Europa

La organización d’entidaes activistes na defensa de llingües llider n’Europa, European Language Equality Network, va axuntase a la so directiva en Valencia. La xunta del Comité Directivu va celebrase’l próximu sábadu 24 de mayu entamada nesta ocasión por Acció Cultural del País Valencia y axuntando a les principales organizaciones de defensa de les llingües rexonales o minoritaries de toa Europa, ente les ques’alcuentra Iniciativa pol Asturianu, entidá miembru de la organización.

Los alderiques van centrase na evolución de la Xunión Europea y de la Organización de les Naciones Xuníes pa les llingües rexonales o minoritaries , la ratificación francesa del ECRML, amás de los retos actuales qu’enfrenten les llingües de la península.

La xunta va llevase a cabu na mesma fecha que les elecciones europees nun momentu en que les comunidaes llingüístiques minoritaries s’enfrenten a problemes de puesta en peligru y discriminación. Un momentu nel que, acordies col entidá internacioanl el sofitu de la Xunión Europea pa estos idiomes llegó al so puntu más baxu. La rede, formada n’Estrasburgo en 2011, sustituyó a l’antigua Oficina Europea de Llingües Minoritaries (OELM) y güei representa 42 comunidaes llingüístiques de 23 estaos europeos. El so trabayu céntrase na promoción y protección menos utilizaes , rexonales, minoritaries d’Europa , y les llingües en peligru d’estinción, amás de trabayar pa la so revitalización.

“¿Qué pue facer Europa poles llingües minoritaries?: El casu asturianu” ye la conferencia qu’esti próximu sábadu 31 de Mayu , a les 12 del meudía na Casa de la Cultura de Nava, protagoniza la X Xornada de la Fundación Caveda y Nava.

A cargu de D. ALBERTO LÓPEZ BASAGUREN, miembru del Comité d’Espertos de la Carta Europea de Llingües Rexonales o Minoritaries (Conseyu d’Europa), la conferencia tará presentada por D. José Manuel Pérez Fernández, Profesor Titular de Derechu Alministrativu de la Universidá d’Uviéu.

Nel actu van intervenir el Presidente de la Fundación Caveda y Nava y les autoridaes presentes y n’acabando l’actu, habrá convidada con sidra na mesa villa.

La Universidá d’Uviéu y la Conseyería d’Educación, Cultura y Deporte, entamen la Xornada Trabayar n’Europa, na que se van tratar temes rellacionaes coles oportunidaes profesionales qu’Europa ufierta: trabayar n’instituciones europees, movilidá nel empléu, programes de Movilidá en Formación Profesional, Erasmus de práctiques n’empreses europees, ente otros.

La xornada va celebrase n’Uviéu’l próximu xueves 24 d’ochobre de 2013, nel Salón de Graos de la Facultá d’Economía y Empresa. Campus d’El Cristu, Avenida d’El Cristu s/n, Uviéu.

L’Asamblea francesa aprobaba ayeri xueves una propuesta de llei presentada por diputaos de la Unión por un Movimientu Popular (UMP) —y secundada pol Partíu Socialista, nel poder— que pon al día la llamada llei Lang de 1981. El so oxetivu ye evitar lo que los llibreros independientes consideren una competencia deslleal per parte de los xigantes del comerciu electrónicu, prohibiendo qu’empreses como Amazon, Fnac y similares puedan añedir, al descuentu legalmente autorizáu del 5% nel preciu del llibru, la gratuidá de los gastos d’unviada.

Esa práctica ye la del dumping o manipulación a la baxa del preciu del llibru, una práctica restrictiva de la competencia que taría afogando a munchos llibreros independientes yá apuraos pola crisis, sigún les editoriales y los medios de comunicación que pertenecen a emporios multinacionales, pero palos defensores del llibre comerciu nun ye sinon la competencia sana que fai que los precios s’axusten a la realidá y s’acabe col monopoliu de la cultura.

