Vezos Astures llevó l’aguilandu Os Reises a Madrid

El pasáu domingu, día 28 de mayu, el Conceyu de Cultura Tradicional Vezos Astures representó l’aguilandu ‘Os Reises’ en Madrid, como una de les actividaes que se desarrollaron dientro de les xornaes ‘Una güeyada a Fuentes del Narcea’ que se celebraron a lo llargo de tola fin de selmana nel Centru Asturianu de la capital.

‘Os Reises’ o ‘A Reisada’ ye’l nome col que se conoz na fastera suroccidental asturiana, especialmente nel conceyu d’Ibias y parte del d’Allande, l’aguilandu nel que les compañes de xente mozo, formaes por homes mazcaraos d’estremaos personaxes, dalgunos femeninos, andaben pidiendo peles cases, cantándo-yos a los vecinos y faciendo pequeños representaciones.

“Esti tipu d’aguinaldos dexaron de celebrase col empiezu de la Guerra Civil, anque na decada de los cuarenta hebo dalgún intentu de tirar por ello. Namás nel añu 1972 un piñu de xente mozo d’Ibias lu celebraron otra vuelta, pero namás se fizo esi añu y nun tuvo continuidá”, desplica la responsable de Cultura de Vezos Astures, entidá que cunta con abondu material nel so archivu, gracies a los trabayos de campu recoyíos.

Sobre esti material, Vezos Astures iguó copies de disfraces y mázcares, preparando espresamente los cantares de pidida d’esti aguilandu, y llevó la so representación a un actu celebráu la pasada fin de selmana na Quinta Asturies, por encargu del Centru Asturianu de Madrid.