Convocatories

La Plataforma Xuvenil de Turón tien abiertu’l plazu p’apuntase a un cursu d’asturianu hasta’l vienres 7 de payares. El cursín, de 36 hores y con venti places, ta organizáu pola Academia de la Llingua Asturiana, y va celebrase na Casa de la Mocedá, no que yera l’Atenéu vieyu.

El preciu ye de venti euros, incluyendo materiales. Les inscripciones han facese na Casa de la Mocedá o per teléfonu, nel númberu 985 43 01 78. L’ALLA entrega diploma d’asistencia al cursu a la fin del mesmu.

Un añu más la Tertulia Cultural El Garrapiellu convoca’l so concursu de cuentos curtios, al que pueden presentase cuentos redactaos dafechu en llingua asturiana, respetando les normes ortográfiques de l’ALLA. Los autores mayores de 16 años podrán presentar una obra por persona, enxamás superior a les 12 fueyes, mecanografíaes a doble espaciu y escrites per una sola cara, con temática llibre.

El plazu d’entrega de los trabayos tará abiertu hasta’l 22 d’ochobre de 2009 y tienen d’unviase a: TERTULIA CULTURAL EL GARRAPIELLU, apartáu de correos 8133 – 33280 Xixón, nun sobre onde s’escribirá “XVIII Concursu de Cuentos Curtios EL GARRAPIELLU”. Dientro del mesmu dirá l’orixinal del cuentu col titulu y trés copies, baxo plica, amás d’otru sobre cola plica’l autor y el títulu del cuentu escritu per fuera, que contendrá los sos datos y un teléfonu de contactu.

El fallu’l concursu sedrá’l día 10 de payares. El Garrapiellu nomará un xuráu debidamente cualificáu pa fallar estos premios y les sos decisiones nun serán retrucaes. La entrega de los premios comunicaráse personalmente a los ganadores y faráse público nos medios de comunicación.

A xuiciu de la Tertulia Cultural El Garrapiellu, el ganador de la presente edición formará parte del xuráu del próximu concursu. Los trabayos premiaos son propiedá d’EL GARRAPIELLU que los espublizará nel IV volumen de Cuentos Curtios. En dengún casu se tornarán los orixinales a los autores de les obres non premiaes, pero éstos podrán, pela so parte, facer usu de les copies nun presentaes.

Pa esta edición van entregase dos premios, unu de 900 y otru de 300 euros.

Les formaciones asturianistes van celebrar el Día de la Nación Asturiana, esti martes 8 de setiembre, en cuatro conceyos distintos: Illas, nel casu d’IX-Bloque por Asturies; Villaviciosa nel casu d’Unión Asturianista; n’Uviéu, Andecha Astur y la UNA en Xixón. Los actos oficiales del Gobiernu d’Asturies van celebrase en Cuideiru.

Bloque por Asturies va celebrar el “Día d’Asturies” colos sos socios de coalición Izquierda Xunida, Los Verdes d’Asturies y la formación Lliberación. Va ser el martes a les 12 en Caizuela, la capital del conceyu d’Illas. Dellos buses van salir p’hacia los actos dende otres llocalidaes.

La coalición Unión Asturianista, formada pol PAS y la URAS, va celebrar el Día de la Nación Asturiana con un actu n’homenaxe al prócer villaviciosín Xosé Caveda y Nava y a la memoria asturianista de so pá y de los Xovellanos, con discursos políticos de Javier López Uría y de Xuan Xosé Sánchez Vicente. Va ser na plaza col nome del homenaxeáu a partir de la una la tarde. Dempués va haber una xinta de xermandía nel Restaurante Amandi (C/San Xuan 41, Amandi, Villaviciosa).

Andecha Astur va celebrar esti 8 de setiembre una manifestación pela cai Uría d’Uviéu cola que va entamar la campaña SOS Asturies, que quier axuntar a otres fuercies polítiques de calter asturianista alredor de la mesma.

Pela so parte Unidá Nacionalista Asturiana (UNA), lo que denomen “una alternativa a los actos oficiales del Día d’Asturies oficial”. Na zona de la Casa de Les Pieces, nel barriu xixonés de Cimavilla, la formación fadrá una riestra d’actos festivos y políticos, que van tener como centru una xinta popular. Les actividaes van entamar a la una la tarde.

Per otru llau, nin FSA-PSOE nin el PP d’Asturies, anunciaron nengún actu de celebración pa esti día.

La Conceyalía de Cultura abrió ayeri una esposición colos ganadores del so concursu infantil de marcapáxines na Biblioteca Municipal “Valentín Andrés Álvarez”. La esposición recuéye los ganadores, d’ente los más de 508 dibuxos presentaos por escolinos de EP, EI y Secundaria.

Los ganadores son Ángelo Miguel Zurga Guerra de 3 años; Carlos Lavilla Fernández de 5 años; y David Pastur Fernández, Amor Cuervo González, Andrea Muñiz González, de primaria; y Nerea Menéndez Fernández de secundaria.

