Convocatories

El cantautor Alfredo González, ganador del Premiu al Meyor Cantar en Llingua Asturiana en 2009, va tocar güei, xueves 25 de xunu, dende les 21:30 hores, nel llocal d’El Cafetón, asitiáu na cai del Sol, númberu 8 d’Avilés. Nel mesmu va tar acompañáu pola guitarra de Rubén Bada, tocando los temes de “La nada y tu”.

L’Asociación Cultural L’Argayu organiza’l II Certame de poesía en cántabru, pal 28 de xunetu y por mor del Día Nacional de Cantabria nel Puente Samiguel (Regocín). El certame ta abiertu a cualesquier temática, estilu “y variedá llingüística propia del cántabru”.

El xuráu ta compuestu por miembros del Proyeutu Depriendi, una escuela popular de cántabru a distancia, qu’imparte un cursu de cántabru al traviés de la rede. Les propuestes puen mandase a largayu@yahoo.ca hasta’l 25 de xunetu.

En 2006, cuando se convocó’l primer certame, resultaron ganadores Milianu, de Comillas, y el traductor ya intérprete Daniel Estrada.

Les poesíes finalistes van dase a conocer nuna llectura pública’l 28 de xunetu.

L’Ayuntamientu de Llangréu tien abiertu’l plazu de presentación a los certámenes del programa cultural ArtNalón, qu’inclúi artes escéniques, fotografía y curtiometraxes. La fecha última pa presentar orixinales ye’l 21 d’agostu.

Bases completes de los certámenes

La llibrería Albora Llibros de Xixón va acoyer esti llunes, 8 de xunu, la entrega del II Premiu Asturnews de Lliteratura Infantil y Xuvenil que ganó nesta ocasión Lluis Portal Hevia con «El Club de los Valientes». El xuráu decidió, amás, dar trés accésits de 200 euros a los rellatos «El misteriu de Vassilius Destounis», Jorge Fernández García; «Unos cuentos de muerte», d’Abel Martínez González; y «Febreru, 29» de Xurde Fernández y Marián García. L’actu va celebrase a partir de les 19:30 hores cola presencia de los autores.

El xuráu d’esta primer edición taba formáu pol director d’Asturnews, Próspero Morán, Joaquín Morán Pérez d’Asturnet ya Inaciu Galán y González, redactor del diariu Asturnews, como secretariu del mesmu.

Los ganadores:

-Lluis Portal Hevia (Villaviciosa, 1964) Llicenciáu en Filoloxía Hispánica, escritor, periodista ya investigador de la lliteratura asturiana, fai un importante llabor d’axitación cultural nel so conceyu, espublizando delles revistes en llingua asturiana. Tien, en volume propiu, narrativa y ensayu, algamando premios como’l de “Llectures pa rapazos” de l’Academia de la Llingua, esti mesmu añu, ente otros munchos.

-Jorge Fernández García (Uviéu, 1978) Maestru, pedagogu y Espertu en Llingua Asturiana pola Universidá d’Uviéu. Autor de testos teatrales y de narrativa curtia, algamó premios nos dos xéneros. Destaquen el «IX Concursu de Teatru» de l’Academia de la Llingua Asturiana, el «Certame Internacional de Cuentos Curtios, Curtios» 2005, na modalidá de cuentos n’asturianu y l’«Art Nalón Lletres 2006» de cuentos curtios. Participa en revistes lliteraries como Formientu, La Ratonera, Lletres Asturianes o Lliteratura.

-Abel Martínez González (Uviéu, 1976) Collaborador habitual de revistes como Lletres Asturianes, algamó gallardones tan importantes como’l Premiu Uviéu de narrativa nel añu 2007, l’Art Nalón de cuentos curtios y na so primer edición, el Premiu Asturnews de Lliteratura Infantil y Xuvenil, ex aequo con Nicolás V. Bardio.

-Xurde Fernández (Candás, Carreño, 1975) Xurde Fernández. Nació en Candás (Carreño) en 1975. Profesor de llingua asturiana n’enseñanza secundaria y collaborador de l’Academia de la Llingua Asturiana y del diariu El Comercio, vio publicada en 2007 la so primer colección de cuentos curtios, titulada Volver.

-Marián García (Xixón, 1975) Filóloga y Esperta en Llingua Asturiana pola Universidá d’Uviéu. Anguaño ye profesora de Llingua Asturiana en Candás. Espublizó a comuña con Xurde Fernández la novela «El color del escaezu», espublizada por Trabe en 2008.

