Entrevista de la selmana

César García Santiago (Grau, 1979) ye maestru de formación, pero la so vocación dende bien mozu ye la de ser editor. Collaborador en medios de comunicación, Moscón d’Oru y premiu Moscones en Xixón de periodismu, en 2007 creó la editorial La Cruz de Grau y espublizó dende entós una llarga y variada llista d’obres d’estremaos xéneros. Fálamos con él de l’actividá de la so editorial y del momentu que vive la edición n’Asturies.

-¿Cómo surde’l so interés pol mundu editorial?

-L’interés surde al descubrir con dieciséis años la Gran Enciclopedia Asturiana del editor Silverio Cañada. Too entamó gracies al exemplu de trabayu d’esti xixonés que llogró llanzar en trenta años alredor de 2.000 títulos.

-¿Ye un negociu ser editor güei n’Asturies?

-Más qu’un negociu ye una forma de vida. Nel mio casu paso tol día pensando no que puedo facer. Un llibru d’esto y otru d’esto otro. Al ser editor autónomu tolos problemes créeslo tu na tiesta y tienes que tener muncha paciencia pa salir alantre.

-¿Cómo vive la crisis una editorial pequeña, adáptase meyor que les grandes o páslo peor?

-La situación que vivimos ye complicada nun hai dulda nenguna. Hai que tener fe y siguir lluchando pa salir alantre. La cultura yá sabemos que n’estos tiempos ye la perxudicada pero con voluntá ya ilusión vamos salir a flote.

-¿Plantégase la edición de llibros en formatu dixital?

-A día de güei, de momentu non. Esti tipu d’obres son una vía nueva de negociu y nun futuru hai que s’adaptar a los tiempos nuevos. Pero soi de los que barrunta que’l papel nunca nun morrerá porque tien una serie de cualidaes y de sensaciones indescriptibles.

-Lleva dende 2007 asoleyando obres de tou tipu, ¿de cuáles se siente más arguyosu?

-Ye complicao escoyer unu de los llibros pero hai dos que me faen muncha ilusión: “Patrimonio olvidado: hórreos y paneras del conceyu Grau” del bibliotecariu moscón Gustavo Adolfo Fernández y l’últimu qu’edité: “Historia de cinco goles. El Mundial de El Guaje” del periodista y escritor Paco Álvarez. El llibru d’horros tien un gran valor y foi un apueste tremendu pola recuperación nel nuesu conceyu y un llabor mui meritoriu de Gustavo. La obra ta incluyida na colección de temes de Grau que ye unu de los grandes oxetivos que me plantegué cuando entamé n’esta aventura d’editar.

No que cinca al llibru de Paco ye un homenaxe a David Villa “El Guah.e” al traviés de les sos cróniques y una galería d’imáxenes cedíes por fotográfos d’El Comercio. Toi mui agradecíu tanto a Paco por esti trabayu tán guapu como al periódicu pol so sofitu pa qu’esta edición se llevara a bon puertu.

-¿En qué proyectos trabaya nesti momentu?

-Agora mesmu, enantes de que remate l’añu, sacaré trés llibros “Fotos antiguas de San Juan de Villapañada (Grau)” d’Álvaro Valdés, “Historia del Fútbol Trubieco” de Valentín Álvarez y “Crónica social de Gijón” de Teté F. Balseiro.

-Asoleyó publicaciones n’asturianu y en castellán, ¿ónde atopa más dificultaes p’atopar apoyos?

-Más dificultaes n’asturianu. Ye complicao abrise camín y atrayer a los llectores. Mércase poco y por eso necesítase la sovención pa sacar más o menos ediciones alantre. Hai que siguir lluchando por él.

-La so editorial forma parte del Gremiu d’Editores Asturianos, ¿en qué ayuda una iniciativa como esta a la industria editorial?

-La oportunidá que me brindó Marta Magadán en xineru de 2008 de pertenecer al Gremiu foi una gran ayuda porque tienes la posibilidá de que les tos obres se puedan ver en distintes feries a nivel estatal (Madrid, Navarra, Valladolid, Lleón….) y al pertenecer al Gremiu d’Editores d’España. Toles ayudes son necesaries pa intentar facelo lo meyor posible y que les tos obres presten a los llectores. Va unos díes comunicábame l’actual presidenta, Ángela Sánchez Vallina, d’Editorial Pintar-Pintar, el nuevu retu al que me voi enfrentar de ser secretariu-tesoreru del Gremiu y tengo muncha ilusión n’ayudar tolo posible pa que salgamos alantre n’estos momentos duros.

-¿Nun hai una cantidá demasiao grande d’editoriales n’Asturies?

-En rellación a los habitantes, sí, somos munches. La llectura positiva ye que son de calter bayurosu. Agremiaes somos venit. Lo importante ye que s’editen coses mui guapes n’esta tierra y dende les alministraciones ye necesario que se mos apoye más. Una de les cuestiones interesantes y que s’han respetar ye la merca d’exemplares pa dotar les biblioteques de la Comunidá. Na tierra hai muncho potencial y ye necesario mimalu y cuidalu.

-Grau, el so conceyu, ye centru de munchos de los sos trabayos y foi reconocíu como “Moscón d’Oru” y premiu Moscones en Xixón de periodismu, ¿siéntese profeta na so tierra?

-La verdá ye que ye mui emcionante que te dean un premiu como’l Moscón d’Oru con venti años por un llabor que nun yera normal en xente mozo como ye la recuperación de semeyes antigües y documentos y la edición d’un llibru. Ye mui prestoso que los tos paisanos t’aprecien polo que-yos toi peragradecíu. L’apoyu de la to xente ye lo máximo que te puede pasar n’esta vida.

Xurde Morán (Xixón, 1967) ye ún de los periodistes más conocíos d’Asturies y trabaya n’asturianu, mesmo na radio, na Cadena Ser, que nel so programa de Canal 10, “L’andariegu”, que ye continuación del que tuviere dende 1998 na desapaecida TeleXixón. Güei, vienres 8 d’ochobre, a les siete y media, nel salón d’actos del Centru Integráu del barriu L’Arena van entrega-y un premiu a la so carrera, el ‘Pegoyu asturianu’ de Luces de la Ciudad. Amás, él mesmu va dar llectura a la conferencia “Programes televisivos percorriendo Asturies (1998-2010) y dalgo más; de Puente Roces a Bruseles”. Falamos con él de la so carrera como profesional de los medios.

-¿Cómo recibe esti premiu?

-Un poco esmolecíu, la vitrina de les copes y los trofeos yá ta hasta l’alma. Nun se ónde voi poner esti, quiciabes nuna balda la biblioteca pero igual me cai embaxo al dir sacar dalgún llibru. Toi pensando na mesuca la entrada, onde se dexen lo llaveros, que ye onde más se ve… pero bien, dexando de llau esti enguedeyu (rises), con muncha satisfacción polo que siempre representa un premiu y más viniendo d’unes persones y una entidá que se caractericen pol so trabayu de promoción de Xixón y de tolo asturiano, siempre col “motor” que representa pa too esto’l llabor de xente como Gonzalo Mieres.

-¿Qué va cuntanos esta tarde na conferencia programada na entrega del “Pegoyu asturianu”?

-La hestoria de 12 años de programes de televisión, primero con Caminos y Rondes en TLG y agora con L’Andariegu en Canal10tv. Tamién d’espacios qu’entamaron anantes y que fueron de dalguna manera l’orixen del programa. Dalgunes anécdotes y tamién delles cosuques de la radio, onde entamé primero tovía que na tele, hai yá más de 15 años. Una aventura q’arrancó peles caleyes de Deva y les rondes de Puente Roces y que yá nos llevó hasta Bruseles y Waterloo. El mundu nun tien portielles.

-Premios, reconocimientos y na rede, hasta un club de fans con cerca de 1000 miembros, ¿presta vese reconocíu?

-Home, pa qué vamos negalo. Nun ye namás a nivel personal, ye demostrar que facer coses nos medios de comunicación n’asturianu, y vivir n’asturianu puede dexar de ser un “apostoláu” o una heroicidá pa ser cenciellamente una manera más d’espresión, vida y trabayu. Eso ye la normalización. 

-¿Ónde-y presta más trabayar, na radio o na televisión?

-Son dos brazos d’un mesmu cuerpu nesti momentu pa min, nun puedo escoyer. De toles maneres reconozo que’l poder de la imaxe, en cualquier llingua, y de la imaxe televisiva en concretu, ye fundamental, anque llévame munchu más trabayu, por eso, tas trabayando con un sentíu más, el de la vista y na tele soi’l máximu responsable que’l programa salga bien. Na radio tengo la espalda cubierta cola presentadora del Hoy por Hoy Xixón, Paloma Llanos, que lleva’l pesu del programa, tengo más tiempu pa tomar cafetinos y toi lo más del tiempu sentáu nel sillonín, esa ye la prestosa diferencia. Pero recalco, tele y radio son como les dos piernes d’un andayón, si para una tol paisanu puede cayer…o parar, anque siempre hai tiempu deprender andar coxicando o con pata palu, estilu “pirata” (rises).

