pasos nel camín pola marca.

La Conseyería de Mediu Rural lleva unos cuantos meses trabayando , por petición espresa de los queseros de Ponga y Amieva, nel espediente que hai de remitir a la Unión Europea pa la obtención de la marca de calidá. El conceyu de Sayambre manifestó la so voluntá de xuntase a esta iniciativa col fin de que los queseros d’esa fastera -administrativamente asitiada na comunidá de Castiella y Lleón- puedan utilizar esta marca, que ye coincidente col tipu de quesu que s’elabora ende.

Agora, al xuntase un conceyu dependiente d’otra comunidá autónoma la tramitación administrativa d’espediente pa consiguir la marca de calidá pasa a ser responsabilidá del Ministeriu d’Agricultura, Pesca y Alimentación. Nesi sen los Alcaldes pidieron a la Directora Xeneral d’ Agroalimentación del Principáu, Tomasa Arce, que s’aproveche el trabayu fechu hasta anguaño pola administración asturiana, una cuestión a la que Arce nun punxo oxeción dalguna. Los tres alcaldes delegaron na Conseyería de Mediu Rural la responsabilidá de siguir manteniendo les reuniones que sean necesaries colos queseros implicados.

Anguaño hai cuatro queseríes asturianes de Quesu de Beyos rexistraes y la producción añal supera los 50.000 kilos.