Europa

L’ALLA unvia al Conseyu d’Europa les sos observaciones sobro’l cumplimientu de la Carta Europea de les Llingües Minoritaries nun documentu de quince páxines.

Nél, la institución revisa’l conteníu del borrador del “Tercer Informe sobro’l cumplimientu n’España de la Carta Europea de les llingües minoritaries del Conseyu d’Europa (2006-2009)” no que cinca a la situación de la llingua asturiana.

La revisión, documentada y argumentada dafechu, céntrase sobre too, arriendes de nel llabor de la propia institución, n’ámbitos como los de la vida alministrativa, el sistema educativu y los medios de comunicación.

L’Academia, en tou casu, sorraya les dificultaes que pal usu del asturianu nestos ámbitos remanecen de la falta d’oficialidá del idioma propiu d’Asturies.

La Presidenta de l’Academia de la Llingua Asturiana (ALLA) treslladará güei, 7 de xunetu al Comité d’Espertos les observaciones y propuestes que la institución llingüística xulga como más afayadices p’axustar a la situación real d’Asturies nel “Tercer Informe sobro’l Cumplimientu n’España de la Carta de les Llingües Rexonales o Minoritaries del Conceyu d’Europa (2006-2009)”.

L’Asociación Cultural N’Ast denunció al traviés d’un comunicáu l’ausencia del asturianu nun proyectu sobre fechu en llingües minoritaries de los países pelos que pasa’l Camín de Santiago. Nél tán presentes el bretón, l’occitanu, el vascu, l’aragonés y el gallegu, pero non l’asturianu. En ‘Camín de les cultures y les llingües’ participen l’Euskarabidea (Institutu Navarru del Vascu), la Secretaría Xeral de Política Lingüística de la Xunta de Galicia, Ofis ar Brezhoneg (Oficina de la Llingua Bretona), Academia de l’Aragonés, la Christian-Albrechts-Universitaet zu Kiel (Schleswig-Holstein, Alemaña) y Euroccat (Eurocongresu 2000 de los países occitanos y catalanes), y ta financiáu pola Axencia de la Cultura de la Comisión Europea.

L’oxetivu de la campaña ye promocionar les llingües minoritaries de los países pelos que pasa’l Camín de Santiago y ente les sos actividaes previstes tán la puesta en marcha d’una web multillingüe y una esposición itineraria que va tener la so primer parada n’Orreaga/Roncesvalles del 11 al 31 de xunetu.

Amás, va celebrase un congresu nel mes d’ochobre en Santiago baxo’l títulu ‘Europa nes sos llingües y cultures’, na que van participar representantes de les entidaes públiques y privaes que trabayen na promoción de les llingües minoritaries de los territorios per onde pasa’l Camín.

N’Ast valora de forma positiva “esti proyeutu nel sentíu en que reivindica la esistencia d’una Europa cultural y llingüísticamente diversa acullá de los estaos anguañu esistentes, poniendo amás de relieve la importancia histórica del Camín de Santiago comu canal de comunicación y exa vertebradora de la Europa occidental” y destaca que “per primer vegada” vaya ser utilizada la Propuesta Ortográfica del Estudiu de Filoloxía Aragonesa con proyeición internacional. Por contra, critiquen l’ausencia del asturianu dientru d’esti proyeutu, lo que rellacionen al “despreciu institucionalizáu y la voluntá de marxinación de la castra que gobernó Asturies a lo llargo d’estos trenta años últimos hacia tolos trazos específicos de la identidá asturiana”.

L’Asociación Cultural Youropía busca mozos de 15 a 17 años pa participar nun intercambiu xuvenil en Polonia. Les feches van del 23 al 30 de xunu y va celebrase en Cracovia y Zacopane. La temática ye la comunicación más allá del idioma. Esti proyectu ta financiáu por Mocedá n’Acción y les persones que vaigan tienen pagáu’l 70% del viaxe, teniendo de pagar namás el 30% del mesmu.

Acéptense propuestes hasta’l llunes 6 de xunu. Los interesaos tienen d’unviar los sos datos personales y una pequena carta de motivación de porqué tán interesaos al corréu: youropia@gmail.com

Más información nel teléfonu 638478466 y na páxina www.youropia.jimdo.com

El periódicu catalán La Vanguardia va cuntar con un edición en catalán de magar el mes de mayu, según anunció’l so editor, Javier Godó, la salida de la edición catalana del rotativu coincide col 130 aniversariu del ñacimientu del periódicu, editáu dende 1881 en Barcelona.

