Convocatories

Esti vienres 19, a les 19:30 hores, va presentase nel salón d’actos de la biblioteca Xovellanos de Xixón el númberu 2 de la revista Erada (revista d’historia contemporánea d’Asturies). Nel actu va participar Rafael Rodríguez Valdés, director de la revista, amás de dellos de los sos autores.

Esti segundu volume de la publicación tien na guerra civil y la dictadura franquista la temática protagonista de bien de los artículos.

Los hestoriadores Rubén Vega y Irene Díaz escriben sobre los testimonios de la represión; Xosé Miguel Suárez fala de la incautación de la Biblioteca Popular Circulante de Castripol poles autoridaes franquistes; y Valentín Álvarez, Nicolás Alonso y Otilia Requejo faen un repás pela arqueoloxía de la guerra civil n’Asturies. Otru de los temes que se traten ye’l de los vociadores de prensa al empiezu del sieglu xx, asuntu qu’aborda l’estudiosu Víctor Rodríguez Infiesta. Como nel primer númberu, tamién s’inclúin reseñes de llibros a cargu de dellos autores, como Javier Cubero.

El Conceyu d’El Franco tien abiertu’l plaz, hasta’l 19 d’avientu p’apuntase al cursu de 50 hores sobre la cultura de la fastera del Eo-Navia. Un cursu nel que 30 van ser de llingua eonaviega y 20 de sociollingüística, mitoloxía, flora, fauna y lliteratura asturiana del Eo-Navia.

El cursu entama’l próximu día 23 d’avientu y va celebrase los martes y xueves de 5 a 8 la tarde nel Centru d’Empreses de Novales n’A Caridá.

P’apuntase hai que mandar un corréu a adl@elfranco.net o llamar a la responsable, Teresa, al teléfonu 985 478 737.

El Conceyu de Mieres, pente medies de la Casa de la Cultura “Teodoro Cuesta”, y col apoyu de la Conseyería de Cultura y Turismu d’Asturies, al traviés de la Oficina de Política Llingüística, convocaron ayeri’l XVIII Premiu “Teodoro Cuesta” de Poesía 2008, pal que puen presentase orixinales hasta’l 12 d’esti mes.

Nel prestixosu premiu puen toles persones que lo deseen con un poemariu inéditu, orixinal y escritu en llingua asturiana, entregando orixinal y cuatro copies. La entrega podrá facese per corréu certificáu o entregándolo en mano en: Casa de Cultura “Teodoro Cuesta”(secretaría). Manuel Llaneza 8, 33600, Mieres. Asturies.

Los poemarios han dir ensin firma, con alcuñu o lema y figurando’l so nome y les señes en sobre zarráu.

Concederáse un únicu premiu dotáu con 4000€, contemplándose promover la so publicación. Sicasí, el xuráu podrá declarar desiertu’l premiu y el fallu va ser inapelable.

Pa más información pue acudise a la Casa de Cultura “Teodoro Cuesta” o llamar a los teléfonos 985 45 62 92 o 985 45 06 66, escribir a cultura@ayto-mieres.es ó llingua@ayto-mieres.es ó consultar la so web www.ayto-mieres.es/cultura

Esti vienres, 28 de payares, a les ocho la tarde, el hall del Teatru Prendes de Candás, va acoyer la presentación de la última novela de Xurde Fernández, “La espera”, qu’asoleya Suburbia Ediciones.

Na presentación va participar, amás del autor, la escritora Marián García.

Rubén d’Areñes, autor del conceyu de Siero, va presentar esti vienres a les ocho la tarde nel Club de Prensa Asturiana d’Uviéu, el llibru “Los venticinco pasos”, el so primer poemariu, qu’edita Universos y que recibió’l Premiu Nené Losada Rico.

Rubén d’Areñes tien espublizaos testos en revistes como Lletres Asturianes y Formientu. Ye ganador de dellos premios como l’Elvira Castañón y Alfonso Camín, asina como’l Horreo de Carbayedo de microrrellatu, en dos ocasiones.

La Conseyera de Bientar Social, Teresa Ordiz, l’Alcaldesa de Xixón, Paz Fernández Felgueroso, el Rector de la Universidá d’Uviéu, Vicente Gotor Santamaría, y el Presidente de la Fundación Vodafone, José Luis Ripoll, inauguraron ayeri llunes les Xornaes sobre Accesibilidá Universal y Nueves Tecnoloxíes pa la Discapacidá organizaes pola Axencia Asturiana pa la Discapacidá de la Conseyería de Bienestar Social, la Fundación Vodafone-España y la Universidá d’Uviéu (Grupu de Criptografia y Seguridá Tic) que se van desendolcar hasta güei martes en La Llaboral de Xixón.