-El periodismu fechu n’asturianu ye tovía güei una rareza, ¿cambió muncho esta situación dende qu’entamó con “Caminos y Rondas” en 1996?

-Pa min nun ye una rareza, quiciabes hai falta de “continuidá” de munchos espacios que duren namás una temporada. Pero nestos años demostróse, con esti y otros programes, que l’asturianu nun ta pa nada reñíu cola audiencia, ye más, ayuda a tener audiencia.

-Ente “Caminos y Rondas” y “L’andariegu”, ¿cuántos programes lleva fechos?

-En televisión, en total, alredor de 640…

-¿Quéden-y munchos conceyos por percorrer?

-Cásique que toos, ten en cuenta que vamos casa per casa talmente… por proximidá xeográfica y por compatibilizar radio y tele suelo dir más a los del “centru” más o menos la llínia ente Cuideiru y Caravia. Nes “ales” fici coses, pero menos, ye una asignatura pendiente que nun dexen de recordame vecinos d’esos conceyos que me los alcuentro tolos díes pela cai. En fin, too s’andará. Tampoco nun ye raro atopar xente que me plantee dir al so pueblu en Galicia o Cantabria, tamién los lleoneses, y por supuestu ver si algún día puedo dir a la “emigración”. Frutu d’esta última collaboración fueron los programes en Bélxica y Waterloo hai dos años, dieron munchu trabayu pero al final pudo facese. Por eso digo que…”too s’andará”.

-¿Nun sedría más fácil “pasase” al periodismu en castellán dende’l puntu de vista profesional?

-A estes altures de la película paezme que nun diba ser creíble. Nun diba ser fácil, al contrariu, a min siempres me pidieron coses n’asturianu. Pero coses en castellán tamién faigo cuando me les piden, dalguna collaboración a nivel estatal…o “mundial” como l’encargu d’Eliseo Mauas Pinto d’un anecdotariu del Camín de Santiago Primitivu ente Asturies y Galicia pal grupu Facebook “Amigos Celtas”, pongamos por casu, o grabar dalguna cuña publicitaria (rises).

-¿Qué-y paez la presencia que tien l’asturianu nos medios públicos?

-Escasísima pa ser unos medios públicos, testimonial más bien, y más agora que, recalco, demostróse que’l problema nun ye l’audiencia, el problema ta nel interior de delles mentes, problema más bien que pertenez al ámbitu personal del que-y sigue negando al asturianu una presencia minimamente normal nuna sociedá democrática.

-Conoz de cerca los medios privaos, ¿viendo l’ésitu de la programación n’asturianu, por qué nun faen más espacios na nuesa llingua?

-Nun vamos negar qu’aparte prexuicios que tovía delles persones puedan tener hai otros factores. Hai poca xente o los qu’hai tienen otres ocupaciones y trabayos que nun-yos permiten “desembarcar” con continuidá nos medios de comunicación faciéndose cargu de dalgún espaciu o programa. Tampoco ta garantizáu’l futuru llaboral, pero en fin, nesti momentu, eso pasa tamién n’otros munchos oficios. Tamién depender escesivamente d’ayudes, pero esto último ye un problema que tienen n’Asturies munchísimes iniciatives de tolos ámbitos, igual les más d’elles, sobremanera nel mundu la cultura, pero tamién les obres públiques, el mundu del espectáculu, les empreses, etc. etc. etc. nun ye un asuntu namás del “asturianu”.

-¿Qué proyectos-y prestaría llevar alantre na radio o la televisión que nun ficiere hasta agora?

-¿Más proyectos?. Yo lo que quiero ye tener más tiempu pa descansar y pa folgar, pa dir de viaxe al Caribe o a Les Chimbambes; de momentu nun puedo abarcar más proyectos, pa ello tendría que fundar una multinacional pero cola que ta cayendo nun se me revela que seya’l momentu más afayadizu (rises).

-Siempres se fala del so modelu llingüísticu como ún de los más naturales y cercanos al públicu, ¿qué ferramientes llingüístiques eches en falta nel to llabor periodísticu n’asturianu?

-Un diccionariu potente de sinónimos y antónimos n’asturianu pa trabayar a gustu cuando nun atopes les pallabres.

L’asociación Asturianos en Bruxeles (ASBRU) ñació en 2005 na capital d’Europa col envís d’axuntar a la nueva fornada d’asturianos emigraos a la capital flamenca. Cinco años más tarde cunten con más de 400 socios y celebren l’aniversariu con una esposición onde van tar les imáxenes más significatives d’esti tiempu, una amuesa colos trabayos del diseñador gráficu uvieín Moncho Sejas y una espicha que se celebra güei en Bélxica. A poques hores d’estos actos falamos con Ángela Iglesias, presidenta d’ASBRU sobre estos actos y sobre la situación de la emigración asturiana.

-El balance ye positivu. Consiguimos llevar a cabu munches de les iniciatives que teníamos en mente, anque non toes pola mor en munchos casos de la falta de financiación. Notemos dende’l principiu’l sofitu de la xente, un sofitu que se caltuvo y que foi creciendo a lo llargo d’esti tiempu, y que ye lo que mos anima a siguir alantre con esti proyectu tan ilusionante que ye ASBRU. Y consiguimos dar na capital d’Europa la imaxe de la nuesa rexón que queríamos dar. El balance ye, pues, totalmente positivu.

-Toes y caúna de les actividaes qu’entamamos nestos cinco años fueron bien importantes pa nós, realizámosles porque creíemos nelles y porque consideramos que tenía un sentíu presentales nuna ciudá tan multicultural como ye Bruxeles. Si he de destacar dalguna, mentaría’l Ciclu de Curtios y Documentales Asturianos, que ye una actividá que yá ta dafechu consolidada yá que el próximu mes de noviembre va tener llugar yá’l so 5° edición, o les Xornaes Gastronómiques, a les que traximos a dellos de los meyores xefs que tenemos nesti momentu n’Asturies. Y como actividá especialmente entrañable pa nós nun puedo dexar de destacar la llectura poética d’Antonio Gamoneda en mayu de 2007, tan solo un mes dempués de se-y concedíu’l Premiu Cervantes.

-Dos actividad bien queríes por nós tuvieron, efectivamente, como protagonista a la llingua asturiana: la primera de toes, cola qu’arrincamos, que foi l’alcuentru lliterariu protagonizáu ente otros por Xuan Bello, y la nueche dedicada al Monólogu Modernu. Les dos fueron perbién recibíes tantu polos asturianos que viven en Bruseles, como, y esto ye bien importante pa ASBRU, polos españoles d’otres procedencies interesaos por averase a la nuesa cultura.

-Más que necesariu yo diría que la ñacencia d’ASBRU foi perfectamente compatible cola actividá desenvuelta a lo llargo de tantos años por estos dos centros que mentes. Nós entendimos qu’había otres maneres, nin meyores nin peores, sinón distintes de faer asturianía y que Bruxeles mos apurría l’espaciu precisu pa ello. La prueba de que nun equivocábamos ye que, en cinco años d’andadura, ASBRU yá cunta con más de 400 socios.

-Nun creo que se deba falar de xeneralidaes sinón de casos concretos. Nel nuesu casu tengo que dicir que cuando nació ASBRU sentímonos dafechu sofitaos pel Centru Asturianu de Bruseles, llegando inclusive, nos primeros tiempos, a entamar actividaes conxuntamente.

-Sería inxusta si dixera que non, una y bones l’únicu sofitu económicu que tuvo hasta’l momentu ASBRU pa llevar a cabu les sos actividaes vieno del Principáu y, más concretamente, de l’Axencia Asturiana d’Emigración, que dende’l principiu túvonos en cuenta. Pero ye cierto que ye una ayuda que de cutiu resultónos escasa, habida cuenta del altu nivel de les actividaes qu’entamamos y de la repercusión que tien lo que facemos. Inclusive hubo casos nos que saquemos alantre actividaes ensin sofitu financieru de nengún tipu, poniendo perres del nuesu bolsu, porque creíemos nelles y porque mos pruye compartiles cola xente de Bruseles. Ye’l casu de la conferencia del escritor xixonés Ricardo Menéndez Salmón, qu’entamamos el pasáu mes de mayu.

-¿Qué acoyida tienen actos como’l Ciclu de Curtios y Documentales Asturianos o les Xornaes Gastronómiques, que comentabes tán yá consolidaes?

-Bien bona. Son éstes, concretamente, dos actividad que la xente yá ta esperando y poles que nos preguntar regularmente. Por falta de sofitu económicu nun pudimos entamar anguaño les Xornaes Gastronómiques y cuando se diba averando la fecha na que solíemos faceles (finales de xunu) fueron munches les persones que mos llamaron o mos escribieron pa preguntar cuándo s’abría’l plazu d’inscripción.