La propuesta, presentada primeramente na Cámara baxa del Parlamentu francés, contenía un solu artículu, que modificaba’l primer enunciáu de la llei de 1981 pa establecer que “la prestación de la entrega a casa nun puede ser incluyida nel preciu asina fitu”. Esto ye, que tien de ser facturada aparte pol comerciante. Una enmienda adoptada pol Gobiernu precisa que dicha torga nun sería aplicable si’l llibru “ye retiráu pol comprador nun puntu de vienta minorista de llibros”. Esto ye, según la versión actual del testu lexislativu, si’l consumidor tien d’averase a una llibrería a recoyer el so paquete de Amazon o de Fnac.com, entós sí ye llegal nun cobrar polos gastos d’unviada. Na realidá nun ye sinon una torga a la llibre competencia y a la meyoría del serviciu al cliente final, potenciando l’emplegu de intermediarios.

El testu tendrá de ser aldericáu nel Senáu antes de volver a l’Asamblea pa la so aprobación final. La ministra de Cultura, Aurélie Filipetti, denunció mientres l’alderique na Asamblea que Amazon practica “una estratexa de dumping, de vienta con perda”, según informen los medios galos.

El 18 de xunu pasáu, la Comisión de Cultura del Parllamentu européu aprobó un informe sobre diversidá llingüística realizáu pol diputáu corsu François Alfonsi. Depués d’un procesu d’enmiendes, el documentu aprobóse por unanimidá. Según l’Atles de les llingües del mundu en peligru de la UNESCO, l’asturianu ye ún de los idiomes europeos que ta nuna situación d’alerta encarnada. La Xunta pola Defensa de la Llingua Asturiana (XDLA) vien pidiendo dende hai años una política llingüística rigorosa, progresiva y evaluable que cumpla coles recomendaciones del Conseyu d’Europa sobre l’aplicación de la Carta Europea de les Llingües Minoritaries, qu’aconseyó yá en tres ocasiones a les autoridades asturianes un ameyoramientu del rangu llegal del nuestru idioma. Agora ye la Unión Europea, al traviés de la Comisión de Cultura, la qu’acaba d’aprobar un informe que recueye delles recomendaciones pa protexer la diversidá llingüística del Continente.

El documentu, que garra como base’l mesmu Tratáu de Lisboa y que recueye que la protección de la diversidá ye ún de los principios fundacionales de la Unión Europea, afirma que tolos idiomes del Continente son iguales en valir y dignidá porque reflexen la riqueza d’Europa. Por eso, l’informe pide a les autoridaes que sían más conscientes de l’amenaza grave que sufren munches llingües y que se comprometan coles polítiques pa preservar la diversidá cultural d’Europa, apoyando polítiques ambicioses de salvaguarda.

Asina, el testu diz qu’identificar nación y llingua única, o l’intentu d’establecer dinámiques de sustitución llingüística pa tratar d’implantar rexímenes monollingües ye un arcaísmu, una llimitación y una vulneración de los valores fundacionales de la Unión. La Comisión de Cultura fala de la importancia de revitalizar les llingües minoritaries al traviés del sistema educativu -cola educación preescolar y primaria como principal activu, amás de la formación pa los padres-; l’establecimientu de procedimientos d’evaluación; programes pa los medios de comunicación -cola posibilidá de crear y desarrollar emisores de radio y televisión-; y l’impulsu nes artes y en toles formes de la vida pública. De la mesma manera, recuerda’l papel importante de los medios de comunicación comunitarios pa salvaguardar y tresmitir estes llingües.

Too esto choca cola política llingüística del Executivu asturianu, que pon toles trabes posibles a que l’asturianu espoxigue nes escueles; obliga a RTPA a tener un porcentaxe d’emisión nel nuestru idioma perbaxo del 5%; y que ta afogando la industria cultural del país con recortes que medren añu tres añu y que tán dexando a munches persones na cai, mentes qu’invisibiliza l’idioma na so actividá pública. Otra manera, la Unión reconoz el papel de los medios de comunicación comunitarios, pero’l Gobiernu asturianu tien secuestrada la llicencia d’emisión de Radio Sele, lo que fai que la única emisora n’asturianu tea en peligru y pueda tener que dexard’emitir.

Por eso, la XDLA pide al Gobiernu d’Asturies que siga les recomendaciones de la Unión Europea pa la recuperación de les llingües en peligru. Estes estructúrense en tres exes: un estatus xurídicu afayadizu centráu nel reconocimientu de los derechos llingüísticos de los falantes; l’encargu de la so salvaguarda polos poderes públicos; y una política llingüística activa pa fomentar el conocimientu y usu de la llingua pola ciudadanía.

