Europa

La institución con sede n’Estrasburgu acaba d’aprobar les recomendaciones al Estáu español del tercer informe sobre’l cumplimientu de la Carta Europea de les Llingües Minoritaries, onde se pide al Gobiernu asturianu que, en collaboración colos falantes, avance na protección llegal del asturianu.

Depués de que’l Comité d’Espertos del Conseyu d’Europa aprobara les recomendaciones al Estáu español del tercer informe sobre’l cumplimientu de la Carta Europea de les Llingües Minoritaries, onde se fala del asturianu y se recuerda qu’a pesar de les recomendaciones de los informes anteriores tovía nun se declaró como llingua oficial, la Xunta pola Defensa de la Llingua Asturiana (XDLA) pide al Gobiernu d’Asturies y a la Xunta Xeneral que tomen nota y que faigan dalgún pronunciamientu sobre les recomendaciones que-yos faen les instituciones europees. Asina, la organización entiende que nestos cuatro años que pasaron desque se publicara’l segundu informe nun se dieron pasos alantre, porque güei, como nel 2008, el Conseyu d’Europa recomienda avanzar nel reconocimientu llegal del nuestru idioma. La XDLA compara l’actitú del Conseyu d’Europa hacia la política llingüística del País Vascu cola d’Asturies: mentes qu’al Executivu socialista de Patxi López lu emponderen dende Estrasburgu y lu ponen como modelu a siguir nel ámbitu español, el Gobiernu d’Asturies, tamién en manes del PSOE, recibe un tirón d’oreyes por nun dar pasos alantre col reconocimientu de los derechos llingüísticos de los falantes. Mesmamente, al lleer l’infome pue vese cómo en política llingüística tamos dando pasos atrás cola sida de la crisis económica.

Asina, a pesar de criticar la falta d’avances llegales, el Conseyu d’Europa diz que l’Alministración asturiana tien un «compromisu de munchos años» na promoción del idioma, y ponen pa ello como exemplu les llinies de subvenciones pa la normalización. Sicasí, hai que recordar qu’esti añu’l Gobiernu recortó en más d’un 60% estes ayudes, dalgo que pue suponer el fin de la industria cultural n’asturianu, un sector que yá ta mui mermáu pola crisis y pal qu’esta mengua pue suponer la reducción de puestos de trabayu, sía por despidos o porque ciarren empreses.

La normalización nos conceyos

Otra manera, l’informe tamién señala ente lo positivu los 18 Servicios de Normalización Llingüística (SNL) que funcionaben n’Asturies nel momentu d’ellaboración del informe. Sicasí, en cuenta d’avanzar hacia alantre nesi sentíu fomos p’atrás, porque agora hai 14 abiertos, y la verdá ye que nunca llegó a haber 18, polo qu’entendemos que esi númberu salió d’un tracamundiu o de la mala fe de los datos apurríos pol Gobiernu. Too ello muestra la falta d’avances y la precariedá de tolo que tien que ver col idioma, dalgo colo que dende’l Gobiernu asturianu se xuega dende hai años, pa facer coses ensin da-yos estabilidá y visibilidá, nun xuegu onde pareza que se fai mentes qu’en realidá nun se fai. Tamién ye de reseñar que’l Conseyu d’Europa avale los 180.000 euros que recibieron estos servicios nel 2008, xusto cuando’l BOPA del 24 d’ochobre publicó una mengua nestes subvenciones de 15.700 euros, dexando a los SNL con 76.700 euros, una cifra que queda mui lloñe de la del 2008 qu’avala l’informe européu.

Medios de comunicación

Per otru llau, el Gobiernu asturianu informó al Conseyu d’Europa de la presencia del asturianu al traviés de cinco programes na TPA y más de diez na RPA, «con audiencia alta». Sicasí, a pesar d’esa audiencia alta de la que fala’l Gobiernu, cuatro años depués, en cuenta de medrar, esa presencia ye asemeyada na televisión, nun porcentaxe que queda nel 2%, mentes que na radio l’asturianu desapareció dafechu. Otra manera, al respective a los medios de comunicación, l’informe fala d’un periódicu selmanal n’asturianu y del on-line de la RTPA. Sicasí, estos dos exemplos, Les Noticies y la Estaya d’Asturianu de la RTPA, yá nun existen y dende’l Gobiernu asturianu, en cuenta de reaccionar y ayudar a la prensa n’asturianu, decidió rebaxar les subvenciones a los medios pol usu del asturianu cuasi un terciu en comparanza cola cantidá cola que contaron nel 2011. Too ello mentes que l’asturianu sigue vetao en TPA nos informativos, nos deportes y nos espacios infantiles.