-Por tolo qu’espliqué enantes, ASBRU ye una asociación que vive al día. Cada añu qu’empieza xuntámonos y cada miembru de la Xunta Directiva vien con una ilusión, con un suañu, con un proyectu que-y gustaría realizar. Dacuando puédese, dacuando non… Pero lo que sigo que puedo dicir ye que si daqué nun sal nun va ser porque nun lo intentáremos. Somos bien lluchadores y bien testeronos (rises). Daqué qu’entá nun ficimos y que mos gustaría entamar un día ye un conciertu de los nuevos talentos asturianos nuna d’eses sales de conciertos tan estupendes que tien Bruseles. Vamos ver…

-Arrincar nunca ye cenciello, fai falta entusiasmu enforma, muncha enerxía, abondo compañerismu. Agora, yo creo que si hai una ciudá predispuesta a acoyer iniciatives nueves, con una sociedá abierta a conocer otres cultures, a interesase polo que vien de fuera, ésa ye Bruxeles. Una parte del ésitu del nuesu proyectu debémos-yla, ensin dulda, a la estupenda ciudá na que vivimos.

-Ye que ¡somos toos tan distintos! Cuesta falar de «la nueva emigración» en términos xenerales y absolutos. Rescampla que pertenecemos a una xeneración que nun atopó n’Asturies nel so momentu les oportunidaes llaborales que consideraba acordies cola so preparación. Esto ye un fechu. Y por eso unos colaron pa Madrid, otros a Londres, otros pa Nueva York y otros a Bruseles. Unos faen tolo posible por tornar, con mayor o menor ésitu, y otros cuéyen-y el gustu a otra manera de vivir, a otros horizontes profesionales y personales, al ser d’equí y ser d’ellí… No que yo creo que toos somos iguales, non yá los integrantes de «la nueva emigración» sinón tolos emigrantes de toles nacionalidaes y de toles dómines, ye que naide marchó nunca de la so tierra col enfotu de nun volver a vivir nella.

El dibuxante y periodista Enrique Carballeira (L’Infiestu, 1970) ta acabante asoleyar una edición nueva de “Xilu tien mieu a la nueche”, con dos peculiaridaes, faise como llibru lletrónicu y tornáu al inglés. Carballeira trabaya en dellos medios de comunicación como periodista y dibuxante de tires, escribe cuentos y dirixe la editorial Asturtoons, qu’edita cada añu novedaes empobinaes a los más pequeños. Al mesmu públicu tán dirixíes les Xornaes de Lliteratura Infantil de Piloña y otres actividaes qu’entama, siempres comprometíu col usu de la llingua asturiana. Sobre la so novedá lliteraria más cercana y el restu de les xeres que desenrrolla falamos con Carballeira na Entrevista de la Selmana.

-El so curriculum ye variáu, ¿qué se siente más, periodista, dibuxante, escritor…?

-La verdá ye que sería complicao de dicir… De guah.e entamé primero, como ye davezu, dibuxando y dempués llegaron les otres coses. Siempres me prestó cuntar hestories y escribir, pero lo d’acabar de periodista nun foi premeditáu, más bien daqué que llegó ensin esperalo, anque ye un trabayu que me presta abondo, sobre too el periodismu llocal, ye más cercanu y nun ta suxetu a munchos convencionalismos de los medios nacionales o internacionales. Digamos que me siento un contador d’hestories, bien con dibuxos, con pallabres, con soníos…

-¿Cómo xurde la oportunidá d’espublizar “Xilu tien mieu a la nueche” tornáu al inglés?

-Tenía ganes de facer dalgún trabayu en formatu llibru lletrónicu. A partir d’ehí cuando conocí les plataformes de la empresa Apple tuvi claro que tenía que ser emplegando esti mediu. Amás hai que tener en cuenta que ye la primer plataforma que de verdá abrió un mercáu potencial importante, con millones d’usuarios y por tanto posibles llectores, que son usuarios del Iphone, l’Ipod o l’Ipad. Y los llibros ilustraos queden mui, mui bien nestes pantalles. Darréu foi cosa de buscar una editora que tuviera esperiencia y un bon númberu de títulos, nesti casu PicPocket Books, comunicase per corréu colos sos responsables, mandar unes muestres de dalgunos cuentos y facer la torna y adautación al sistema.

-¿Ye la torna a otres llingües una salida pa rentabilizar les obres n’asturianu?

-Podría ser. El mercáu asturianu ye mui curtiu porque somos mui pocos habitantes y les ventes dan pa lo que dan, asina que buscar nuevos mercaos ye una salida. Hai qu’atopar unos bonos pegoyos qu’ayuden a sofitar les estructures débiles de les editoriales asturianes. Pero tamién hai que tener en cuenta que la competencia ehí fuera ye tremenda. De momentu esta ye una primer esperiencia que nun sabemos cómo va resultar. Habrá qu’esperar.

-¿Qué novedaes tien en preparación Asturtoons?

-Vamos sacar siete llibros nos meses próximos. Xavier Frías Conde con “Y foron felices, pero…”; Cristina Muñiz, con trés títulos, ente ellos un volume de “Poesíes pa neños” mui prestosu, Jorge Fernández y Amparo Sarrión, que s’estrenen lliterariamente con “El lladrón de galletes” y dos trabayos míos, ún d’ellos, “Xabel escontra l’ogru” va suponer la vuelta d’un vieyu personaxe que me presta abondo: Xabel, el principín medranosu, del que yá espublizara un llibru cola Academia de la Llingua va munchos años. De verdá creo que van ser llibros mui prestosos de los que diremos dando información y asoleyando bookclips nos próximos meses.

-¿Tien presvisto espublizar obres n’asturianu en formatu dixital?

-Sí. Bono, yá tenemos la esperiencia de los cuentos que volcamos en formatu audiovisual nel proyeutu Cuentos de la Curuxa, pero nos próximos meses queremos tamién sacar dalgún llibru más nun formatu d’ebook puru, esto ye, en formatu PDF o l’estandard EPub que se ta espardiendo agora. Tenemos la idea de cambiar la web enantes de finar l’añu y sedría interesante regalar ún d’estos ebooks a les persones que visiten la web.

-Cómo editor, ¿cómo ve’l sistema actual de sovenciones pa llibros n’asturianu?

-Primero, creo que ye un sistema imprescindible. Si nun fuera poles sovenciones, el futuru de la lliteratura n’asturianu sedría mui difícil porque, como comenté al principiu, el mercáu ye mui curtiu y la llingua asturiana nun acaba de recibir tol sofitu que merez d’una mayoría d’asturianos. Si tienes suerte puedes llegar a vender una edición, pero eso da pa cubrir gastos y poco más. Yo tengo esperiencies a pie de puestu de llibros en dalgunes feries y óyese cada comentariu… ¡Dalgunes madres nun dexen allegase a los neños cola disculpa de que son llibros n’asturianu! Igual que si fueren tóxicos. A lo meyor habría que tratar de trabayar dende l’Alministración pa cambiar un pocu esa imaxe que tienen munchos sobre la nuestra lliteratura. Nun sé si dedicando inversión a campañes promocionales más efeutives o de qué forma podría ser.

-¿Tendrá d’adaptase’l sistema actual d’ayudes a la edición pa los formatos nuevos en dixital?

-Igual ye un poco pronto pero a la llarga creo que se tendría que contemplar la posibilidá. Trátase d’un formatu con unos gastos d’edición más pequeños, pero que pue llegar a tener munchu impactu nel mercáu y nel espardimientu y caltenimientu de la llingua asturiana. Too depende de los próximos años y de cómo evolucione’l sistema de llectura que’l públicu decida usar. A min abúltame que la llegada del formatu lletrónicu ye imparable pero habrá qu’esperar.

-¿Y va siguir espublizando tamién les tornes al inglés?

-Sí, de xuru. Y tamién al castellán, pero too con tranquilidá y pasín a pasu. Enantes hai que comprobar si ye posible y si paga la pena esta primer esperiencia. Pel momentu equí n’España tovía tá la cosa un poco verde.

-¿Por qué decide nel so momentu fundar una editorial dedicada al públicu más xoven?

-De verdá creo que la lliteratura ilustrada ye la que más allegría y satisfaición te pue dar, tantu como autor como editor. Y creímos, va seis años, que n’Asturies había sitiu pa una esperiencia como esta, que quería tar tamién mui apegada a los colexos y a los escolinos. Asina que cola mio hermana, decidimos entamar a espublizar dalgunos títulos, sofitándonos en dalgunos de los personaxes de cómic que yo creara pa la prensa, como son Nardo y Quina y los Chones.

-Ye una de les poques editoriales que fai anuncios na rede: vidios y pequeñes animaciones, ¿nun ve una falta d’enfotu nel poder de la publicidá ente los editores?

-Nun sé. Quiciabes enantes sí que la podría haber, pero agora cada vez atopamos más esperiencies de les editoriales nes promociones audiovisuales y na rede. Por desgracia los costes de llegar a la televisión creo que tovía facen que seya un mediu que queda fuera de la mano de la mayoría de les editores asturianes.

-Va años fizo la primer película d’animación n’asturianu, que yera amás, la primera fecha n’Asturies, ¿por qué nun tienen continuidá proyectos como aquel?

-Porque son difíciles. L’animación lleva munchu, munchu trabayu. La esperiencia d’adautar “El cuélebre y l’home l’espaciu” fízose con un sistema d’animación llimitáu y cenciellu, pero con too llevó un llabor pergrande. La verdá ye que sedría mui guapo poder facer una serie dende equí, con personaxes asturianos y que dempués se pudieran esportar al restu del mundu. Podría facese y yo llegué a iguar dalgún proyeutu nesti sen, pero nun hubo manera d’atopar un sofitu económicu mínimu pa facelu. Nin siquiera pude llograr que la TPA emitiere dalguna d’eses animaciones. Atópeste con una muria que namás unos pocos pueden pasar.

