Emigración

El Centru Asturianu de Málaga celebra esti miercoles día 28 de xunu a les 21 hores una charra coloquiu sobre’l perru na sociedá actual. Baxo’l títulu d’ ‘El perro y los animales de compañía’, D. Andres Moreno Sánchez analizará la etoloxía del perru, la so capacidá de rellación intersubxetiva col home asina como la diferencia ente la doma tradicional y la doma cognitiva emocional.

Andres Moreno Sánchez ye monitor de la Sección Canina de la Policía Local de Torremolinos, Profesor de la Escuela de Seguridá (ESPA), Delegáu de Trabayu y Componente del equipu Nacional en Belxica.

En base a les esposiciones de la charra va abrise un coloquiou tres del qu’habrá una degustación de productos asturianos.

Nel mesmu día nel que dalgunos medios de comunicación asturianos se faen ecu del informe del Sadei qu’estima nunos 10000 al añu los asturianos qu’emigren de la rexón, dándose’l casu especialmente grave de dalgunos conceyos, como’l de Mieres, que pierden dos habitantes por día, la conseyera de Cultura, Comunicación Social y Turismu, Ana Rosa Migoya, refugó’l conceptu d”emigración’, rellacionando estes cifres cola ‘movilidá llaboral’.

‘Asturies nun puede absorver a tolos profesionales, qu’opten por movese a otres autonomíes onde tienen más posibilidaes p’atopar puestos nos sos trabayos’, aseguró la responsable de Cultura ente los datos ellaboraos pola Sociedá Asturiana d’Estudios Económicos ya Industriales qu’estimen en más de 10000 persones los asturianos que tienen d’emigrar fuera de la rexón al añu.

Lo que p’Ana Rosa Migoya ye una ‘desaxeración’ esti fenómenu migratoriu y dafechu ‘normal en toa Europa’, foi definío por otros sectores como Comisiones Obreres como ‘falta de trabayu’ n’Asturies que lleva a ‘desaprovechar un caudal de mozos altamente cualificaos impresionante’.

El Festival Celta del Potomac, n’America del Norte, ta acabante de pesllar con esitu la última edición onde les ocho naciones celtes, incluyida l’asturiana, desfilaron izando les banderes de los sos respectivos países. La comunidá asturiana emigrante lleva años trabayando cola collaboración de l’Axencia Asturiana d’Emigración, asina como de colectivos asturianos como la Fundación Belenos, pa que la cultura, la música y la tradición de la tierra consoliden la so presencia nesti multitudinariu alcuentru.

Nos dos díes que dura cada añu, el Festival Celta del Potomac inaugúrase con un desfile de banderes na que l’asturiana nunca falta, pa pasar depues a celebrar una serie d’actividaes de diferente naturaleza que representen la cultura de cada nación. Nos puestos llevantaos pa la ocasión cuentense cuentos tradicionales, ensíñase a tocar dalgún instrumentu típicu, pueden vese les actuaciones en directo de grupos de música folk de prestixu internacional (los asturianos Llan de Cubel y Brenga Astur, por exemplu, visitáronlu nel añu 2001), asina como se faen exhibiciones de baille o d’oficios artesanos.

Alfonso Díaz,

emigrante de Cangues d’Onís n’EEUU y organizador de la representación asturiana nel Potomac, ta mui satisfechu de la participación nel Festival. “Esti añu dime cuenta que la xente yá ta mui entreverada en lo que se refier al conocimientu d’Asturies. Anque ye cierto que tovía hai xente que nun sabe qu’esistimos, hai muncha otra, sobre too de los que frecuenten estos certámenes o de los que-yos gusta la historia, que sí nos conocen. Prueba d’ello ye que dalgunos van al tendayu astur pa saludar y tomar un culín (los más atrevíos yá quieren escancialu ellos), otros van a preguntar por Brenga Astur y Llan de Cubel, a los qu’escucharon otros años, y dalgunos quieren saber de los sos parientes de va dos o tres sieglos. Hebo una persona que vieno con un documentu en Mexico nel añu 1691, redactáu polos sos antepasaos al llegar a la ciudá dende Llanes”.

Amás d’organizar el puestu asturianu nel que nun faltaben revistes, semeyes, música y folletos sobre la rexón, Alfonso Díaz dio dos charres sobre Asturies, repasando la mitoloxía, la cultura, la música y la historia de la comunidá. “Quiero dar les gracies a tola xente que dende Asturies apurrió lo que pudo de diferente manera. A l’Axencia Asturiana d’Emigración, a la Fundación Belenos, n’especial a Astur Paredes y a Fernando Montes de Brenga Astur pola so guía colos contactos y los testos, y tamien a Art Zoeller, quien fue mui valiosu nel nuestru stand”, terminó Díaz, trabayador incansable, quien yá prepara la edición del Festival Celta del Potomac del añu qu’entra.