L’asturianu na educación

Sobre’l sistema educativu, l’informe muestra lo que por toos ye sabío –tamién pol Gobiernu asturianu–: qu’ensin el reconocimientu de la Especialidá pal Profesoráu de Llingua Asturiana, l’asignatura queda estancada y nuna situación de precariedá. Tamién fala l’informe de los mínimos d’alumnos que s’esixen pa dar l’asignatura, dalgo que’l Tribunal Superior de Xusticia d’Asturies declaró como illegal. Sicasí, dende la Conseyería d’Educación nun se tomó nenguna midida pa cumplir cola sentencia.

Otra manera, ente lo positivo, l’informe tamién fala de la puesta en marcha d’una Unidá de Traducción, «que permite a tolos ciudadanos presentar documentos n’asturianu». Sicasí, la XDLA quier recordar qu’esta midida, que tendría que valir pa facer cumplir cola Llei d’Usu de 1998, llogróse gracies a les denuncies énte los tribunales y nun salió motu proprio del Gobiernu asturianu. Amás convirtióse nuna unidá pantasma, que nun funciona. Polo que parez, l’Executivu autonómicu viende como iniciatives propies avances na normalización que se llograron gracies al trabayu del movimientu de reivindicación, avances que tuvimos que dir arrampuñando cola fuercia de la llucha social y xurídica.

P’acabar, la organización recuerda que l’informe européu diz que’l Gobiernu nun volvió a facilitar datos sobre’l númberu de falantes que tien el nuestru idioma, cuando existen estudios sociollingüísticos sobre Asturies que muestren que nel 2002 existía un 20% de falantes y que’l 60% de la población taba a favor de la oficialidá, colo que los asturianos tán d’alcuerdu col pidimientu del Conseyu d’Europa d’avanzar nel marcu llegal del asturianu. Que’l Gobiernu nun apurra estos datos a Estrasburgo muestra l’interés en esconder la realidá y l’espaciu social que tien l’asturianu dientro de la nuestra socialidá. Otra manera, la XDLA recuerda que los datos sociollingüísticos son d’hai una década, polo que fadría falta otru estudiu sociollingüísticu que permitiera que, pal cuartu informe, el Conseyu d’Europa contara colos datos más afayadizos. Sicasí, si la falta de política llingüística sigue siendo la llinia del Gobiernu asturianu, ensin falta de más estudios nun ye difícil suponer que’l nuestru idioma va camín de la desaparición y la responsabilidá d’esa catástrofe cultural va tener nomes y apellíos.

Esti martes, 16 d’ochobre, a les siete y media la tarde, va celebrase nel Palau de la Generalitat de Catalunya, en Barcelona, la conmemoración del centenariu de la publicación de la Gramática de la llingua catalana de Pompeu Fabra, considerada’l primer pasu pa facer del catalán una llingua moderna siguiendo criterios científicos. Nel actu, que va ser presidíu pol conseyeru de Cultura, Ferran Mascarell, van intervenir Salvador Giner, presidente del Institut d’Estudis Catalanes; Isidor Marí, presidente de la Sección Filolóxica del IEC, Jordi Mir, director de les obres completes de Pompeu Fabra, y Yvonne Griley, directora xeneral de Política Llingüística.

Mientres l’actu presentaráse l’octavu volume de les Obres completes de Pompeu Fabra, que recueye 516 cartes, 400 escrites por Fabra y 116 por personalidaes de la so dómina. Esti primer epistolariu global de Fabra ye una bona aportación a la conocencia de la evolución sociollingüística y hestórica de la llingua catalana mientres la primer metá del sieglu XX.

L’Atenéu Xovellanos celebra la mesa redonda: “Esta Europa nun funciona”, al cargu de Francisco Rodríguez, presidente de Reny Picot, y Xuan Xosé Sánchez Vicente, presidente del Partíu Asturianista (PAS). Sedrá esti llunes 17 a les siete y media la tarde nel Atenéu Xovellanos de Xixón, allugáu na vieya Escuela Comerciu, na cai Francisco Tomás y Valiente, 1.