-Anque paez claro polo que cuenta, ¿cómo ve la presencia del asturianu nos medios de comunicación?

-Curtia, claro. Mínima. Hai mui poco interés nes empreses editores y eso que les sovenciones son curioses en munchos casos. Pero esto ye un tema perconocíu y del que yá se faló en munches ocasiones: tien qu’haber una normalidá de les noticies en llingua asturiana dientro de los medios, que nun apaezan estayes separtaes del restu como si fueren islles en metá de la mar… La esceición son los medios electrónicos, por supuestu, que falen n’asturianu d’entamu a fin.

-En Piloña organiza les Xornaes de Lliteratura Infantil, ¿ye más complicao entamar actividaes d’esti tipu dende conceyos relativamente apartaos del centru d’Asturies?

-Sí, son unes xornaes qu’entamaron cola idea d’esparder esti tipu de lliteratura y sobre too, que los escolinos la vieran como daqué normal. Que nun crean que ye tóxica como la paisana que te cuntaba (rises). Lo cierto ye que, anque nos últimos años hai munches esperiencies culturales paecíes en conceyos del oriente y occidente d’Asturies, siempre tienes que llibrar dalgunos pilancos que nuna gran ciudá nun atoparíes, entamando pola curtia capacidá presupuestaria de los Ayuntamientos.

-¿Con qué actividaes va cuntar la edición viniente?

-La verdá ye que la crisis ta siendo tremenda y nestos momentos tovía nun sé si tenemos presupuestu pa poder facela. Anque pela mio parte, podríemos tratar d’entamar unes xornaes bien guapes malapenes con unos llápices de colores, unes fueyes y un poco d’imaxinación. Total, les histories y cuentos nun necesiten más qu’eso, ¿verdá?

Traducen al inglés el llibru “Xilu tien mieu a la nueche”

Esti sábadu, 19 de setiembre, entama la quinta edición del festival cultural de l’Arribada, en Xixón. Alberto Álvarez Peña ye dende 2008 presidente de l’asociación homónima qu’organiza esti eventu centráu na lliteratura pero abiertu a propuestes dende otres estayes venceyaes: música, teatru, cine… A poques hores del entamu de les actividaes, que van desenrrollase a lo llargo d’una selmana, falamos Peña de les novedaes que trai esta edición y d’otres cuestiones como l’apoyu institucional a esti tipu d’eventos.

-L’Arribada cumple cinco ediciones, ¿ta nun momentu de consolidación?

-Sí, home, más o menos. Yá van cinco ediciones y pue dicise que ye dalgo consolidao. Lo único qu’esta vegada como tán d’obres nel Vieyu Institutu facemos namás inauguración y últimu día ellí, y el restu treslládamonos al Centru Municipal del barriu de L’Arena. Podemos dicir que tolos años ye una cita cuasi obligada, tantu pa la presentación de llibros, como pa dalgunes ponencies de xente y bono, pues tamién cuestiones como’l cine, la música, el documental, coses asina venceyaes.

-¿Apóyase abondo dende les instituciones o siéntense marxinaos con respectu a otros eventos culturales?

-(rise) Bono, esto ye como siempres. Yá sabes que’l tema del asturianu apoyu hai bien pocu y agora cola gran escusa que ye la crisis, ye una pallabra maraviyosa pa rebaxar sofitos. Home, si ye verdá qu’en Xixón paez ser que va caltriando la idea de, polo menos, echanos un gabitu con esto. La Conseyería de Cultura yá ye otru tema. Pa entamar coses d’estes, yá sabes, too ye poco. Si mos pueden dar más sofitos pues meyor. Y la verdá ye que pa les perres que se mueven faise abondo, abondo más de lo que ye la cuantía. Equí naide cobra, pero hai que trayer xente de fuera, nesti casu un rapaz de Madrid, que vien a dar una conferencia sobre etnoloxía del Cordal Cantábricu, y estes coses pues bono, son gastos qu’hai que cuntar con ellos. Siempres vien bien sofitos y ayudes, anque seya echar una mano. Pero bono, a poco y a poco, como se suel dicir.

-Polo que veo, nun tán igual de contentos cola Conseyería, como col Ayuntamientu de Xixón…

-Esti añu eso ye verdá. Política Llingüística dio menos perres y bono, de fechu, a día de güei, tovía nun sabemos colo que vamos cuntar. Si sabemos lo que mos dan dende la Fundación Municipal de Cultura de Xixón, pero n’Uviéu (na Conseyería de Cultura) hai realentí tremendu. Mesmamente pa ediciones n’asturianu, y en tolos ámbitos igual. Tán un poco nes llaureres, pero bono, en fin, ye lo qu’hai.

-Tornando a les cuestiones de programación, ¿cuáles son les principales novedaes d’esta edición de l’Arribada?

-Sigue habiendo’l tema de presentaciones de llibros, de ponencies… Va haber un día dedicáu íntegru a temes etnográficos, cola presentación-ponencia del llibru nuevu de González-Quevedo d’antropoloxía asturiana, l’investigador llegáu de Madrid del que falábemos enantes, Chechu Torres. Esti rapaz va espublizar a non tardar un llibru de más quinientes fueyes sobre etnoarqueoloxía y socioeconomía de la Edá del Fierro prerromanu en tola cornisa cantábrica. Un llibru que tenía que tar fechu equí, na Universidá d’Uviéu (rise), pero que tuvieron que facelu en Madrid.

-Otra de les actividaes más anunciaes ye la presetación del primer doblaxe al asturianu d’un llargumetraxe, ¿cómo foi esti procesu, qué persones participen?

-Escoyóse “La nueche de los muertos vivientes” precisamente porque tien una serie de característiques que facíen más afayidizo’l facelo. Hai que tener en cuenta qu’anque ye una película de cultu, fízose con actores non profesionales. Los que participamos nel doblaxe somos non profesionales del campu, pero pa lo que ye, quedamos abondo contentos.

-Entós, ¿vamos sentir al presidente de l’Arribada como a un muertu viviente?

-Sí, pero nun cuento (rises) que me reconozáis, yá sabes que los muertos nun falen.

-Estrénase tamién “A Bruxa de Brañavara”, documental onde sí que lu vamos reconocer, yá que lu presenta, ¿qué pue contanos d’él?

-La Bruxa de Brañavara ye un personaxe que vivió en Bual y morrió a entamos de los años noventa. Anque la xente conoz a Amparo Lopez como una bruxa, en realidá nun yera una bruxa, según el conceptu de les aldees, de muyer qu’echa males de güeyu y que produz enfermedaes. Llamábenla “a bruxa” pero en realidá ye un personaxe que desapaeció, cuasi podemos dicir que ye ella la cabera. Yeran los bedorios, xente que falaba colos muertos. Tovía nesa zona esiste la creencia del “mal muertu”, el que muerre debiendo coses a la familia, o tien engarradielles colos vecinos. Dicen que provoca ruios na casa, enfermedaes nel ganáu y hasta la muerte de xente, ta mui documentao la esistencia d’esta creencia. El muertu intranquilu había que lu aplacar y esta bruxa falaba colos muertos. La xente diba a consultala y llegó a tener tanta sonadía que nel añu 1978 ficiéron-y un reportaxe na revista Tiempo y dempués n’Interviú. Yera una paisana que vivía mui marxinal, mui temida, pero tol mundu recurría a ella.

Nel documental recoyemos la vida d’ella al traviés de la xente que la conocío, tanto vecinos de la zona, como’l cura-párrocu de la época, que foi quien la enterró. Ye mui conocida en tol occidente, non namás en Bual, n’Allande, n’A Veiga, nos Ozcos… y conócenla, porque tol mundu diba a ella, yera una institución.

-El Premiu Timón va esti añu pa Roberto González-Quevedo, pero amás estrenen estaya de Premiu Timón pa obres en castellán, ¿con qué oxetu s’entama la convocatoria pa autores en castellán?

-Bono, salió asina un poco a lo xole. Xuntámonos y pensamos que tamos dando premios a la lliteratura fecha n’asturianu, pero hai tamién munchos asturianos, abondo válidos, con lliteratura mui guapo, pero qu’opten por usar el castellán. Nun ye que seya namás xente qu’escriba en castellán, sinón que son xente qu’escribe nes dos llingües. Paeciónos que nun teníemos porqué reducilo a una cosa, y esti ye’l primer añu.

-D’ente los llibros que van presentase, ¿cuálos destacaría?

-Pues por exemplu, “Recetes llambiones”, de Beatriz Rato; “Del romanticismu al rexonalismu” de Javier Cubero, dos obres de Lluis Portal, el poemariu últimu de Marta Mori, “L’alcordanza”, y por supuestu, el de los cuentos curtios d’Asturnews (rises), que lu saca una editorial mui moza como ye La Cruz de Grau. Lo que solemos facer ye llamar a les editoriales y pregunta-yos qué quieren presentar. Ponemos un tope de tiempu y esti añu hubo xente que llegó tarde, pero los tiempos de la imprenta, pal folletu y demás, nun permiten cambios d’última hora.

