Convocatories

La Estaya de la Llingua Asturiana d’Avilés entama un cursu de perfeccionamientu de la llingua asturiana. El cursu entama’l 2 d’ochobre y va durar hasta’l 27 de payares. Con trenta hores de duración, el cursu va celebrase ente les 16’30 y les 18’30. El cursu inclúi amás dos talleres sobre cultura asturiana, unu dedicáu a la figura del lliteratu avilesín Marcos del Torniello y otru a la mitoloxía asturiana.

El cursu va desenrrollase nel centru d’estudios “Conde del Real Agradu” y la matrícula va poder facese per corréu na dirección: estayallingua@ayto-aviles.es o per teléfonu llamando al 985510235 o al 663820132 n’horariu de 8 a 3; o en persona, na Casa Cultura d’Avilés.

La Estaya de la Llingua del Conceyu d’Avilés ye un muérganu dientro de la Conceyalía de Cultura enfotáu na normalización y el desendolcu de la llingua asturiana en toles estayes de la vida social y cultural.

La Sala Savoy de Xixón va acoyer güei, vienres 29 d’agostu, a les 00:00 hores, l’actuación de los vascos “El mentón de Fogarty”, que van van dar un conciertu siguíos pol grupu asturianu de surf “Kings of Makaha”.

Esti sábadu, a les 11:30, el Colexu Begoña va acoyer la presentación del primer númberu de la revista “L’Asturianista”, publicación oficial del partíu. La revista, qu’inicialmente tendrá una periodicidá cuatrimestral, ta asoleyada n’asturianu, sacantes un artículu del presidente del PAS, Xuan Xosé Sánchez Vicente en castellán.

Xunto a informaciones sobre’l PAS y el so puntu de vista sobre asuntos de los distintos conceyos, la revista tamién inclúi n’esti númberu delles entrevistes con Sánchez Vicente, y el secretariu d’organización, José Antonio Fernández Alonso.

Na revista anunciénse tamién los planes pal Día de la Nación Asturiana, qu’Unión Asturianista va celebrar esti añu en Cangues d’Onís.

Descarga’l primer númberu de la revista

El Centru Social Okupa Autoxestionáu asitiáu na vieya fábrica de colchones FLEX en Xixón, entamaba ayeri nueves actividaes, con una nueva clase del taller de “Llingua Asturiana” qu’entamara la selmana pasada y la ponencia “La Transición: Mito y realidad”, impartida polos llicenciaos n’Historia Pablo Folgueira Lombardo y Javier Bayón Iglesias.

Güei, xueves 21, a les 19.30 hores va proyeutase’l documental “Después de… no se os puede dejar solos”, cinta grabada nos tiempos de la transición qu’analiza los cambios ya impresiones de la xente del tiempu. D’otru llau, mañana vienres, l’actividá va ser un recital poéticu col que s’inaugura’l café-teatru a les siete la tarde.

Al mesmu tiempu’l coleutivu CSOA organiza pal domingu dende les cuatro la tardeuna xornada de llimpieza y orde del centru, pidiendo a los vecinos de Xixón qu’aporten materiales, oxetos o muebles que tando en bon usu yá nun seyan necesarios pa ellos.

Apocayá la vieya fábrica de colchones Flex del barriu xixonés de La Calzada foi ocupada por vecinos mozos del conceyu que tán convirtiéndola nun Centru Social Autoxestionáu, onde entamar actividaes empobinaes a la ciudadanía xixonesa. Nesi sen, La Reflexón entama un cursu de llingua asturiana gratuítu al que se puen apuntar toles persones interesaes na llingua patrimonial d’Asturies. Los cursos entamarán esti miércoles 6 d’agostu del 2006 a partir de les 5 de la tarde, onde tolos interesaos puen acudir y participar nesi mesmu momentu.

El cursu tendrá llugar tolos miércoles nel propiu Centru de Cultura La Reflexón, un nuevu y dinámicu centru de cultura popular, que pretende ser una fábrica del activismu cultural asturianu, vanguardista y abiertu a les nueves formes d’espresión cultural y artística.

Amás de los cursos y talleres de llingua asturiana tán previstes abondes actividaes culturales y participatives en munches xeres artístiques y a les que toos tán convidaos a participar y collaborar activamente.

El Centru La Reflexón tien la so sede na Avenida del Princoipe d’Asturies 19.

Güei, xueves 31 de xunetu a partir de les diez de la nueche, el café Varyarte, asitiáu na plaza José Gonzalez “El Presi” de la Corredoria, n’Uviéu, va acoyer l’actuación de los monologuistes de la TPA, Silvino Torre, Carlos Alba “El Pola” y Lluis Antón González col espectáculu “Tres pates pa un bancu”.