Con esta mesa ábrese la temporada d’actividaes del Atenéu. Tará moderada por Rafael Loredo, ex director de la Real Academia de Mecidina d’Asturies.

La organización Xunta Moza tuvo apoyando una manifestación a favor de los drechos de les llingües minorizaes en Francia. L’actu reivindicativu foi’l sábadu 31 de marzu baxo l’eslogan «Nos langues, un droit, une loi» y trescurrió en varies ciudaes del Estáu francés, ente les que taben Tolosa, Kemper, Straassburg, Perpinyá, Ajacciu, Metz, Rijsel y Baiona, que foi’l llugar a onde s’acercó la delegación de Xunta Moza encargada de representar a Asturies en solidaridá coles otres fales minoritaries que tán nuna situación asemeyada a la del asturianu.

La manifestación convocábase “col envís de reclamar, per un llau, el reconocimientu de la diversidá y de los derechos de los falantes de llingües minorizaes; per otru, la ratificación francesa de la Carta Europea de les Minoritaries y, p’acabar, la cooficialidá d’estes llingües nos sos territorios”.

Na manifestación de Baiona, onde tuvo Xunta Moza participaron alredor de 8.000 persones con pancartes, banderes y gritos. Llucía Menéndez, miembru de Xunta Moza -plasmada al ver tanta xente nuna manifestación llingüística- dicía: «Cuando tuviemos en Bretaña nel alcuentru de llingües minorizaes, Ai’ta, organización de referencia na defensa del bretón, taba celebrando una asamblea xeneral, xustamente, pa preparar esta manifestación. Nun podíemos faltar». La protesta que duró casi dos hores, con un recorríu de dos quilómetros, anduvo la parte antigua de la ciudá vasca.

Xunta Moza llevó una pancanta col lema: «Yá, yá, yá: oficialidá. La mocedá en llucha pola llingua asturiana». Les ocho persones que diben aguantádola asitiáronse nun furaquín qu’había na llarga filera de públicu y, como nun podía ser d’otra manera, sobre ellos y elles recayó l’almiración de los locales y de los periodistes: «¡cuándo se vio que dende tán llueñe s’allegase un grupu de manifestantes p’apoyar un tema llingüísticu!» Dalgún reporteru entrugó-y a Marina Pangua, integrante de Xunta Moza, por qué tábemos ellí; la respuesta foi clara: «Tamos equí porque n’Asturies vivimos nuna situación bien paecía a esta: nun se nos reconocen los derechos a los falantes y nun tenemos un compromisu institucional que nos asegure la oficialidá de la nuestra llingua. Tamos equí pa solidarizanos cola vuestra causa porque, a fin de cuentes, somos compañeros na llucha».

Al final de la manifestación, los miembros de Xunta Moza aprovecharon pa estrechar llazos y pa intercambiar opiniones coles persones de la organización del eventu, y con xente qu’asistía dende Occitania, Euskal Herria, Catalunya y otros llugares. Ye pa destacar la conversación con Fermín Muguruza, conocíu activista vascu, quien punxo’l so granín d’arena al posicionase d’acuerdu cola oficialidá del asturianu, y quien manifestó la necesidá de texer redes solidaries y d’intercambiu ente falantes minusvaloraos pa, xuntos, entamar acciones comunes, como yera nesti casu, l’asistencia de Xunta Moza a esti actu reivindicativu.

Un grupu d’estudiantes procedentes de Xinebra (Suiza) xunto a un grupu d’universitarios de Fránckfort del Óder (Alemaña) visitaron el miércoles y xueves pasaos, respeutivamente, el llar de l’Academia de la Llingua Asturiana pa conocer los aspeutos básicos del llabor científicu y normalizador de la institución llingüística asturiana (investigaciones, xornaes, programa formativu, espublizaciones…). Tamién s’interesaron pola situación sociollingüística d’Asturies y les perspeutives de futuru.