Tamién ye verdá qu’esti añu ye una selmana namás, l’anterior fueron dos, porque dos son mui cansao, per una parte, y per otru, nun tenemos el patiu del Vieyu Institutu, que mos daba xuegu pa poner un quiosquín coles novedaes y como va ser namás el salón d’actos, onde vamos inaugurar y facer dalgún conciertu, pues yá te llimita.

-Son menos díes, pero una vegada terminada la Vagamar, marcháis a dellos conceyos…

-Yá l’añu pasáu y esti ficimos lo que llamamos “La Rolda”, que ye per conceyos, fízose hasta agora en Villaviciosa, esti añu pues vamos a Tapia, Colunga… Ellí onde haya daqué d’infraestructura, una cosa cultura polo menos (rise), y sobre too si hai xente ellí moviéndose, pues facer un pocoñín simbiosis, aconceyase con xente que ta trabayando na fastera.

-Falando yá de la so obra personal, nun hai añu nel que nun lleve alantre la edición de dalgún llibru alredor de la cultura asturiana, ¿qué tien agora en preparación?

-Non, yo agora mesmo nun tuvi tiempu a gran cosa. Ente lo de “Peor imposible”, que tuvimos con Chus Parrado y les sos películes “de xéneru”, agora lo de l’Arribada, y dempués el Salón del Cómic, que tamién tengo trabayu, la verdá nun tengo muncho tiempu pa nada. Sigo saliendo peles aldees, garrando lo que se pue. Tuvi tovía agora per Bual dando les últimes pincelaes al documental de la bruxa y aproveches pa sacar pa otres coses, y agora toi atropando material, dempués habrá qu’esbillar, refervelo y a ver qué saco d’ello.

Porgrama completu d’actividaes

L’autor lleonés Roberto González-Quevedo (Palacios de Sil, Lleón, 1953) ye quiciabes la figura más visible na recuperación de la llingua asturiana al sur del Cordal. Escritor, filósofu, antropólogu y llingüísta, lleva al llombu una llarga carrera, trabayando dende los años ochenta pol usu de la variedá occidental del asturianu. Ye miembru de númberu de l’Academia de la Llingua Asturiana ocupando anguaño’l cargu de secretariu, y director de la revista Cultures, amás de profesor universitariu. Pol llabor de lliteratu l’Asociación L’Arribada otorgó-y esti añu’l Premiu Timón. Va recibilu en pocos díes y falamos con él del momentu que supón esti reconocimientu a la so carrera. Amás acaba de publicuar el llibru “La cultura asturiana. Introducción a l’antropoloxía d’Asturies”, una importante obra de más de setecientes páxines.

-¿Cómo recibe l’anunciu de convertise en Premiu Timón?
-Enteréme per una llamada telefónica d’un miembru del xuráu. Y, sinceramente, foi una anuncia tan inesperada como prestosa que me dieren el Premiu Timón, que pa min ye mui importante.

-Los sos llabores más destacaos son los d’antropólogu y escritor, ¿refuercia esti premiu la so autoconcepción de lliteratu?
-Ye verdá que les mios publicaciones tienen distintes dimensiones y perspeutives. Xunto a los llibros d’ensayu y d’investigación, unos cuantos llibros míos son estrictamente lliterarios. Nel mio casu l’actividá lliteraria, per un llau, y les otres actividaes, per otru, son mundos diferentes, que nun converxen, anque tampoco diverxen: son como dos víes paraleles. En cuantes a min, el premiu Timón nun cambia l’autopercepción, anque sí pue ser que destaque énte’l públicu la mio obra lliteraria. Y pola obra lliteraria propia siempres tien ún un especial aquel.

-Una parte importante de la so obra fízola a comuna cola so madre, Eva González. Barrunto que-y prestaría que viviera pa recibir xuntos esti premiu…
-Sí prestaríame muncho, pero eso ye imposible. Y yá va tiempu que tengo asimilao que coses tan guapes como eses son imposibles: hai qu’aceptar el principiu de realidá, anque la lliteratura sí nos dexa un espaciu p’afuxir de la inevitabilidá de lo que pasa na vida.

-¿Queda tovía obra inédita d’Eva González?
-Sí, queda muncha obra inédita entovía. Espero que pal añu que vien s’asoleye’l conxuntu de la obra non lliteraria d’Eva: un vocabulariu perinteresante, escritos sobre temes etnográficos, refranes, cantares, etc. Y queda entovía por espublizase una obra estraordinaria, la qu’ella mesma tituló “Hestoria de la mia vida”, que ye una autobiografía. Nesa obra, por exemplu, descríbense los años difíciles de la Guerra Civil.

-Ta acabante espublizar una obra de gran formatu: “La cultura asturiana. Introducción a l’antropolóxía asturiana”, ¿qué novedaes podemos atopar con respectu a obres anteriores de so?

-Esti estudiu antropolóxicu tituláu “La cultura asturiana” ye una evaluación teórica y un repasu al conxuntu de la cultura asturiana. Ye, entós, una obra de sistematización y definición de los distintos aspeutos que formen la cultura astur. Hai temes nuevos, pero muchos de los asuntos que se traten nesta obra son asuntos yá estudiaos por min n’obres anteriores, anque nesti casu les cuestiones trátense de forma más contestualizada y tratando de precisar meyor el perfil asturianu. Tamién nesta obra hai referencia a los munchos estudios que se tienen fecho n’asturianu sobre la cultura propia.

-Y na Universidá d’Uviéu siguen ensin ufrir estudios d’Antropoloxía, ¿por qué son necesarios?
-Foi mui necesaria la presencia de los estudios antropolóxicos na universidá asturiana porque ésa yera la única manera de garantizar la continuidá y l’afitamientu de los estudios sobre la cultura asturiana. Foi necesario, pero nun se llogró, por intereses ruinos, tanto políticos como personales. Estoi foi tamién una gran paradoxa, porque Asturies, ún de los sitios de la península onde hai una cultura popular más rica y fonda, yera una de les poques zones onde nun s’institucionalizó l’estudiu d’esa cultura. Foi un desastre, porque estos años pasaos yeren mui valoratibles pa la investigación: hai coses que yá nun podemos recoyer y estudiar, porque’l cambiu social y cultural llevóles pa siempre. Tengo mieu que namás pongan l’antropoloxía d’Asturies na universidá cuando tean bien seguros de que yá nun queda nada.
-Nos años ochenta participó del movimientu “Pesicia” que naguaba por un subestándar propiu pa la variedá occidental del asturianu, ¿ta anguaño peslláu dafechu esi problema?
-La cuestión de “Pesicia” foi mui prestosa. Pa lo que significó “Pesicia” hubo dempués unos momentos malos, pero dende hai unos años ta resurdiendo otra vuelta la lliteratura n’asturianu occidental. Toi convencíu de que dientro de la lliteratura asturiana la lliteratura n’asturianu occidental tien munchu futuru, porque ta mui enraigonada na conciencia coleutiva asturoccidental. Yo, a la escontra de muncha xente que ta obsesionao y alloriao por esti tema, veo la cuestión de la lliteratura asturoccidental de forma positiva: ye una contribución a la riqueza nacional astur. La cuestión agora ta plantegada en términos distintos a los d’aquellos años a los que te refieres. Nesi sentíu, el “problema” ta “peslláu”. Agora tamos n’otru momentu hestóricu y dalgunos, cada vez más, escritores del occidente tamos decidíos a que nun se condergue nin se prohiba la lliteratura asturoccidental, como dalgunos pretenden. Si quieren facelo, entós sí que pue haber problemes, que puen tener consecuencies mui graves.

-Va yá muncho que nun vemos nes llibreríes un númberu nuevu de la revista “Cultures”, que dirixe, ¿vamos ver ediciones nueves de la revista?
-Yá ta pa la imprenta’l próximu volume de Cultures, asina que tará peles llibreríes primero de que termine esti añu. Y asina sucesivamente saldrán los volúmenes siguientes.
-¿Cómo ve la situación del asturianu na so tierra natal, en Lleón?
-Na zona d’onde yo soi (Alto Sil, L.laciana, Babia) la llingua vive un momentu d’esplendor: hai muncha lliteratura, actos públicos onde s’usa la llingua, concursos, programes de radio, etc. Puedo garantizar qu’esto ye asina, porque lo conozo perbién. En cuantes a les otres zones de Lleón tengo menos información y, amás, fragmentaria. Sé qu’hai xente de munchu valir y que ta trabayando guapamente. Tamién percibo qu’ellí nun pue facese nada si nun se respeten les opiniones, les sensibilidaes y les peculariedaes propies. En Lleón nun hai dengún interés en convertise n’algo distinto de lo que son, polo menos eso me paez a min.

-¿Y en cuantes a la normativización?
-En cuantes a esto, digo lo que se sigue de lo anterior: hai que respetar lo que se piensa, lo que se siente y lo que ye propio d’ellí. Lo contrario ye contraproducente.

