Convocatories

La Comarca la Sidra busca un responsable pal so Serviciu de Normalización Llingüística. Les funciones del puestu son la torna de documentos, guíes turístiques y otres publicaciones al asturianu.

Amás dende’l puestu van impulsase campañes de normalización llingüística nos sectores d’hostelería y comerciu, amás d’otres de dinamización cultural en llingua asturiana.

Pa poder optar al puestu tien que se tar en posesión d’una titulación universitaria media y amás tener formación en llingua asturiana.

Nes bases danse tolos detalles de la convocatoria, que termina’l próximu día 17 d’ochobre.

Bases completes de la convocatoria

Según anuncien na so páxina web, el próximu vienres 10 d’ochobre va presentase en sociedá l’Atenéu Cultural Xuan María Acebal, con motiu del 130u aniversariu del poema acebalianu “El Amor del Hogar”. L’Atenéu ye un colectivu “pa la defensa del mundiu rural asturianu, pa la promoción y revitalización de los elementos culturales (tanto materiales como inmateriales) qu’hestóricamente configuraron a Asturies como País, y pal re-descubrimientu de la nuesa Hestoria dende una perspectiva asturiana dafechu”.

L’Atenéu va trabayar temién “el campu de la lliteratura clásica asturiana”. N’esi sen, comenten dende la organización, “va trabayase na recuperación, l’estudiu y la reedición de la lliteratura asturiana menos conocida”.

L’actu de presentación va celebrase n’Alborá Llibros, en Xixón, a les 19:30 hores. Nel mesmu van presentase les actividaes de la organización la so directiva y amás, va celebrase una llectura de poemes de Xuan María Acebal a cargu de diferentes persones de trayectoria venceyada a la lliteratura, la politica y los medios de comunicación.

Páxina de l’Atenéu Cultural Xuan María Acebal

Les xornaes “Llabor en tienda” lleguen a la so tercer xornada güei miércoles. A les 10 hores Fernando Álvarez-Balbuena García va presentar “Programa d’investigación n’encuestación toponímica”. A les 10:45 hores Patrick W. Zimmerman, de la Universidá de Carnegie Mellon, EE.XX., va presentar el proyectu d’investigación “Nacionalismu domesticáu: l’asturianismu dende la Transición”.

A les 12 la mañana, Alfonso García Leal, de la Universidá d’Uviéu, va presentar el proyectu “Fakilo” d’información bibliográfica de colecciones documentales medievales de la Península Ibérica.

El proyectu ESLEMA van esplicalu Xulio Viejo y María Cueto, a les cinco la tarde, mientres que sobre’l mesmu tema, Roser Saurí i Colomer y Johan Ari Larusson van falar a les 17:45.

Aresenio Coto va pesllar la xornada cola llectura de “El traductor asturianu sobre tecnoloxía Apertium.

Mañana xueves va celebrase la xornada última de “Llabor en tienda” coles últimes presentaciones de los proyectos de llingüística asturiana que tán en marcha n’estos momentos.

Esti llunes 6 d’ochobre entamaben les Xornaes cola presentación a les diez de la mañana del proyectu AMPER de fonética y prosodia del asturianu, que presentó Carmen Muñiz Cachón de la Universidá d’Uviéu y a les 10,45 la desplicación de la investigación sobre Gramática Generativa de la llingua asturiana “Allugamientu de los pronomes n’asturianu y periferia izquierda sintáctica” que ta desenvolviendo Francisco Rubiera na Universidá de Georgetown. La mañana finó a les 12 cola presentación por Antonio Meilán de la Universidá d’Uviéu del “Proyectu Dámaso Alonso” sobre’l gallego-asturianu.

Los proyectos d’investigación llingüística nel ámbito lleonés entamaron la tarde, dende les 17 hores cola presentación d’Héctor García Gil, de la Universidá de Lleón, pa siguir a les 17,45 col proyeutu “Papel de los escritores nel procesu de recuperación del asturianu” que presentó Xuan Santori Vázquez.

Programa completu de les Xornaes

Los cursos, qu’entamen esti mes d’ochobre con trés niveles: básicu, conversación y espresión escrita y traducción. Tolos cursos van ser n’horariu de tarde dos díes a la selmana y la matrícula va poder formalizase nes Oficines d’Atención al Ciudadanu del Conceyu de Xixón, nos Caxeros Ciudadanos o na páxina del conceyu de Xixón hasta esti llunes.

El preciu de la matrícula son 15 euros y la duración de los cursos de 40 hores. Tamién, n’esti cursu, la UP de Xixón ufre’l cursu “Moos de vistir, maneres de vivir” impartíu por Fe Santoveña Zapatero n’esti casu, nel Muséu del Pueblu d’Asturies.

L’asociación cultural Colectivu Misiva, de La Pola, conceyu de Siero, tien abiertu’l plazu pa presentase al IV Concursu de Microrrellatos “Lleendes urbanes”. Un concursu nel que se pueden presentar obres n’asturianu y en castellán, siendo’l tema del microrrellatu llibre y nun pudiendo pasar de les venticinco llinies.