El profesor francés Michel Cahen ta acabante asoleyar el llibru “Le Portugal bilingüe. Histoire et droits politiques d’une minorité linguistique : la communauté mirandaise”, una obra na que l’autor fala de al realidá del mirandés. Nel llibru fala del aislamientu d’esta variedá con respectu al restu de fales del dominiu llingüísticu asturlleonés o ástur, comentando tamie´n como “la supervivencia y la promoción de la llingua mirandesa y, polo xeneral, la cultura específica asociada a ella, s’una cuestión política relativa a la igualdá de derechos de los ciudadanos”, en Portugal.

Ente los capítulos, unu dedicáu a la hestoria de la Tierra de Miranda, otru a les carcaterístiques llingüístiques del idioma y otros dedicaos a la situación llegal de la mesma, el so futuru, lam creación d’un Institutu de Llingua y Cultura, ente otros.

Ficha del llibru

L’asociación en defensa de la llingua asturiana, fundada hai trés meses fai pública la so páxina de Rellaciones Internacionales en Facebook. Amás, en dellos díes espérase poner a furrular la seición equivalente en Twitter.

L’asociación en defensa de la llingua asturiana Iniciativa pol Asturianu vien de facer pública la so páxina internacional en Facebook baxo’l nome “Initiative for Asturian – International”. L’envís d’esta iniciativa ye’l d’emplegar les redes sociales pa da-y un puxu a la internacionalización de la llingua asturiana y la so problemática y, d’esti móu, dar a conocer la so situación, esparder el so conocimientu y enfotar a tola xente, incluyío la xente foriato, a sumase al movimientu de reivindicación llingüística. Dende la so apaición na rede, l’asociación vien espublizando toles sos noticies y aiciones en trés llingües (asturianu, castellán ya inglés).

Agora, con esti pasu, inténtase facer que l’asturianu y la so problemática seyan más accesibles y que cualaquier persona, seya d’onde seya, pueda involucrase, como yá asocediere nel pasáu con della xente foriato de renome, como ye’l caso del premiu Nobel irlandés Seamus Heaney, quien tien espresada la so simpatía haza la llingua y el so pruyimientu pola oficialidá.

A lo cabero, l’asociación, al traviés de la so Vocalía de Rellaciones Internacionales, convida a tola xente a sumase al proyeutu y a facer llegar esta iniciativa a tol mundu, seyan asturianos o non.

El pasáu 8 de marzu celebrábase na Universidá d’Aveiro, una llocalidá portuguesa cercana a Oporto, el Congresu Internacional “Les llingües non estatales y les nueves tecnoloxíes de la información y la comunicación”. Nél, representantes de toles llingües romániques y minorizaes de la península ibérica diéronse cita pa conocer la situación de cauna d’elles nel campu de les nueves tecnoloxíes. Una de les conclusiones del congresu foi les importantes posibilidaes qu’ufren les tecnoloxíes nueves pa crear conteníos multillingües en collaboración.

El congresu abrióse cola intervención del decanu de la Facultá de Llingües y Cultures de la Universidá d’Aveiro, Carlos Morais, qu’agradeció la presencia de tolos conferenciantes y del numberosu públicu universitariu que siguió la xornada del congresu. Alberto Gómez, profesor ya impulsor del congresu, xunto a Xavier Frías Conde y José Pedro Ferreira, foi l’encargáu de dar una visión xeneral de la situación de les llingües presentes nel alcuentru, faciendo referencia al asturianu, sobre la que denunció la irregularidá de que l’Estatutu d’Autonomía nun declare la oficialidá y nome “bable” a la llingua.

Xavier Frías Conde, profesor de la UNED y escritor en gallegu, asturianu y otres llingües, dedicóse a falar del papel de los blogueros na normalización de les llingües minorizaes, y usó l’exemplu asturianu, centráu nos blogues lliterarios d’autores como Xuan Bello, Antón García o Pablo X. Suárez, pa esplicar cómo pueden collaborar esti tipu d’esperiencies al pesu y la calidá d’una llingua na rede.

Dempués taba previsto que fuera José Pedro Ferreira, de l’Asociación de Lhengua Mirandesa quien falare, pero por problemes familiares foi Alcides Meirinhos, de la mesma organización, quien faló de la importante presencia de la variedá mirandesa nel campu de los blogues, esplicando cómo internet ta ayudando al futuru de la llingua d’esta comarca portuguesa.