Con estes Xornaes quier dase a conocer la importancia d’algamar la igualdá d’oportunidades plena. El respetu a la diversidá humana y la equiparación de derechos de toles persones, son bases fundamentales de la sociedá y que les barreres nel entornu constitúin torgues más graves a la participación social, que les llendes funcionales de les persones.

Asina mesmo, búcase promover la cultura de l’accesibilidá universal y diseñu pa tola ciudadanía y conocer los avances nes TIC pa la promoción de la vida autónoma y la inclusión de les persones con delles capacidaes funcionales, asina como fomentar l’intercambéu d’información y conocencia nesti ámbitu.

El Centru Municipal Integráu Pumarín-Xixón Sur acueye güei, llunes 3 de payares, a les siete y media la tarde, un festival de tonada cola actuación d’Ismael Tomás Montes y Begoña Rodríguez Aranguren, acompañaos pol gaiteru Jesús Noriega Galguera.

Nel certame, organizáu pol Conceyu de Xixón en collaboración cola Asociación d’Intérpretes de Canción Asturiana (AICA), va actuar el monologuista Armando Felgueroso “Min de Les Pieces”.

L’Academia de la Llingua Asturiana entama güei la presentación del I Conceyu Internacional de la Llingua Asturiana. Más de mil años d’historia d’una llingua nel país de los ástures güei a les 12 hores nel Hotel Principado, asitiáu na cai San Francisco d’Uviéu.

Esti Conceyu, que tendrá llugar na Facultá de Filoloxía de la Universidá d’Uviéu los díes 4, 5 y 6 de payares de 2008, inxértase dientro de les Xornaes Internacionales d’Estudiu que tolos años entama l’Academia de la Llingua Asturiana. Nél participarán un bon númberu de profesores ya investigadores de distintes universidaes españoles y europees que fadrán les sos aportaciones en dos grandes estayes: la histórica y la llingüística.

Nel actu intervendrán la Presidenta de l’Academia de la Llingua Asturiana, Ana Mª Cano, y Francisco Javier Fernández Conde y Xosé Antón González Riaño, miembros del Comité entamador del Conceyu.

La Tertulia Cultural El Garrapiellu entama en collaboración col Ayuntamientu de Xixón un Cursu de Monitor de Xuegos y Deportes Tradiciones al cargu de Carlos Suari, llicenciáu en Ciencies de l’Actividá Física y del Deporte, espertu en cultura física tradicional y Doctorandu en Ciencies de la Educación, amás de presentador del programa deportivu “Al aldu: a galmiaes” de la TPA. La duración del cursu ye de 52 hores y entama’l próximu 3 de payares nel Pueblu d’Asturies de Xixón.

El cursu va impartise de llunes a xueves, de 16 a 20 hores y va durar hasta’l sábadu 22 de payares, cuando va facese la evaluación y despidida,

Los oxetivos del cursu son acercar al alumnáu a la realidá de la cultura física tradicional d’Asturies, nel conocimientu de los xuegos y deportes tradicionales Asturianos (XDTA). N’esi sen van dase les ferramientes d’intervención que favorezan l’autonomía divulgadora de les persones que participen nel cursu y van a mostrase los ámbitos deportivu y educativu de los XDTA.

Los futuros monitores van poder co-diseñar y collaborar n’actividaes de divulgación de la cultura física, enseñar los XDTA a nivel d’aproximación o iniciación, trabayar na preparación, igua y colocación de recursos materiales nes muestres o demostraciones de XDTA, co-organizar los grupos humanos implicaos nestes actividaes y facilitar l’averamientu del públicu a los XDTA manexando unos mínimos fundamentos didácticos, hixénicos, motores y culturales.

Pa inscribese hai que se poner en contactu con cola responsable de deportes tradicionales d’El Garrapiellu, Sabel Tuñón, nel 653 32 86 57. Les tases son de 40 euros pal públicu xeneral, mientres que los socios d’El Garrapiellu, tán esentos.

PROGRAMA DEL CURSU
Bloque 1. Bases teóriques pal estudiu de los XDTA (10 hores)

• Conceptos xenerales: el xuegu y el xugar
• La cultura física asturiana: orixe y families
• La deportificación y les sos consecuencies
• Instituciones y llexislación nos XDTA
• Materiales y recursos (in)formativos

Bloque 2. Salú, seguridá y acondicionamientu físicu nos XDTA (10 hores)

• Elementos de seguridá y prevención nos XDTA
• Cualidaes físiques básiques y perceptivo-motrices nos XDTA
• Principios pal acondicionamientu físicu pa los XDTA
• Entrenamientu y programación nos XDTA
• Atención urxente del xugador-deportista mancáu XDTA

Bloque 3. Difusión y enseñanza de los XDTA (10 hores)

• Los eventos de divulgación de los XDTA
• Fundamentos didácticos na enseñanza de los XDTA
• Espaciu, material y adaptaciones de los XDTA
• Taller de reciclaxe de XDTA
• Proyectos d’enseñanza y difusión de los XDTA