-¿Qué pueden facer dende l’Academia de la Llingua Asturiana pol idioma al sur del Cordal?
-L’Academia, como les instituciones y los particulares d’Asturies puen collaborar y facer coses mui positives en tolos asuntos y aspeutos, siempre qu’ellí nun se perciba como una imposición.

-¿Qué trabayos prepara n’estos momentos?
-Dientro d’una temporada asoleyaráse un llibru de rellatos: “Onde viven los amigos”. Y toi agora trabayando n’otros proyeutos lliterarios, de distintu calter, pero fundamentalmente prosa.

Roberto González-Quevedo conviértese nel cuartu Premiu Timón

Inaciu Iglesias (Uviéu, 1966), empresariu y articulista, acaba de publicar el llibru “Tu como yo”, onde fala del nacionalismu. Aprovechamos pa, amás d’adientranos nesta novedá bibliográfica, conocer les perspectives futures d’un home siempres atentu a la vida política, editor del periódicu Les Noticies, y dueñu de la editorial Trabe, la de más pesu na edición en llingua asturiana.

-¿Qué aporta de nuevo “Tu como yo” al estudiu del nacionalismu asturianu?

-Sentíu del humor, escepticismu, exemplos reales como la vida mesma, ganes d’entender la mala prensa que tien el nacionalismu, humildá y, quitante eso, nenguna pretensión más.

-“Sangre y tierra”, asina define la ideoloxía nacionalista. Sicasí, ¿nun-y paez que la confrontación izquierda-drecha sigue cuntando muncho nel nacionalismu asturianu?

-Y en tolos demás. La manera d’entender la propia identidá colectiva, el nacionalismu, tien siempre munchu que ver cola propia ideoloxía, cola propia edá, cola propia profesión y, en definitiva, con toles otres circustancies que nos arrodien. El problema ye entender qu’esa forma nuestra d’integranos nuna nación ye la única posible; que’l nacionalismu tien que ser namás como nosotros lu entendemos: que tien que ser namás de dereches o namás d’izquierdes. Eso lleva a la esclusión y esi ye un problema grave y común a cuasi toles naciones.

-Diz que-y quita la “mázcara” a esti movimientu políticu y que “paez más amable”, ¿cómo barrunta que se ve dende la sociedá asturiana?

-Con muncha empanada mental. Tamos empeñaos n’aplicar al nuestru país esquemes y clichés de nacionalismos que nun tienen nada que ver coles nuestres circunstancies. Y por eso llegamos a conclusiones ridícules. Y, cuidáu, porque eso val pa tol mundu: pa los que pretenden qu’equí hai un “conflictu internacional irresoluble” o pa los que cuenten qu’equí hai un “problema grave de separatismu”. La realidá ye que’l nacionalismu asturianu ye munchu más natural de lo que parez; munchu más sanu de lo que contamos.

-Paez claro que les opciones polítiques nacionalistes nun atoparon un sofitu popular importante, ¿ye quién a atopar les razones d’esta falta d’ésitu?

-Sí: la incompetencia de los responsables políticos d’eses opciones nacionalistes. Hai otres razones pero, pa min, esa ye la fundamental. Con diferencia.

-En cuantes a la situación de dixebra de les fuercies polítiques asturianistes, ¿plantega dalguna solución nel llibru?

-Nel llibru non, pero la solución ye bien cenciella: pa xuntase lo único qu’hai que facer ye xuntase. Tan fácil y tan enguedeyao como eso. Lo que pasa ye que los propios responsables d’entamar esa xuntura nun lo quieren facer. Esi ye’l verdaderu problema.

-Usté mesmu participó activamente en formaciones polítiques como’l Partíu Asturianista, la URAS, y nos últimos tiempos ye conocida la so simpatía pol Partíu Popular, ¿ónde s’asitia agora políticamente, ónde-y ve más futuru al desenrrollu del asturianismu dientro d’un partíu estatal?

-A mi préstame definime, en cuatru palabres, como demócrata lliberal, asturianista y buen rapaz (y sí, ya sé qu’esto último son dos pallabres). Lo que quiero dicir ye que, con esa ideoloxía, de la que nin pueo nin quiero desprendeme, voi facer por aportar ellí onde seya más útil: onde más me necesiten o onde más me quieran.

-¿Plantégase entós tornar a la política?

-Sí. Pero, por matizar, la palabra igual nun ye tornar porque, la verdá, tar en política, nunca tuvi. La pallabra correcta diba ser entós empezar; empezar en política con muncha humildá, más que nada porque tengo munchu que dprender.

-Ye empresariu y dizlo como una “confesión” nel so llibru anterior, ¿ye tovía un “pecáu” esta profesión n’Asturies?

-Vamos dicir que sigue siendo un pecáu pero, eso sí, cada vuelta meyor vistu. Agora entiéndese más como un mal necesariu. Mire usté, eso que ganamos.

-En 1996 fundó Les Noticies. A piques de cumplir quince años editándolu, ¿cómo valora esti tiempu?

-Ficimos los deberes. Enquivocámonos una montonera veces, acertamos en dalguna cosa pero, tenemos mui claro que ficimos los deberes y eso ye lo importante: aportamos dalgo, sumamos. Y vamos siguir faciéndolo.

-Fueron el primer periódicu asturianu en cuntar con una directora, Beatriz R. Viado. Dende va selmanes yá nun figura como máxima responsable, ¿tamos énte un cambiu de personal o ta detrás d’esta decisión dalgún xiru ideolóxicu nel periódicu?

-Ye una decisión interna de la empresa. Una decisión complicada pero necesaria y, como digo, cien por cien empresarial.

-Pa munchos espertos, la información en papel tien los díes cuntaos, ¿plantéguense dexar d’imprimir Les Noticies y pasar al formatu dixital?

-Tolos díes. Eso y otres coses. Quiero dicir que continuamente plantegámonos cual va ser el nuestru futuru y qué ye lo que podemos facer pa meyorar o, directamente, pa sobrevivir. El problema ye que nun hai una repuesta acertada. El que diga que sabe de xuru cuálu va ser el futuru del formatu papel o cómo va evolucionar lo dixital, o ye mui llistu o, directamente, miente. Naide lo sabe y dir resolviendo esi misteriu día tres día ye lo único que tenemos.

-Va dellos años fízose con Ediciones Trabe, ¿qué del cambios destaca del so tiempu al frente de la editora?

-Fici pocos cambios porque tuvi la suerte de contar con un equipu humanu inmeyorable; grandes profesionales. En cualquier casu, si dalgo cambiamos seique ye qu’agora publicamos menos y facemos por cuidalo meyor, sobremanera la promoción.

-Con Ámbitu trabayen nel campu audiovisual, siendo’l so productu más esitosu, “Camín de cantares”, ¿hai nuevos proyectos en mente?

-Sí, pero nun-y los voi dicir, porque asina queda usté con un poco ganes pa la viniente entrevista.

Esti sábadu Porcía, pueblín asitiáu nel conceyu occidental d’El Franco, acueye la ventiocho edición de la nueche folk más conocida y vieya de les asturianes, la Noite Celta. Nesta ocasión cunten con grupos como Felpeyu, DRD o l’escocés David Munnelly. Pa conocer más detalles d’esta célebre folixa y de la so organización falamos con delles de les persones qu’organicen esti eventu, los miembros de l’Asociación Cultural Alameda, con José Pérez Vidal, el so presidente, a la cabeza. Trescribimos les sos respuestes como nos falen, en gallego-asturianu.

-Programar ún de los festivales celtes más prestixosos del Arcu Atlànticu, y decanu de los asturianos, tien de ser una responsabilidá importante, ¿cómo lleven alantre esi trabayu d’escoyeta d’artistes?

-Al cabo de ventisete anos, déunos tempo a conocer personalmente a un bon puñao de músicos folk y aparte, tentamos de trer sempre algúa banda de fora que s’ameza al peteiro de grupos asturianos que normalmente ocupan a mayor parte del cartel. Mantemos muito búa rellación coellos y tamén nos deixamos asesorar pra poder trer a grupos de renome internacional y dar, al mismo tempo, acoyida todos os anos a xente nova que nun tuvo inda oportunidá de tocar na Noite Celta de Porcía, sempre dentro das posibilidades que podemos ofrecer.

¿Cuántes persones trabayen na organizacion y desenrrollu de la Noite?

-A Noite Celta depende d’un bon número de xente, fundamentalmente del llugar del Franco, d’unde el conceyo coyéu el nome, hoi na parroquia de Valdepares. Nun saberíamos precisar el número con exactitú, peró entre úa cousa y outra ben sei que nos achegamos ás 30 personas. A Noite Celta nun existe sola nel actividá da xente que la amaña, suposto qu’el Asociación Cultural Alameda, responsable da súa organización, fai tamén outros llabores al cabo del ano. El más representativo, xunto coa Noite Celta, é sin duda el organización da Romeiría da Nosa Señora dos Remedios, el ocho de setembre; é, ben seguro, a romeiría más multitudinaria d’esta contornada d’Asturias. Tamén se fai con regularidá as actividades culturales que cualquera asociación d’este xeito amaña al llargo de todo un ano.