La Escuela d’Alcuentros Xuveniles entame un cursu col que s’algama’l títulu oficial del Principáu d’Asturies como monitor de tiempu llibre.

Ta empobináu a mayores de 17 años y son 150 hores teórico-práctiques en dos turnos, del 1 al 15 d’agostu y 4 fines de selmana y del 16 al 30 d’agostu y 4 fines de selmana, con un preciu de 160 euros.

P’apuntase ha llamase al 660 250 762 (Hector) o al 619 561 710 (Armando).

Con motivu de les Fiestes de San Roque del Carbayedo, a facer n’Avilés del 22 al 25 d’agostu del 2008, y col aquel d’animar a la creación lliteraria en llingua asturiana, l’Asociación de Vecinos El Hórreo del Carbayedo, en collaboración cola Estaya de Normalización Llingüística del Ayuntamientu d’Avilés, dependiende del Serviciu de Promoción Cultural de la Conceyalía de Cultura, entama’l II Concursu de Micro-rellatos “L’hórreo del Carbayedo”

Nel mesmu pue participar cualisquier escritor/a en llingua asturiana con un máximu de tres rellatos, que nun puen pasar de les 500 pallabres, siendo la temática llibre.

El plazu pa presentalos piésllase a les 14 hores del día 4 d’agostu y la presentación ha ser pel corréu lletrónicu, unviando los rellatos en formatu WORD a: avvelhorreo@yahoo.es. Los trabayos dirán encabezaos per un TÍTULU y firmaos con un NOMATU/pseudónimu. Les señes del corréu nun puen ser indicatives de l’autoría. El xuráu reclamará dempués , tamién per esta vía, tolos datos a los autores de los rellatos finalistes.

Va dase un primer premiu de 300 € al meyor rellatu y 3 premios consistentes en llotes de llibros valoraos en 100 €, a los tres finalistes.

El 6 d’agostu un xuráu entamáu por reconocíes personalidaes de la cultura asturiana determinará los ganadores. El llunes, 25 d’agostu, los cuentos ganadores van ser lleíos por contadores profesionales o polos mesmos autores nel campu la fiesta (parque del Carbayedo), a les 20:00 hores. A esi actu han asistir los ganadores, pa recoyer los premios.

Tolos rellatos presentaos, premiaos o no, van asoleyase nuna esposición al aire llibre nel campu les Fiestes , abierta al públicu los díes que éstes duren.

La Casa Conceyu de Xixón acueye güei, miércoles 23 de xunetu, a les 13:00 hores, nel Salón de Recepciones, la presentación del “Diccionariu Toponímicu del Conceyu de Xixón”, un volume que va incluyise na colección “Memoria de Xixón” y nel que Ramón d’Andrés, miembru de l’ALLA, profesor de la Universidá d’Uviéu, coordinador del Seminariu de Filoloxía Asturiana y ex secretariu de la Xunta Asesora de Toponimia, recueye los datos llingüísticos y hestóricos de los 750 topónimos oficiales del territoriu, ordenaos alfabéticamente y referentes, en dellos casos, a la toponimia mayor y menor del conceyu.

La edición incluye un CD cola versión orixinal del estudiu n’asturianu y cola so traducción al castellanu, amás d’una guía dixital que permite, ente otres coses, llocalizar los topónimos y les cais de la ciudá nel mapa.

L’Asociación de Vecinos «L’Horru» del Carbayedo tien abiertu’l plazu pal II Concursu de Micorrellatos n’Asturianu, coincidiendo coles fiestes de San Roque, que se celebren nesti barriu avilesín nos caberos díes d’agostu.

Los interesaos en participanr puen presentar como máximu trés rellatos, qu’en dengún casu pasarán de les 500 pallabres, siendo’ll tema de los mesmos llibre.

Los textos tienen de dir escritos en ‘word’ y tar cabezaos pol títulu y firmaos con nomatu, unviándose primero del 4 d’agostu a les 14 hores al corréu avvelhorreoarrobayahoo.es.

El xuráu formáu por delles personalidaes de la cultura asturiana va xuntase’l 6 d’agostu pala concesión de los premios, que van consistir nun primer premiu de 300 euros pal rellatu ganador y un llote de llibros valorao en 100 euros a caún de los finalistes. Y estos premios entregaránse’l llunes 25 d’agostu a les 20 hores, nel parque del Carbayedo.