L’Atenéu Cultural Xuan María Acebal va espublizar a comuña cola editorial La Cruz de Grau, una revista d’ensayu y divulgación que va llamase Raigañu y que va tar dirixida pol ensayista Javier Cubero de Vicente.

El conseyu de redaición cofórmenlu l’hestoriador Antón Martínez, el periodista y escritor Inaciu Galán y González, y el músicu Xesús Nel García Muñiz.

L’Atenéu adelantó yá dellos conteníos: “L’Osu na cultura asturiana”, de Xuan Porta Allende; “Software llibre n’asturianu” del colectivu Softastur, y un “Vocabulariu asturianu na lliteratura de José María de Pereda” de Xaviel Vilareyo. Amás, habrá secciones d’hestoria, cultura, música, lliteratura, normalización llingüística y reseñes.

L’Atenéu tien abiertu’l plazu pa participar de la publicación, pudiendo mandase les collaboraciones a ateneuacebal@hotmail.com
Páxina web del Atenéu Acebal Xuan María Acebal

El día 31 d’agostu cierrase’l plazu pa presentar orixinales a los cinco premios lliterarios que la Conseyería de Cultura y Turismu convoca nel presente añu 2009: novela (Premiu “Xosefa Xovellanos”), poesía (Premiu “Xuan M.ª Acebal”), ensayu (Premiu “Máximo Fuertes Acevedo”), lliteratura infantil/xuvenil (Premiu “María Josefa Canellada”) y cómic (Premiu “Alfonso Iglesias”, de nueva creación). Les obres han presentase nel Rexistru de la Conseyería de Cultura y Turismu. Más información nel BOPA (Boletín Oficial del Principáu d’Asturies) de fecha 27 de marzu.

L’Asociación de Muyeres “Valdés Siglo XXI” del Conceyu de Valdés, convoca’l VI Certame de Poesía “Nené Losada Rico”, nel que puen participar toles persones interesaes, mayores de 18 años, residentes nel estáu español, y que nun fueren premiaes nes anteriores convocatories d’esti certame, con un poemariu, orixinal ya inéditu, en castellán o asturianu, con una estensión ente doscientos setenta y cinco versos y un máximu de quinientos.

Los trabayos presentaránse por quintuplicáu, baxo plica, firmaos con un nomatu nun sobre ensin remite. Dientro del sobre dirá otru sobre zarráu colos datos personales: nome, apellíos, dirección, teléfonu y un currículu curtiu.

Unviaránse per corréu certificáu a l’Asociación de Muyeres “Valdés Siglo XXI”, asitiada na cai Los Lagos, s/n, 33787 Barcia (Valdés) Asturies, indicando nel sobre: Pal VI Certame de Poesía “Nené Losada Rico”. El plazu d’almisión de los trabayos será dende la publicación de les presentes bases hasta les 14:00 hores del 2 d’ochobre de 2009.

Va premiase’l trabayu ganador con 1000 € y Diploma pa cada modalidá, quedando l’asociación de Muyeres Valdés Siglo XXI el drechu de publicar como-y pete los poemarios premiaos nun plazu de dos años. Pasáu esti plazu, sos autoras/autores van poder publicalos pola so cuenta, citando siempre el nome del premiu recibíu.

Los Xuráos, unu pa cada modalidá, tarán formáus por cinco persones cualificaes. Si’l númberu de poemarios presentaos lo aconseya, fadrase una selección previa de los mesmos según determine l’asociación. Los Xuráos resérvense’l drechu de poder declarar ermu’l premiu y d’interpretar cualquier dulda nun resuelta nes presentes bases.

El fallu daráse a conocer na última selmana del mes d’ochobre de 2009. La entrega de premios fadrase’l vienres 6 de payares, siendo obligatoria la presencia de la ganadora o del ganador na entrega de premios.

La revista La Sidra, qu’asoleya l’Ensame Sidreru, convoca’l Primer Premiu d’Ensayu “Emilio Trabanco Trabanco” dotáu con un premiu de 1.500 euros . Les obres que se presenten tendrán de tar rellacionaes col mundu de la sidra y la cultura desendolcada alredor d’esta bebida del país, pudiendo tar redactaes n’asturianu o en castellán. El plazu pa presentar testos termina l’1 d’avientu.

Les bases d’esti primer premiu Emiliom Trabanco Trabanco d’ensayu son les que vienen darréu:

Capítulu Primeru: Oxetu

Artículu 1.- Les obres que se presenten al primer premiu d’ensayu “Emilio Trabanco Trabanco” tendrán de tar rellacionaes col mundiu la sidre y la cultura desendolcada al so alrodiu.

Artículu 2.- Valoraránse especialmente aquelles obres que sepan destacar la esistencia d’una cultura asturiana de la sidre y que sepan integrar aspeutos concretos de la mesma dientru d’un tou.