Proyectu d’Informe

Ixuxú elkartea edita un dossier pa visibilizar aspectos sociales y culturales asturianos nel País Vascu. La publicación axunta delles manifestaciones de la realidá d’Asturies y va espardise per infraestructures socioculturales vasques. Grupos folk, hiphop y rock, charres alrodiu estremaes temátiques culturales y sociales, proyecciones… too esto y más ta presente nel “dossier 2013 txostena”, una publicación editada por Ixuxú Asturies-Euskal Herria elkartea que recopila una muestra de la realidá social y cultural asturiana col oxetivu de dala a conocer per tol País Vascu.

Editáu en versión impresa y dixital, esti dossier va espardise per delles infraestructures vasques: dende gaztetxes hasta ayuntamientos, pasando per comisiones de fiestes, centros asturianos o festivales. D’esta mena, promocionaráse’l trabayu que tán faciendo los grupos de música presentes na publicación, naguando d’esti mou por cubrir les grandes carencies que tien la música asturiana pa salir fuera de les sos llendes.

Pero’l dossier va acullá del a música. También busca tender pontes culturales y texer redes de solidaridá ente los dos pueblos. D’esta miente, axuntando posibles charres, proyecciones y otres actividaes a desendolcar, nagua por visibilizar aspectos rellacionaos cola cultura, la llingua, los movimientos sociales, la hestoria, la música y la producción audiovisual asturiana. La misión final, como s’espón nel testu que da entamu al dossier, ye “visibilizar elementos d’una tierra vecina y cercana, pero al empar invisibilizada y estereotipada”.

Tamién hai que sorrayar qu’esti “dossier 2013 txostena” foi autoxestionáu dafechu per Ixuxú Asturies-Euskal Herria elkartea –daqué asemeyao a una estraoficial embaxada social y cultural asturiana nel País Vascu que nació en xineru de 2013-, cuntando pa ello col sofitu de les persones y grupos de música presentes nél.

Versión dixital del dossier

Roberto González-Quevedo, escritor, antropólogu y secretariu de l’Academia de la Llingua Asturiana foi nomáu va pocos meses presidentre de l’Asociación pa la defensa de les llingües y cultures europees amenazaes (ALCEM). Mañana Asturnews ufre una entrevista sobre esti nomamientu y sobre los planes de González-Quevedo pa esta organización europea.

Ta acabante conocese’l ñacimientu d’un nuevu proyectu d’espardimientu de la identidá d’Asturies fuera de les llendes del país. Ixuxú Asturies-Euskal Herria elkartea ñaz col oxetivu d’averar la realidá social y cultural al País Vascu y ser “un glayíu intercultural pa visibilizar aspectos de l’Asturies tantes vegaes invisibilizada y estereotipada”. Según esplica’l so impulsor, Xicu Ariza, “va dedicase a la cultura, sobremanera la música, y temátiques sociales hestoria, socioloxía, movimientos sociales…”. Estos son los dos pegoyos colo qu’Ariza define esta iniciativa. Al traviés d’ella, los sos promotores tamién busquen “cubrir les carencies que tien la infraestructura musical asturiana pa espardese per fuera’l país y fortalecer les rellaciones ente movimientos sociales de distintos ámbitos”.

Promoción de grupos, organización d’eventos, venta en llinia, distribución, managementy contratación, programación d’actividaes sociales o realización de talleres, son dalgunes de les actividaes qu’Ixuxú Asturies-Euskal Herria elkartea va desendolcar p’algamar los sos oxetivos de da-y puxu a la cultura, a la música y a aspectos sociales d’Asturies fuera de les llendes asturianes.

Pa francer los estereotipos y el desconocimientu xeneralizáu qu’hai de la realidá sociocultural asturiana nel País Vascu –entendiendo amás el País Vascu como tol territoriu onde se fala euskera; esto ye la Comunidá Autónoma Vasca, Navarra y el País Vascu francés-, Ixuxú parte del respetu ente pueblos y cultures y de la búsqueda por estrechar llazos y fomentar la interculturalidá. Un exemplu d’ello ye’l nome del proyectu, Ixuxú como soníu asturianu equivalente a lo que n’Euskal Herria ye un irrintzi.

Yá hai anuncia de les primeres actividaes. Tán desendolcando una campaña de promoción y difusión de “Mezigayuska”, l’últimu discu del grupu ska-fusión La Tarrancha. Tamién abrieron na so páxina web una tienda en llínia al traviés de la que venden dellos materiales musicales y sociales asturianos.