-Pela Noite Celta pasaron dalgunos de los grupos mas conocíos de les trés décades últimes, ¿ye complicao caltener la calidá y presentar novedaes añu tres añu?

-Sempre. El compromiso da xente é esencial y conseguir financiación abonda, claro ta, tamén. É un trabayo llargo da xente del poblo que dura más d’un ano, xa qu’antes qu’acabe úa edición xa se ta amañando a arrancar cousas prá del ano que vén. Más inda nel entorno unde se fai, unde hai que recordar que se trata d’un isla arrodiada pol río Porcía, que nun tén acceso natural ás personas y al tráfico rodao.

-Nesta ocasión apuesten pola musica del escocés David Munnelly y de dellos grupos asturianos. ¿Qué suel tener más ”tirón”, lo llocal o lo foriato?

-Supoñemos qu’eso depende de muitas cousas, como os horarios, el tempo, el reportorio dos grupos, por exemplo. Temos visto al público casi nel “éxtasis” tanto con grupos rexonales, como Llan de Cubel, como con grupos de fora, por exemplo el caso de Fred Morrison y a súa banda. De cualquera xeito, na Noite Celta de Porcía, tamos abertos a cualquera proposta musical que s’axuste al criterio del que se vén celebrando dende hai ventisete anos, buscando sempre calidá nun festival, pensamos, mui a medida da xente qu’asiste al Alameda, sin grandes produccióis nin parafernalias.

-Si en dalgo se diferencia la Noite folk de Porcía, amás del guapu espaciu nel que se fai, ye pola orixinalidá de cuntar con parrillada de sardines. ¿Cuántes lleguen a consumise nuna sola edición?

-Hasta qu’a xente se farta (rises). El maestro Patricio del Murillo y os sous pinches nun abandonan el carro hasta que s’acaban os varios centos quilos que se train cada ano.

-Esti añu, en plena crisis, ¿tuvieron d’asistir a recortes de presupuestu?

-Non. Pensamos que nos caracterizamos por ter úa financiación sostenible pra os nosos festivales, inda condo nun podemos negar que temos crisis perpetua nun sito pequeno como el Franco, y que nun se cumplen nunca as nosas expectativas. Tamén, como pasóu este ano, únicamente recibíronse 300 (trescentos) euros d’úa entidá privada, y outra axuda d’outra entidá que sempre nos fai precio nos sous servicios. Nin un peso das alministracióis públicas. A financiación das nosas actividades recain principalmente nos vecíos da parroquia de Valdepares, xunta col cobro dos postos y bares que se poin pra dar servicio na Noite Celta y na Romeiría dos Remedios. Consumir nel bar da festa é tamén importante neste sentido, y esperamos qu’a xente sepa apreciar el esforzo que supón poñer á súa disposición todos os anos lo que pasa neste festival.

-¿Cuánta xente acude cada añu a la Noite folk?

-Inda que nun temos un conteo exacto, podemos fer úa comparativa con outra actividá da terceirá edá que se celebra nel mismo campo del Alameda de Porcía, na qu’a conta das personas é prácticamente exacta. A partir desto, podemos dicir que superamos ampliamente as 4.000 personas nos últimos anos. El 8 de setembre na Romeiría dos Remedios xúntanse úas 12.000.

-Queden dos años pa un númberu redondu, la trenta edición, ¿hai dalgo yá pensao pa celebralo?

-Algo hai, peró nun será por aquí unde vos lo dígamos. (rises)Esperámosvos pra esa edición, pras que quedan y, sobretodo, esperámosvos este sábado. Seredes ben recibidos.

Andrea Fernández Joglar (Xixón, 1991) ye la meyor gaitera del mundu y la primera que se fai col prestixosu premiu McCrimmon, nel Festival Intercélticu de Lorient. Dende los siete años preparóse a la gaita con dalgunos de los maestros más renomaos. Con diez años participa nel primer concursu y dende entós vien algamando perbonos resultaos en toos ellos. Forma parte de la Banda de Gaites “La Raitana” del grupu folk “Verdasca”, el so proyectu más queríu, y na Entrevista de la selmana conocemos cómo s’atopa una selmana dempués de la victoria, la gaitera más valorada del momentu.

-¿Qué sintió cuando supo que yera la ganadora del McCrimmon?
-Muncha felicidá. Ta claro que ye ún de los concursos de mayor importancia dientro del mundu de la gaita gallega y asturiana, non sólo por cellebrase nel Festival Intercélticu de Lorient, tamién por tolos gaiteros que participaron y ganaron el certamen y que dempués demostraron grandes coses nel ámbitu musical.

-El so hermanu Rodrigo fízose col tercer premiu, ¿hai competencia ente los hermanos o allegría mutua?
-Sabíamos dende un principiu qu’esto yera una llucha fratricida… (rises) Ná, competencia nenguna. Los dos teníamos ganes de participar nel McCrimmon esti añu, probamos suerte y nun mos foi del tou mal. Tamos los dos mui contentos.

-Anque ye tovía mui moza, con esti premiu McCrimmon y con tolos algamos primero, ¿nun tien la impresión de tenelo fecho too no que cinca a los concursos pa gaiteros?
-Entamé mui moza participando en concursos y ye verdá que siempres tuvi perbonos resultaos. De toes maneres, nunca m’obsesionaron muncho y plantégolos como un complementu a la formación. Siempres vien bien tener un respaldu de concursos d’esti tipu pero nun hai que da-yos más importancia de la que tienen.

-¿Tien la impresión de tar abriendo un camín pa les muyeres gaiteres?
-Non, hubo munches gaiteres enantes que yo y que tamién participaron en dellos concursos, McCrimmon incluyíu. Creo que nesi sen yá atopé’l camín abiertu, anque ye verdá qu’al ser la primera moza en ganar esti concursu toi teniendo más repercusión de la qu’elles tuvieron en su día. Espero qu’a partir d’agora estes noticies entamen a ser más frecuentes.

-¿Recibió felicitación del Gobiernu d’Asturies pol so papel en Lorient?
-Nun sé si otros años feliciten a tola xente que forma parte de la Delegación Asturiana pol so trabayu nel festival. A títulu personal, nun recibí nenguna felicitación per parte del Gobiernu del Principáu.

-¿Animaráse a grabar un discu en solitariu?
-De momentu, acabamos de presentar el discu “D’abéu” con Verdasca, el grupu nel que toco gaita y xiblata, y ye’l primer averamientu seriu que tengo a un estudiu de grabación, xunto con dalgunes maquetes o’l discu “Moh.ito” de la Banda de Gaites “La Raitana”. Prefiero disfrutar del procesu d’ellaboración y difusión del discu de Verdasca enantes de plantegame un proyectu en solitariu, aunque taría bien facer dalgo nesa llinia a mediu o llargu plazu.

-¿Por qué nun se conocen munches gaiteres solistes n’Asturies, hai tovía machismu nel mundu la gaita?

-Como dicía enantes, a los concursos hai que da-yos la relevancia que tienen, pero son una bona manera de dase a conocer y nun son munches les moces que s’animen a dir a concursos. Nun creo que seya una cuestión de machismu. Afortunadamente dende va unos años les muyeres tamos nuna situación de mayor igualdá pa colos homes, tamién nel mundu de la gaita. Polo menos, na mio esperiencia personal nunca se me punxo nenguna pega por ser moza.

-Estos díes vien defendiendo l’asturianu nos medios de comunicación, ¿qué pue facese dende’l mundu la gaita pol asturianu?
-Desgraciadamente, el futuru del asturianu nun depende de la gaita. Paecía que cuando entamó’l procesu de recuperación y revalorización del instrumentu y de tola cultura y tradición asturiana en xeneral, la llingua diba esperimentar un camín paralelu. Pero entós, entemeciéronse intereses políticos, dalgo que nun pasó cola gaita, y llegamos a la situación d’estancamientu total na que mos alcontramos. Espero que pa cuando la xente se dea cuenta de que la llingua ye un bien cultural en seriu riesgu de desapaición y non un arma política, nun seya demasiao tarde.

-¿Cómo lleva la presión mediática pola que la tamos faciendo pasar los medios de comunicación?
-La verdá que nun m’esperaba que fuera a tener tanta repercusión pero toi enforma agradecida a tolos medios que s’interesaron pol tema. Ye un concursu que se vien celebrando dende va munchos años y anque suel tener cierta cobertura informativa, nunca pensé que tantos programes de radio y publicaciones de revistes y prensa fueran a ponese en contactu conmigo. Sicasí, nun ye una presión agobiante y quier dicir que’l mundu de la tradición asturiana tien ciertu interés pa la xente.

-Nun mediu de comunicación asturianu comparábenla cola cantante Lady Gaga, ¿camienta posible que la música folk algame tan importante repercusión como lo fai anguaño la música d’artistes como la citada?
-Tener la mesma repercusión que Lady Gaga debe ser una xera prácticamente imposible dientro de la propia música comercial, asina que pal folk, imaxina. Lo más paecío a esos macroconciertos atópeslo en festivales como el de Lorient, onde puedes ver un estadiu de fútbol enllenu xente pa ver les Nueches Máxiques o miles de persones nel Space Marine viendo un conciertu. Creo que’l públicu del folk ye muncho más fiel que’l de cualesquier otru estilu musical. Nesi sen, debería esistir un mayor apoyu institucional pa promover conciertos y festivales d’esti tipu n’Asturies. Sedría bono pa dar a conocer l’estilu y los grupos y tendríen un porcentaxe d’asistencia bien altu.