La Casa Posafuelles, chigre de la Xunta pola Defensa de la Llingua Asturianan asitiada nel númberu 10 de La Cuesta la Vega, n’Uviéu, va acoyer la presentación del poemariu nuevu de Carlos Suari, “Orbayu d’alfileres”, asoleyáu por Suburbia Ediciones.

Un añu más, y va doce, el Conceyu de Bimenes convoca’l Concursu de Cuentos pola Oficialidá del Asturianu, con plazu abiertu pa presentar trabayos hasta’l 5 de xunu. El certáme celébrase col envís de facer alcordanza de la declaración d’oficialidá del asturianu nesti conceyu, que desficieron los tribunales darréu.

Los cuentos han unviase a la Casa Cultura de Bimenes, Santuyano s/n (CP 33527) de Bimenes, redactaos en llingua asturiana (con una estensión máxima de 10 folios), respetando les normes ortográfiques de l’ALLA, inéditos, de tema llibre, non premiaos n’otros concursos lliterarios y que nun tean suxetos a nengún compromisu d’edición.

Establécense trés premios de 800, 50 y 350 euros, y nel actu institucional d’entrega, que va ser el día 3 de xunetu del 2009, coincidiendo coles celebraciones de la Fiesta de la Oficialidá de la Llingua Asturiana en Bimenes, va facese una llectura pública del primer premiu na voz del autor.

Güei miércoles, siguen les actividaes del II Ciclu de Conferencies Reinu de Lleón, entamáu pola Conceyalía de Cultura Lleonesa del Ayuntamientu de Lleón. El Salón d’Actos del Palaciu Don Gutierre va acoyer la conferencia: “El llinguax del arte popular”, impartida pol etnógrafu Joaquín Alonso.

Na conferencia, l’autor va esplicar como l’arte popular, al que diz, “debiéremos llamar arte etnográficu” ye ún de los resultaos del comportamientu artísticu, un xéneru de las artes del home que poseye’l so propiu llinguax y, n’ocasiones, el so propiu conteníu simbólicu.

Pal conferenciante “la representación artística o ornamental etnográfica desenróllase a partir de patrones artísticos que la sociedá xenera dende ideales colectivos o individuales cualitativamente aceutaos nel tiempu”. Dende esta perspeutiva, diz l’etnógrafu “preténdese costruyir l’argumentu de la conferencia, sofitada al empar na valoración téunica, formal, estética ya intencionalidá del ornamentu tradicional nel ámbitu de la provincia de Lleón”.

Programa completu del ciclu de conferencies

Hasta’l 15 de mayu puen presentase orixinales al concursu convocáu pol Grupu de Monte Fariñentu, de L.lena.

Un certame qu’acepta semeyes en blancu y negru o color, d’ente 25X25 y 25X30 cm sobre cartulina de 30X40.

Los premios son de 150, 100 y obsequios pal tercer y cuartu puestu.

Los orixinales puen mandase a Grupu Fariñentu. Hotel d’Asociaciones, asitiáu na cai Ramón y Cajal, 20 33630 de La Pola (L.lena).

Vicente Díaz ye la propuesta del Casinu de Xixón pa la nueche del vienres. Una actuación onde va interpretar munchos de los sos temes más célebres xunto coles novedaes del so discu últimu, “Montes cantábricos”, onde l’artista, fiel al so estilu, ufre nuevos temes a los sos abondantes siguidores.

El conciertu entama a les diez de la nueche na sala Acapulco.

La primer edición del Premiu “Alfonso Iglesias” de comic en llingua asturiana tien abiertu’l plazu pa presentar trabayos. La convocatoria que les obres han ser inédites y non premiaes enantes, pudiendo ser una hestoria única o un conxuntu d’hestories, con o ensin rellación ente elles, presentaes nun formatu mínimu d’A4 y non superior al A3, enantes del 31 d’agostu d’esti añu.

Los trabayos han llevase, presencialmente o per corréu, al Rexistru de la Conseyería de Cultura y Turismu, asitiáu na cai Eduardo Herrera “Herrerita” d’Uviéu.

Les obres han dir en sobre zarráu col nome del premiu per fuera, dientro ha dir otru sobre colos datos del autor y un curriculu curtiu.

Pal ganador, la Conseyería de Cultura y Turismu ufre 7.000 euros y el compromisu d’edición, quedando los drechos pa la edición n’otres llingües, en manos del autor.