Con vistes al futuru, el próximu 2 de marzu se va cellebrar nel Gaztetxe de Gasteiz un alcuentru astur-vascu organizáu conxuntamente col Centru Social La Semiente de L’Entregu nel qu’habrá conciertos, charres, pasucais y mercadín de colectivos asturianos, ente otres coses.

Otru de los aspectos fundamentales nos que va trabayar Ixuxú Asturies-Euskal Herria elkartea ye na fechura d’un dossier que recopile grupos de música, actividaes culturales y sociales col fin de presentalu y ufiertalu peles bayuroses infraestructures culturales vasques: medios de comunicación, cases de cultura, gaztetxes, centros asturianos, festivales, comisiones de fiestes, etc. Dende esta iniciativa, faen un convite abiertu a tolos axentes que tean interesaos en participar nesti proyectu de puxu sociocultural d’Asturies.

Páxina web de la organización

El II Congresu d’Emigración Moza Asturiana n’Europa celebróse esta fin de selmana n’Alcobendas (Madrid), organizáu pol Conseyu Comunidáes Asturianes, l’Axencia d’Emigración y FICA con representantes d’emigrantes de tol estáu, Suiza y Bélxica. Nél alcordóse solicitar a la Conseyería de Presidencia’l fomentu de los cursos de formación en llingua asturiana mesmo en llínia, que presenciales, pasando a formar parte del Plan Estratéxicu d’Emigración 2013.

La institución con sede n’Estrasburgu acaba d’aprobar les recomendaciones al Estáu español del tercer informe sobre’l cumplimientu de la Carta Europea de les Llingües Minoritaries, onde se pide al Gobiernu asturianu que, en collaboración colos falantes, avance na protección llegal del asturianu.

Depués de que’l Comité d’Espertos del Conseyu d’Europa aprobara les recomendaciones al Estáu español del tercer informe sobre’l cumplimientu de la Carta Europea de les Llingües Minoritaries, onde se fala del asturianu y se recuerda qu’a pesar de les recomendaciones de los informes anteriores tovía nun se declaró como llingua oficial, la Xunta pola Defensa de la Llingua Asturiana (XDLA) pide al Gobiernu d’Asturies y a la Xunta Xeneral que tomen nota y que faigan dalgún pronunciamientu sobre les recomendaciones que-yos faen les instituciones europees. Asina, la organización entiende que nestos cuatro años que pasaron desque se publicara’l segundu informe nun se dieron pasos alantre, porque güei, como nel 2008, el Conseyu d’Europa recomienda avanzar nel reconocimientu llegal del nuestru idioma. La XDLA compara l’actitú del Conseyu d’Europa hacia la política llingüística del País Vascu cola d’Asturies: mentes qu’al Executivu socialista de Patxi López lu emponderen dende Estrasburgu y lu ponen como modelu a siguir nel ámbitu español, el Gobiernu d’Asturies, tamién en manes del PSOE, recibe un tirón d’oreyes por nun dar pasos alantre col reconocimientu de los derechos llingüísticos de los falantes. Mesmamente, al lleer l’infome pue vese cómo en política llingüística tamos dando pasos atrás cola sida de la crisis económica.

Asina, a pesar de criticar la falta d’avances llegales, el Conseyu d’Europa diz que l’Alministración asturiana tien un «compromisu de munchos años» na promoción del idioma, y ponen pa ello como exemplu les llinies de subvenciones pa la normalización. Sicasí, hai que recordar qu’esti añu’l Gobiernu recortó en más d’un 60% estes ayudes, dalgo que pue suponer el fin de la industria cultural n’asturianu, un sector que yá ta mui mermáu pola crisis y pal qu’esta mengua pue suponer la reducción de puestos de trabayu, sía por despidos o porque ciarren empreses.