Bloque 4. Análisis y aplicación de los XDTA (20 hores)

• Xuegos infantiles de cai
• Bolos I: Modalidaes minoritaries
• Bolos II: Cuatriada, birlle y bolu celta
• Lluches: tiru cuerda, baltu, pulsu, palu y otres
• XDTA na naturaleza: acuáticos y otros
• XDTA llaborales: la madera, la siega y otros
• Bailles-xuegu y otros de soporte musical
• XDTA de precisión: llave, gomeru, rana y otros
• XDTA de llanzamientu: barra, guiada y otros
• XDTA de carrera: llecheres, panoyes y otros

La Fundación Belenos, qu’asoleya la revista “Asturies; memoria encesa d’un país” ta acabante d’abrir el plazu p’apuntase a les novenes xornaes d’estudios asturianos qu’entamen pa los próximos díes 22 y 23 de payares en La Puela col títulu “El paisaxe asturianu, o cómo la hestoria escribe la tierra”. L’oxetivu d’estos seminarios “será ufiertar averamientos rigurosos a desemeyaos aspectos de la cultura, la hestoria, la xeografía o la etnografía asturiana”.

L’eventu ta abiertu al públicu interesáu, y cuntando cola participación d’espertos en caduna de les materies a tratar. El Novenu Seminariu tará dedicáu monográficamente a “El paisaxe asturianu, o cómo la hestoria escribe la tierra” y nél “va apurrise una visión xeneral de la cuestión, y, asinamesmo, afondaráse na trescendencia que los cambios de les últimes décades na xeografía y na hestoria tienen pal conxuntu de la sociedá asturiana, asina como se tentará d’analizar la xenealoxía hestórica, económica y antropolóxica d’esos cambios”.

Too ello, comenten los organizaroes, “enxertao nun analís de la conformación del paisaxe asturianu como una consecuencia d’un procesu d’antropización dende unos presupuestos culturales, económicos y sociales concrretos, que fonon a modelar la xeografía asturiana talamiente como la conocemos anguaño”. Asina mesmo, “rescamplarase la potencia d’esi paisaxe como un activu económicu de futuru”.

El Seminariu entama’l 22 de payares a les 9.30 hores, con un almuerzu. A les 10,00 h. va celebrase l’acoyida de los participantes y entrega de material. Pa, darréu, facer la presentación del Seminariu y actu d’inauguración.

A les 11, Xosé Nel Riesgo. Xeógrafu y técnicu el desarrollu llocal va dar llectura a la conferencia . “Asturies, territoriu desartiticuláu: desorganizaciones, desmantelamientos, desconciertos”.

Dempués d’una pausa, p’hacia la una, Alberto Fidalgo López, Inxenieru de montes, va esponer “El monte asturianu: de los usos tradicionales a los abusos d’anguaño”. Dempués de la xinta, a les 16,30 h. l’arquitectu Xuan Pedrayes Obaya va falar d’“El feismu y la movilidá sobremoderna na aldea asturiana”.

A les seis y media la tarde José Alba, economista de la Universidá d’Uviéu va dar una conferencia: “El valir económiu del paisaxe asturianu. Les infraestructures ya’l so impactu nel territoriu ”.

La primer nuecha va pesllase con un Filandón y “Fiesta asturiana de nueite” nel Café Centro de La Puela. En collaboración cola Banda de Gaites el Rapigueiro y la Xunta pola Defensa de la L.lingua Asturiana no Suroccidente.

La segunda y última xornada va celebrase’l 23 de payares entamando a les 10,30 hores cola proyección del documental “Paraiso Industrial”, de Conchi Rodríguez y Kela Coto. Darréu Ignaciu Llope va moderar la mesa redonda de pieslle: “El paisaxe asturianu como activu de desarrollu y futuru”, onde van participar Enrique Álvarez de Turiso de SOS Cuideiru, Txomin Goñi Tirapu. Presidente de l’Agrupación de Colectivos Asturianos (ACA), José Alba. Economista, Xuan Pedrayes. Arquitectu, Conchi Rodríguez. Directora de cine, Xosé Nel Riesgo. Xeógrafu y miembru de la Fundación Belenos.

Apuntase ye posible hasta’l miércoles 16 payares. Hai 40 places disponibles y el preciu ye de 40 euros. La matriculación considerárase fecha namás que col ingresu na cuenta del preciu de matrícula na cuenta de la Fundación Belenos: 2048-0000-26-0340123307.

L’agospiu opcional en réxime de pensión completa na “Nueva Allandesa” tien un preciu por persona de 60 €. Pa cualesquier dulda los interesaos puen ponese en contactu nos teléfonos 985 24 48 11 y 616 24 23 19 o nos correos lletrónicos farriegu@telefonica.net y belenos@asturies.org