-¿Qué conseyos-yos daría a les rapaces qu’entamen agora a tocar la gaita?
-La gaita ye d’esos instrumentos poco agradecíos, que cuesta trabayu facer sonar bien. Tamién ye verdá que cuando faes dalgún progresu nótase muncho, obtienes una gran satisfaición y ye un incentivu pa siguir meyorando. Como con tolos instrumentos, hai que tener paciencia y ensayar con ganes.

-Estudia Filoloxía, ¿cómo ve’l so futuru, ente isogloses o pentagrames?
-Prestaríame poder dedicame al mundu de la música pero véolo enforma complicáu. Siguiré estudiando Filoloxía porque toi mui contenta y ye una carrera que me presta muncho. Dempués, el tiempu dirá.

Esta selmana entregáron-y el Premiu Urugallo, na so categoría de “llingua asturiana”. Y nun ye d’estrañar, Mari Luz Pontón ye escritora, periodista, maestra y entamadora de toa triba d’actividaes venceyaes a la promoción de la cultura y la llingua asturianes. Un día dempués de la entrega del premiu facemos repás con ella de la so carrera y del so futuru.

Premiu Urugallo del Centru Asturianu de Madrid pol so llabor en defensa de la llingua asturiana, ¿cómo recibe un reconocimientu tan importante?

-Con muncha ilusión. El retu que tenemos les persones que defendemos l’asturianu ye enforma grande y difícil, soi consciente de que va ser un camín llargu, queda munchu trabayu, y parte del trabayu ye saber tresmitir que la defensa de la Llingua nun esclúi a naide, a la escontra, arriquez tanto a Asturies como a España y a tol mundu en xeneral. Los políticos tienen que comprender que la llingua ye parte de la nuesa cultura, de la nuesa hestoria y que les llingües necesiten una normalización pa poder siguir vives.

-El so llabor ye ampliu: maestra, escritora, periodista en radio y televisión. ¿En qué papel s’afaya meyor?

-La enseñanza apasióname, anque reconozo qu’a veces agota. Paezme que llevo nel sangre ser maestra, ye pa min una satisfacción ver lo que deprenden los alumnos, ye una carga d’adrenalina. Agora que toi nel Centru d’Adultos del Fontán, como los estudiantes puen verbalizar l’agradecimientu, ye entovía más gratificante. Per otru llau escribir ye una xera perimportante pa min, y anque confieso qu’a veces propúnxime dexar d’escribir, nun puedo, ye como si hubiere un trasgu revolvín que me dictare les pallabres ensin parar. Al ser escritora’l xéneru nun importa demasiao, too ye escribir. Nuna ocasión daquién dixo cariñosamente nuna presentación d’un llibru que tengo fueu en culu, y debe ser verdá, siempre tengo na cabeza nuevos proyectos.

-Davezu escribe pa neños, ¿nun s’anima a facelo p’adultos?

-Pues ye un retu que ta ehí, na mente, pero por una o por otra razón nun acabo de poneme a ello. Debe ser que toles coses tienen de ser feches cuando llega’l momentu.

–¿Qué acoyida tien “Asturmitomanía”, el grupu del teatru col que trabaya escribiendo obres pa neños?

-Meyor nun podía ser. Los neños queden encantaos, y cuando actuamos nes escueles los maestros disfruten tanto como ellos. Delles veces hasta nos manden fotos y dibuxos fechos polos sos escolinos. Ello ye que’l grupu Asturmitomanía lleva enriba los escenarios dende 2005, con varies obres de teatru, monólogos y talleres. Somos toes muyeres, y les actrices, Lucía Colunga, Sheila Montes, Rosa Ana Muñoz y Paula Tamargo, son grandes profesionales.

-¿Qué obra tán representando nestos momentos?

-Agora tamos representando la obra “Vamos contar un cuentu” que va sobre una contadora de cuentos, Lucinda de la Mar, célebre poles sos hestories. El casu ye que cuando Lucinda escomienza una historia asoceden milenta aventures sorprendentes y, como por arte de barrabiellu, dexa de tener control sobre los personaxes. Pero desque lleó un llibru sobre Fonsín, un trasgu enforma especial, desencadenáronse una riestra d’aventures bien risonderes nos que la Xana, el Diañu Burllón y la Guaxa tienen un protagonismu principal. Lo prestoso d’esta tienra y orixinal historia ye que los protagonistes principales deprienden que, pa vivir en paz, ye obligao respetar y aceptar a los demás tal como son, por bien distintos que seyan.

-Un tema constante na so obra pa la reciella ye la mitoloxía. Con tolo qu’hai escrito sobre’l tema, ¿queda tovía d’onde sacar hestories orixinales?

-Paezme que somos daos a escaecer que la fantasía forma parte de la realidá, porque los suaños, los deseos, les fabulaciones son parte de la realidá. Por esti motivu, la mitoloxía ye un fenómenu universal que tuvo, ta, y tará presente nel pensamientu de la humanidá, formando parte de la cultura de los pueblos.

Ello ye que los seres mitolóxicos fueron a lo llargo de munchos sieglos reales, la xente creía nellos, y yeren enforma útiles porque tresmitíen claves de la visión del universu desvelando los misterios de la vida.

Per otru llau, la mitoloxía llogra enllazar cola imaxinación desbordante de los más pequeños, que nagüen siempre por maxa y fantasía. Y curiosamente, dalgo que presta tanto a los neños, y que n’Asturies tenemos a barcalaes -podemos presumir d’una bayura mitolóxica- ta mui poco valorao ya emplegao; malapenes hai histories que tomen elementos mitolóxicos y los amiesten cola vida real na que la trama seya prestosa, actual, rompedora… Amás, si hubiere un respaldu editorial y una bona promoción podíemos esportalo a tol mundu. Ye una verdadera pena.

-El so programa “Revoltixu nes ondes” lleva na RPA alredor de cuatro años. Un importante esitu, camiento que munches anécdotes nel camín y la satisfaición de caltenese…

-Préstame pola vida la radio, ye un mundu diferente dafechu a la tele, onde la pallabra ye lo que cuenta. Ye normal que cuando tas faciendo tele haya xente que te reconoza pela cai, pero que fales per teléfonu con daquién que nun sabe quién yes y que te diga que reconoz la to voz porque suel sentir el programa, ye enforma gratificante.

-Y de la so epoca na television, faciendo programes pa neños, ¿queden ganes de más?

-El mundu de la televisión ye enforma difícil, quita munchu tiempu, necesites muncha dedicación, sobremanera cuando por falta de recursos tienes qu’ocupate de casi too, pero reconozo que foi tamién enforma prestoso. Cuando escomencé col programa “La tele de los escolinos” yera mui nueva y sabía poco d’esi mundu tan complexu, pero tuvi trabayando seis años, y esi tiempu dio pa muncho. Yera almirable l’esfuerciu, la dedicación y la perseverancia de los neños, había una sección que yera un noticiariu y una pareya de rapazos teníen que deprender les noticies de cabu a rabu, llevar, llevóme munches hores d’ensayu, pero’l resultáu yera fantásticu. Foi una esperiencia maraviyosa que me prestaría repitir, y si nun se fai un sedrá porque nun haya ganes ya idees.

-¿Cómo ve la presencia del asturianu na radio y televisión públiques, ye abondo colo qu’hai?

-Paezme que tán faciéndose dellos avances, si comparamos colo qu’había enantes meyórose. Cuando yo escomencé col programa la “Tele de los escolinos”, en Localia televisión malapenes había nada, foi’l primer programa pa neños n’asturianu. Eso nun quier dicir que seya suficiente, ye necesario abrir la ufierta: telediarios, programaes de temes variaos, y como non, un programa infantil potente.

-¿Qué proyectu-y gustaría llevar alantre nos medios?

-Prestaríame volver otra vuelta a la tele con un programa infantil, pero tendría que ser un programa diferente al que facía en Localia.

-Teatru, delles incursiones nel comic, narrativa… ¿Qué-y presta más escribir?

-Nun sabría dicite, préstame too, como ya te dixi de dalguna manera nun controlo lo qu’escribo, ye un impulsu, una necesidá que te lleva a escribir un xéneru u otru.

-¿En qué proyectos trabaya agora?

-Ta acabante de salir el llibru “Quiero mercar una hermanina” y dientro de mui poco saldrá un nuevu llibru cola editorial Bellaterra sobre una elefantita refugada porque pesa mui poco. Tamién tamos preparando cola productora Hi-video una serie de programes que se podrán ver a traviés d’Internet dirixíos al públicu infantil. Hai un proyectu mui interesante en formatu cómic con tresfondu históricu y planteamientu enforma original qu’espero puea salir en pocu tiempu, y el trasgu revolvín que me fala al oyíu tol día ta suxeriéndome histories pa cuntar; ye tremendu, nun pueo con él (rises).