El papel del asturianu nes nueves tecnoloxíes de información y el conocimientu, tuvo a cargu del periodista Inaciu Galán, que faló de los riesgos y posibilidaes que supón la globalización pa les llingües minorizaes, pasando darréu a falar de la hestoria del asturianu nesti campu, dende les primeres esperiencies na rede al mundu de les redes sociales, pasando pola creación de webs, blogues, traductores y software llibre.

Francisco Castro, responsable de la editorial gallega Galaxia y reconocíu blogueru en gallegu, faló de la situación de la lliteratura gallega y de les esperiencies nueves que ta abriendo la so editorial cola publicación de llibros en llínia. Pa Castro “el futuru del gallegu ta na lusofonía”, esplicando como la situación del gallegu na rede yera aparentemente “ideal”, pero que na cai “nun ye asina, el pueblu gallegu da polo xeneral la espalda a la so llingua”.

El periodista mallorquín Sebastià Bennasar esplicó na so conferencia la situación de les dos llingües con menos falantes na península, l’aranés y l’aragonés, faciendo repás a la so situación nel campu de les nueves tecnoloxíes.

Anna Cortils, profesora de catalán na Universidá de Lisboa, esplicó la perbona situación del catalán nel campu de les nueves tecnoloxíes, onde ye una verdadera potencia nel ámbitu europeu y hasta mundial, destancando l’ésitcu del .cat y la gran cantidá de conteníos que pueden atopase na rede y nel campu del software cola opción d’usu del catalán.

Tolos autores participaron nuna mesa redonda posterior, na que, como nes conferencies, caún usó la so llingua, amosando les posibilidaes intercomunicatives de les llingües romániques. Nesta mesa hebo tiempu pa entrugues del públicu y propuestes de los conferenciantes alredor del futuru de les llingües minorizaes.

El congresu remató cola presentación de dos llibros en mirandés y la revista Capicua, qu’editen catalanes asitiaos en Lisboa col fin de servir de ponte ente la llingua y cultura catalanes y portugueses.

Semeyes del congresu

El Congresu Internacional: “As línguas não estatais e as novas tecnologias da informação e da comunicação” que se va celebrar n’Aveiro, Portugal, esti xueves 8 de marzu, va cuntar con representación asturiana. El periodista y presidente d’Iniciativa pol Asturianu, Inaciu Galán y González va dar llectura a la conferencia Una güeyada a la situación del asturianu nes TIC, dientro de les actividaes nes que participen periodistes y espertos en medios en llingües minorizaes catalanes, gallegos, portugueses, araneses y aragoneses.

Nel congresu toos ellos participarán nuna mesa redonda d’alderique alredor del tema central del conceyu, onde tamién se presentarán delles comunicaciones.

La conferencia d’Inaciu Galán va centrase en facer un repás a los riesgos de la globalización y les posibilidaes que les nueves tecnoloxíes abrieron pa la llingua asturiana, cola apaición de medios de comunicación dixitales, programes de software llibre, blogues, traductores, aplicaciones pa móvil y otres munches ferramientes tecnolóxiques qu’abrieron caminos nuevos pal asturianu.

Inaciu Galán y González (Xixón, 1986) tien trabayao en medios como la Cadena SER, Asturnews o la TPA, onde presenta’l programa Al aldu dende l’añu 2007. Dirixe la revista lliteraria Formientu y dende va poques selmanes ye’l presidente d’Iniciativa pol Asturianu, una organización de reivindicación llingüística.

Blogue del Congresu

La estaya de mocedá de la Xunta pola Defensa de la Llingua Asturiana, Xunta Moza, participó esti mes nun Alcuentru internacional de falantes de llingües minorizaes que se celebró na ciudá de Brest, Bretaña, ente los díes 10 y 12 de febreru. Nesti alcuentru intervineron falantes procedentes de Bretaña, Gales, Córcega, Galicia y Asturies. El colectivu organizador, Ai’ta, trabaya dende 2005 pola defensa y promoción de la llingua bretona.

Esti alcuentru surdió depués de los Alcuentros de mocedá falante de llingües minorizaes que se celebraron el pasáu mes de xunetu en Gasteiz, onde un garrapiellu de mocedá procedente de toos estos países y otros, ente les que tuvo una delegación de Xunta Moza, empecipió a poner les bases d’una rede internacional de persones esmolecíes pol grave retrocesu que tán sufriendo les sos llingües y que tien como fin promover y preservar la glotodiversidá y el multillingüismu.