Les descendientes de la diáspora asturiana nel Conu Sur tán acabantes de constituíse como asociación p’afondar nes rellaciones personales y culturales con Asturies, amás de p’allegase a la ‘inminente tresformación’ de la realidá de les comunidaes asturianes n’America del Sur. Con ello, l’Asturianía moza americana quier xenerar un cambiu qu’ayude a arriquecer el patrimoniu social, cultural, políticu y económicu d’Asturies n’America.

Los mozos de los Centros Asturianos de Buenos Aires y Mendoza, del uruguayu de Montevideo, de Santiago de Chile, Valparaísu y San Fernando de Chile, col apoyu del Conseyu de la Mocedá del Principáu d’Asturies, marcaron unos puntos fundacionales colos que busquen, ente otres coses, el fortalecimientu de llazos ente los integrantes de les comunidaes asturianes en Llatinoamerica; la participación con voz propia y activa nel procesu de reforma de la llei d’Asturianía prevista pa esti añu; asina como facer intercambios culturales con Asturies.

Dende’l Principáu d’Asturies y el Conseyu de Comunidaes Asturianes apoyaron l’aniciu d’esti movimientu que l’añu pasáu organizó en Mendoza un cuentru de descendientes mozos del Conu Sur y que foi tou un esitu.

El Conseyeru de Xusticia, Seguridá Pública y Rellaciones Esteriores, Francisco Javier García Valledor acudirá, invitáu pol Centru Asturianu na capital de Francia, esti sábadu día 17 de xunu a la Fiesta de la Sidra que se celebra na capital francesa organizada polos emigrantes del Centru Asturianu de París. Como invitada especial nesti actu, la cantante Mari Luz Cristobal Caunedo va actuar acompañada del gaiteru mozu, Llorián García

La fiesta qu’escomenzará a les 16:00 hores de la tarde y va allargase hasta les 23 hores de la nueche, va celebrase nes vieyes dependencies d’una ilesia croata nel 124 de la rue de Bagnonet. Los emigrantes asturianos en París prepararon esti eventu con un gran despliegue informativu nel qu’inclúin folletinos en frances y castellán desplicando l’orixe de la sidra y la so producción n’Asturies, al mesmu tiempu que despliquen la peculiaridá de verser le cidre, o escanciáu astur.

A la fiesta a parte del consejeru que va tar na presidencia d’honor xunto a la Presidenta del Centru Asturianu de París, Pilar García Fernández, van asistir el Presidente de la Federación Internacional de Centros Asturianos FICA, Jose Luis Casas; Manuel de la Cera, Presidente del Conseyu de Comunidaes y la Directiva del Centru Asturianu de Laussanne (Suiza).

Chorizos a la sidra, callos, empanaes, fabada, tortiella, casadielles, quesu Cabrales, sidra natural y sidra dulce, van ser la columna vertebral del menú de la fiesta, na que nun van faltar los artistes asturianos: Oscar Perez Muiña, gaiteru emigrante; la gran dama de la canción asturiana, Mari Luz Cristóbal Caunedo, acompañada pol gaiteru mozu Llorián García y un grupu de baillarines, especialistes en dances tradicionales asturianes del grpu Na Señardá.

El Centru Asturianu-Casa d’Asturies del Uruguay, en collaboración cola Axencia Asturiana d’Emigración del Gobiernu del Principáu d’Asturies y l’Academia de la Llingua Asturiana, va celebrar ente los díes 20 y 23 de xunu les primeres xornaes sobre la llingua y la cultura d’Asturies, de la mano del profesor y academicu, Pablo Xuan Manzano Rodríguez.

Les xornaes van tar dividíes en cuatro charres a lo llargo de los díes 20 y 23 de xunu que van repasar la mitoloxía tradicional asturiana, los XXV años d’esistencia de l’Academia de la Llingua Asturiana, la emigraicón asturiana n’America, teniendo en cuenta especialmente el casu de L’Uruguay, asina como una conferencia sobre Asturies y los asturianos, too ello de la mano del profesor y academicu de la llingua asturiana, Pablo Xuan Manzano Rodríguez.

Los socios del Centru Asturianu de Málaga axúntense’l miércoles día 19 de xunu, a les 15 hores, na so sé social pa esfrutar con humor d’una bona mesa na tercer xinta organizada dientro de la convocatoria que llamen ‘Les fabes EN PAZ’. Esta ye una de les actividaes más nomaes de los asturianos que viven en Málaga.

Ente los invitaos nesta ocasión figuren Francisco Arcas, profesor d’Hestoria Contemporánea de la Universidá de Málaga, y l’asturiana Rosa Pedrero, llicenciada n’Arte, que trabaya col anterior nel proyectu de recuperación de la memoria hestórica pal archivu que creará la Diputación Provincial.Tamién s’espera la presencia de Bernardo Díaz Nosty, director del Departamentu de Periodismu y catedráticu de la Universidá de Málaga.

La celebración d’estes xintes pola paz va volver facese nel mes d’ochobre, tres de les vacaciones de branu.