Artículu 3.- Les obres tendrán de ser inédites dafechu y nun podrán tar premiaes anteriormente.

Artículu 4.- Les obres podrán tar escrites n’asturianu o n’español.Artículu 5.- Les obres tendrán una estensión mínima de 65 páxines (TNR 12 duple espaciu)

Artículu 6.- El primer Premiu d’Ensayu “Emilio Trabanco Trabanco” ta dotáu con 1.500 € (1250 € en metálicu y 250 € en llibros), que se fadrá efeutivu nel intre de la so concesión pública.

Artículu 7.- L’Ensame Sidreru (E.S) comprométese a la espublización de la obra premiada.

Artículu 8.- L’Ensame Sidreru resérvase’l drechu a espublizar aquelles obres nun premiaes atalantando que la presentación al mencionáu premiu supón la cesión al E.S de los drechos d’autor.

Artículu 9.- Si’l Xuráu lo considera afayaizo, el premiu podrá ser consideráu ermu y esceicionalmente concedíu ex a quo.

Capítulu segundu: Resolución del Premiu

Artículu 10.- La resolución del primer Premiu d’Ensayu “Emilio Trabanco Trabanco” dirá a cargu d’un Xuráu compuestu por cincu presonalidaes destacaes del mundiu la sidre, propuestos pol E.S, asina comu un representante del mesmu, que lu presidirá.

Artículu 11.- Nun entamu la resolución del primer Premiu d’Ensayu “Emilio Trabanco Trabanco” intentará decidise por consensu ente los miembros del Xuráu. Si ello nun fuere posible, procederáse a una votación que decidirá por mayoría simple.

Artículu 12.- La resolución del premiu fadráse pública’l 15 d’avientu del presente añu.

Capítulu terceru: Presentación de les obres

Artículu 13.- El términu de presentación d’orixinales fina’l díi 1 d’avientu del presente añu a les 19 hores.

Artículu 14.- Habrán d’unviase seyes copies en papel correchamente encuadernaes y una copia en soporte informáticu a la direición:PREMIU D’ENSAYU “Emilio Trabanco Trabanco”La Caleya’l Ríu 205Carceo – Santuriu33394 Xixón – ASTURIES

Artículu 15.- Nos orixinales tendrá que costar el nome, apellíos y direición del autor/a. Si se quier alxuntar un seudónimu, l’autor/a tendrá qu’alxuntar una plica.

Artículu 16.- L’autor/a comprométense a nun retirar la obra enantes de facese pública l’alxudicación del premiu y a nun presentala a otros concursos en curus nin en xeneral, a tener comprometía la so espublización.

Artículu 17.- La presentación d’orixinales implica l’aceptación d’estes bases qu’actúen en valor de contratu d’edición.

L’asociación Xareos! y la revista Formientu, en collaboración cola editorial La Cruz de Grau, tien abiertu’l plazu pa presentase al I Certame de Microrrellatos Mozos «Formientu» “col envís d’afalar la creación lliteraria ente los escritores más mozos y ayudalos a esplorar les sos posibilidaes” hasta’l 31 d’agostu.

La escritura de microrrelatos mínimos ye, según los responsables de la revista Formientu, “ un exerciciu perfectu pa desendolcar esa capacidá de síntesis y suxestión capaz de impactar al llector y dexalu prendáu d’una historia”, ye por ello que convoquen esti concursu nel que puen participar toes aquelles persones nacíes de 1975 n’adelantre, con un númberu ilimitáu de microrrellatos, de tema llibre y escritos n’asturianu.

El llargor máximu de los rellatos ha ser d’ochenta caracteres (aproximadamente una llinia de procesador de testos a tamañu de lletra 12) cuntando espacios, apóstrofos, guiones, puntos y comes.

Los rellatos han unviase al corréu lletrónicu formientu@xareos.com unviando los datos personales (nome, teléfonu, dirección y curriculu curtiu) nun archivu axuntáu al corréu.

D’ente los rellatos recibíos van otorgase trés premios (compuestos por un llote de llibros y la espublización del rellatu na revista Formientu) y un númberu ilimitáu d’accésits, que van espublizase na revista. El certame pue quedar ermu.

Bases del I Certame de Microrrellatos Mozos «Formientu »

Güei, xueves 23, a partir de les siete la tarde, el Salón de Recepciones de la Casa Conceyu de Xixón va recibir la presentación de la obra “Discursos llingüísticos y movimientu obreru na Asturies decimonónica”, ganadora del Primer Premiu «Fierro Botas», na so edición de 2008. Xunto al autor, Rafael Rodríguez Valdés, van tar un representante de la editorial Trabe y el Tercer Teniente Alcalde y Conceyal de Cooperación, Cultura Tradicional y Llingua Asturiana, Jesús Montes Estrada.

L’actu ye públicu y nél va dase un exemplar a los asistentes.