Pueden presentase tres microrellatos y ha facese unviandose al apartáu de correos 113 de La Pola (Siero), 33510 Asturies. El plazu de presentación finaliza’l 20 de payares del 2008.

El primer premiu ta dotáu con 700 euros y el segundu con 300, faciendose públicu’l el 16 d’avientu.

Asturnews ufre les bases del concursu:

1. Participantes:

Van poder participar persones de cualquier nacionalidá, de forma individual o coleutiva, que, a la fecha d’entrega de los trabayos tengan fechos los 14 años.

2. Tema y Formatu:

El tema va ser llibre, pero tanto los personaxes como los guiones y la pinta final han ser ineditos y orixinales y han presentase en formatu DIN A-4. Los dibuxos van poder facese tanto en blanco y negro como en color, emplegando la tecnica que se vea más afayadiza. Nun hai estensión acotada.
Los testos han tar escritos n’asturianu. Nesti sen, pa estimar la obra, el xuráu va valorar los trabayos en conxuntu, ilustración y testu, pero cincando más en testu lliterariu.

3. Entrega

Los trabayos han entregase en Serviciu de Normalización Llingüística de la Mancomunidá de la Comarca de la Sidra na Cai Escueles de Paraes, n u 47 – 33529 Nava, o bien nes Oficines d’Información Xuvenil de la Comarca, Cai La Laguna, baxos 33520 – Nava y Centru Cultural San Juan de Capistrano C/ Asturias 22, 33300 Villaviciosa. Han presentase nun sobre zarráu nel qu’habrá de conseñase’l títulu de la obra y el seudónimu del/l’autor/a o autores Xunta la obra presentada, y dientro del mesmu sobre inxertarase otru (plica). Nesti últimu (na parte de fuera) conseñaráse’l títulu de la obra y (dientro) los datos que van darreu: nome y apellíos, señes, telefonu, títulu y seudónimu, y copia del DNI o tarxeta residente.
El plazu pa presentar los trabayos peracaba’l 17 de Payares de 2008 (inclusive)

4. Fallu del Concursu

El xuráu va tar formáu principalmente por creativos, artistes y ilustradores cualificaos, periodistes y profesores d’asturianu. El so fallu va ser públicu y inapellable, comunicándolu darreu a los concursantes premiaos y a los medios de comunicación autonómicos.

5. Premios

El xuráu va conceder los siguientes premios:
-.Un primer premiu de 500 € al meyor trabayu presentáu.
-.Dos accesit de 200 € caún pa los dos trabayos finalistes.
(premios arreyaos a les correspondientes retenciones fiscales).

6. Otros

Delles obres seleccionaes van formar parte d’una esposición que va viaxar polos diferentes centros culturales de la Comarca de la Sidra y de fuera d’esta que lo soliciten. Arriendes de lo anterior, la organización va editar una publicación coles obres premiaes.
En acabando la esposición los trabayos volveránse a los autores que lo pidan.
La organización d’esti concursu reserva’l derechu d’usar pa dalgún tipu de material promocional, los dibuxos presentaos, faciendo referencia al autor.
La participación nesti concursu supón la total aceptación de les presentes bases.

La Xunta Cultural Rebelgu, de L.lena, convoca un concursu maquetes al que se pue presentar cualquier grupu solista con dos temes y hasta’l 6 d’ochobre. Ye preciso presentar una grabación.

Los premios son de 1.000 y 300 € y los grupos esbillaos tocarán los díes 10 y 11 d’ochobre y los finalistas escoyíos tocarán el día 12.

Asturnews ufre les bases completes.

Bases del concursu maquetes

Embaxo’l lema “Por un Estatutu de primera: Sáca-yos la roxa al PP y al PSOE” Izquierda Xunida-Bloque por Asturies va celebrar el so actu políticu esti próximu 8 de setiembre, a partir de les doce la mañana, na capital del conceyu de Casu, El Campu. Na celebración van participar Los Verdes y Lliberación.

La Sala Borrón del Institutu Asturianu de Mocedá (C/ Xeneral Yagüe 3, Uviéu) agospia, per segundu añu consecutivu, la Muestra Xoven d’Artes Plástiques de La Rioxa, nel marcu de los intercambios establecíos ente’l mentáu Institutu y l’Institutu Rioxanu de Mocedá p’afalar l’arte mozu ente dambes comunidaes autónomes. La Muestra d’estos artistes rioxanos va tar abierta dende’l 1 al 17 de setiembre.

La esposición contién obres de los galardonaos nes modalidaes de pintura, fotografía, escultura, cómic y multimedia de la Muestra rioxana. En total, son 7 obres na modalidá de pintura, 4 en fotografía, 4 n’escultura, 3 na de cómic y 6 en multimedia.

Ente los participantes, destaquen Israel Rodríguez Cítores, ganador d’abondos premios na Muestra n’años consecutivos y que nesta ocasión algamó’l primer premiu na modalidá de fotografía y el segundu na modalidá de Multimedia; Jana Garbayo Vidaurreta, ganadora de la modalidá de pintura; y Carlos Ramírez de la Concepción y Daniel Llaría Gaspar, ganadores de la modalidá d’escultura.