La Vanguardia súmase asina a los decenes de diarios que s’espublicen cada día en catalán en tol dominiu llingüísticu d’esta llingua, compartiendo con “El Periódico de Catalunya”, la fórmula d’asoleyar dos ediciones, una en cada llingua.

La dirección de La Vanguardia quier convertir la edición nun “gran diariu européu en catalán, ensin dexar de selo por ello en castellán”. La edición dixital va tar tamién nes dos llingües a partir de mayu.

L’Alcaldesa de Xixón, Paz Fernández Felgueroso, el Conceyal de Cultura Tradicional y Llingua Asturiana, Jesús Montes Estrada y la Directora Xeneral de Política Llingüística d’Asturies, Consuelo Vega, anunciaron esti llunes xunto a un representante de la fundación organizadora del Festival Liet Internacional, qu’esti eventu musical va celebrase nel conceyu de Xixón na so edición de 2012.

El Festival celebráse esti añu n’Italia y va percorriendo los estremaos países europeos onde se falen llingües minorizaes. Asturies escoyó esti sábadu al so representante pa la edición d’esti añu, Skama la Rede.

El Parllamentu Européu y la Fundación del Premiu Internacional Carlomagnu d’Aquisgrán conviden a los mozos de tolos Estaos miembros de la UE a participar nun concursu sobre’l desenrrollu de la UE, la integración y temes rellacionaes cola identidá europea.

Los premios son de 5.000, 3.000 y 2.000 euros respectivamente, concediéndose a proyectos que promuevan la integración y faciliten la comprensión ente los distintos pueblos d’Europa.

Pueden optar a él mozos d’ente 16 y 30 años ciudadanos d’unos los 27 Estaos miembros de la Unión Europea. Los proyectos escoyíos suelen ser programes d’intercambiu ente mozos, proyectos artísticos o d’Internet que tengan una dimensión europea. El plazu de presentación amplióse hasta’l 14 de febreru.

Francia ruempe la so tradicional fama d’estáu centralista y va llevar a la edición d’Eurovisión d’esti añu, que va celebrase en Düsseldorf (Alemaña), un cantar en corsu, llingua reconocida nel llistáu de “Llingües de Francia” y que tamién se fala nel territoriu anguaño italianu de la Toscana. L’escoyíu de forma interna pola canal francesa France 3 ye’l tenor Amaury Vassili, de 21 años. Ye la primer vegada que la llingua corsa va sentise n’Eurovisión.

France 3 anunció nun comunicáu qu’esti artista ye “unu de los tenores más mozos del mundu”. Sobre l’idioma escoyíu, la canal diz que se busca “amosa sobre unu de los mayores escenarios d’Europa, les llingües rexonales qu’arriquecen el nuesu país”.

Mientres nel Estáu español una serie de gales siguen buscando al representante de TVE, ensin qu’en nenguna ocasión fuera nengún cantar n’otra llingua que nun fuera’l castellán, sacante dellos trozos del cantar n’inglés o francés, pero nunca n’asturianu, catalán o vascu.

La llingua catalana, por embargu, yá tuvo n’Eurovisión, anque lo fizo de la mano d’Andorra, que como estáu soberanu participó nel festival en seis ocasiones, hasta qu’en 2010 los problemes económicos del Principáu impidieron la so participación. En 2006, Jennifer Serrano, cantante asturiana ñacida en Mieres, participó por esti país col cantar en catalán “Sense Tu”.

La Oficina de Movilidá Xuvenil Internacional del Conceyu d’Avilés (Europa Equí) entama a partir del vienres 7 de xineru y mientres tolos vienres, a les 17:00 hores, dellos talleres de llingües.

Como novedá, empieza un grupu de conversación en francés que se va axuntar tolos vienres a les 18:00 hores. Pa participar ha mandase un corréu a europaqui@gmail.com

Amás, el vienres día 7 de xineru a les 19:00 hores nel Edificiu Fueru, na Avenida Fernando Morán, 26, d’Avilés, organicen una xunta informativa.

El XXIV Conceyu Internacional d’ICOS sobre Ciencies Onomástiques fadráse en Barcelona del 5 al 9 de setiembre de 2011. L’Academia de la Llingua Asturiana sofita y amiéstase al referíu conceyu como institución participante y, darréu d’ello, tolos académicos tendrán un descuentu del 10% na inscripción del mesmu. El plazu de presentación de resúmenes pa los que quieran presentar una comunicación pieslla’l 31 de xineru de 2011.

Más información sobre’l congresu