El conseyeru de Xusticia, Seguridá Pública y Rellaciones Esteriores, Francisco Javier García Valledor, va asistir el prósimu día 17 de xunu a la tradicional Fiesta de la Sidra qu’organiza l’Asociación Sociocultural Asturiana en París (ASCAP) coincidiendo col so décimu aniversariu. Nel actu tamién van tar presentes José Luis Casas Villanueva, presidente de la Federación Internacional de Centros Asturianos, y Mª Antonia Fernández Felgueroso, conceyala de Servicios Sociales de Xixón, xunto a un representante del Conseyu de Comunidaes.

L’apertura de la Fiesta de la Sidra de l’ASCAP va correr a cargu del gaiteru Oscar Pérez Muina, al que siguirá l’actuación de la cantante asturiana, Mariluz Cristobal Caunedo. Considerada la gran dama de la canción asturiana, Cristobal Caunedo va tar acompañada pol gaiteru mozu Llorián García y por una pareya de baille tamién llegaos d’Asturies.

La cellebración, na que van poder degustase productos típicos de la tierra como les empanaes, los chorizos a la sidra, la fabada, los callos, la tortiella, les casadielles y los quesos cabrales y manchegos, va terminar cola actuación del grupu Barrio 17 y de la formación David y la Orquesta Los Latinos, qu’amenizarán la velada hasta les once la nueche.

A lo llargo del día, va celebrase’l sortéu de dos billetes d’ida y vuelta a Asturies n’autocar, ufiertaos por Iberolines (Internorte-Alsa-Intercentro); un regalu sorpresa cedíu pol Bancu Santander Central Hispano; y una caxa de sidra natural ufiertada pola ASCAP. La Fiesta cunta cola collaboración de l’Axencia Asturiana d’Emigración del Gobiernu del Principáu d’Asturies.

El pasáu domingu, día 28 de mayu, el Conceyu de Cultura Tradicional Vezos Astures representó l’aguilandu ‘Os Reises’ en Madrid, como una de les actividaes que se desarrollaron dientro de les xornaes ‘Una güeyada a Fuentes del Narcea’ que se celebraron a lo llargo de tola fin de selmana nel Centru Asturianu de la capital.

‘Os Reises’ o ‘A Reisada’ ye’l nome col que se conoz na fastera suroccidental asturiana, especialmente nel conceyu d’Ibias y parte del d’Allande, l’aguilandu nel que les compañes de xente mozo, formaes por homes mazcaraos d’estremaos personaxes, dalgunos femeninos, andaben pidiendo peles cases, cantándo-yos a los vecinos y faciendo pequeños representaciones.

“Esti tipu d’aguinaldos dexaron de celebrase col empiezu de la Guerra Civil, anque na decada de los cuarenta hebo dalgún intentu de tirar por ello. Namás nel añu 1972 un piñu de xente mozo d’Ibias lu celebraron otra vuelta, pero namás se fizo esi añu y nun tuvo continuidá”, desplica la responsable de Cultura de Vezos Astures, entidá que cunta con abondu material nel so archivu, gracies a los trabayos de campu recoyíos.

Sobre esti material, Vezos Astures iguó copies de disfraces y mázcares, preparando espresamente los cantares de pidida d’esti aguilandu, y llevó la so representación a un actu celebráu la pasada fin de selmana na Quinta Asturies, por encargu del Centru Asturianu de Madrid.

La Conseyería de Xusticia, Seguridá Pública y Rellaciones Esteriores, va presentar nel Conseyu de Gobiernu del 1 de xunu, una propuesta d’alcuerdu pola que s’autoriza la firma d’un conveniu de collaboración cola Federación d’Agrupación de Folclore Asturianu (F.A.F.A.), pal desarrollu d’actividaes rellacionaes col folclore nos Centros Asturianos. L’Axencia Asturiana d’Emigración desarrolla d’esta manera’l Plan Integral d’Emigración (2004-2007).

El Plan Integral d’Emigración (2004-2007) recueye na so quinta área una serie de programes de promoción d’Asturies nel esterior, col oxetivu de mover actuaciones a favor de la proyección d’Asturies y de lo asturiano fuera de la nuestra Comunidá Autónoma. Y dientro d’esti área recueyese la llinia d’actuación 5.2 de difusión de la cultura asturiana, cuyu oxetivu ye apoyar les manifestaciones de cultura asturiana que se fain fuera d’Asturies.

La Federación de Agrupaciones de Folclore Asturianu (FAFA), ye una organización qu’axunta a un cientu de grupos del Principáu d’Asturies pal desarrollu d’actividaes rellacionaes col folclore nos Centros Asturianos. La novedá pa esti añu 2006 ye que la FAFA agrupa tamien y promociona a grupos de folclor non sólo de l’Asturies interior, sinón tamien a grupos, cada vez más sólidos y numberosos, de folclore asturianu na emigración.

Pa poder facer les actividaes previstes nel 2006 quier aprobase un presupuestu de 57.000 euros con destín a esta actividá.