La normalización nos conceyos

Otra manera, l’informe tamién señala ente lo positivu los 18 Servicios de Normalización Llingüística (SNL) que funcionaben n’Asturies nel momentu d’ellaboración del informe. Sicasí, en cuenta d’avanzar hacia alantre nesi sentíu fomos p’atrás, porque agora hai 14 abiertos, y la verdá ye que nunca llegó a haber 18, polo qu’entendemos que esi númberu salió d’un tracamundiu o de la mala fe de los datos apurríos pol Gobiernu. Too ello muestra la falta d’avances y la precariedá de tolo que tien que ver col idioma, dalgo colo que dende’l Gobiernu asturianu se xuega dende hai años, pa facer coses ensin da-yos estabilidá y visibilidá, nun xuegu onde pareza que se fai mentes qu’en realidá nun se fai. Tamién ye de reseñar que’l Conseyu d’Europa avale los 180.000 euros que recibieron estos servicios nel 2008, xusto cuando’l BOPA del 24 d’ochobre publicó una mengua nestes subvenciones de 15.700 euros, dexando a los SNL con 76.700 euros, una cifra que queda mui lloñe de la del 2008 qu’avala l’informe européu.

Medios de comunicación

Per otru llau, el Gobiernu asturianu informó al Conseyu d’Europa de la presencia del asturianu al traviés de cinco programes na TPA y más de diez na RPA, «con audiencia alta». Sicasí, a pesar d’esa audiencia alta de la que fala’l Gobiernu, cuatro años depués, en cuenta de medrar, esa presencia ye asemeyada na televisión, nun porcentaxe que queda nel 2%, mentes que na radio l’asturianu desapareció dafechu. Otra manera, al respective a los medios de comunicación, l’informe fala d’un periódicu selmanal n’asturianu y del on-line de la RTPA. Sicasí, estos dos exemplos, Les Noticies y la Estaya d’Asturianu de la RTPA, yá nun existen y dende’l Gobiernu asturianu, en cuenta de reaccionar y ayudar a la prensa n’asturianu, decidió rebaxar les subvenciones a los medios pol usu del asturianu cuasi un terciu en comparanza cola cantidá cola que contaron nel 2011. Too ello mentes que l’asturianu sigue vetao en TPA nos informativos, nos deportes y nos espacios infantiles.

L’asturianu na educación

Sobre’l sistema educativu, l’informe muestra lo que por toos ye sabío –tamién pol Gobiernu asturianu–: qu’ensin el reconocimientu de la Especialidá pal Profesoráu de Llingua Asturiana, l’asignatura queda estancada y nuna situación de precariedá. Tamién fala l’informe de los mínimos d’alumnos que s’esixen pa dar l’asignatura, dalgo que’l Tribunal Superior de Xusticia d’Asturies declaró como illegal. Sicasí, dende la Conseyería d’Educación nun se tomó nenguna midida pa cumplir cola sentencia.

Otra manera, ente lo positivo, l’informe tamién fala de la puesta en marcha d’una Unidá de Traducción, «que permite a tolos ciudadanos presentar documentos n’asturianu». Sicasí, la XDLA quier recordar qu’esta midida, que tendría que valir pa facer cumplir cola Llei d’Usu de 1998, llogróse gracies a les denuncies énte los tribunales y nun salió motu proprio del Gobiernu asturianu. Amás convirtióse nuna unidá pantasma, que nun funciona. Polo que parez, l’Executivu autonómicu viende como iniciatives propies avances na normalización que se llograron gracies al trabayu del movimientu de reivindicación, avances que tuvimos que dir arrampuñando cola fuercia de la llucha social y xurídica.

P’acabar, la organización recuerda que l’informe européu diz que’l Gobiernu nun volvió a facilitar datos sobre’l númberu de falantes que tien el nuestru idioma, cuando existen estudios sociollingüísticos sobre Asturies que muestren que nel 2002 existía un 20% de falantes y que’l 60% de la población taba a favor de la oficialidá, colo que los asturianos tán d’alcuerdu col pidimientu del Conseyu d’Europa d’avanzar nel marcu llegal del asturianu. Que’l Gobiernu nun apurra estos datos a Estrasburgo muestra l’interés en esconder la realidá y l’espaciu social que tien l’asturianu dientro de la nuestra socialidá. Otra manera, la XDLA recuerda que los datos sociollingüísticos son d’hai una década, polo que fadría falta otru estudiu sociollingüísticu que permitiera que, pal cuartu informe, el Conseyu d’Europa contara colos datos más afayadizos. Sicasí, si la falta de política llingüística sigue siendo la llinia del Gobiernu asturianu, ensin falta de más estudios nun ye difícil suponer que’l nuestru idioma va camín de la desaparición y la responsabilidá d’esa catástrofe cultural va tener nomes y apellíos.