Cine

El tabú nel cine, la filosofía, la lliteratura y la hestoria ye’l tema común del VII Cursu Universo Media d’Estensión Universitaria que se va celebrar del 29 de payares al 3 d’avientu en Xixón, dientro la programación del Festival Internacional de Cine. Tabús hestóricos como l’holocaustu nazi o el franquismu, la censura nel cine, los tabúes estéticos o sexuales, son dellos de los asuntos que van ocupar les sesiones del cursu. Como vien siendo habitual Universo Media inclúi tamién la proyección d’un ciclu de cine nel que van poder vese clásicos como ‘Tabú'(1931) de F.W.Murnau o ‘La grand bouffe'(1973) de M.Ferreri xunta producciones d’estrenu n’Asturies como ‘Oh Uomo'(2004) de Y.Glanikian y A.Ricci,un documental sobro los horrores del sieglu XX.

L’escritor vascu Bernardo Atxaga, el críticu cinematográficu Carlos Boyero, los realizadores Jordi Costa y Sergi Sánchez o el periodista asturianu Enrique Bueres, son dellos de los diecinueve ponentes del cursu entamáu por Estensión Universitaria en collaboración col Festival de Cine.

El ciclu de cine col que se complementa Universo Media proyecta los siguientes filmes: ‘Tabú’ (F.W.Murnau, USA, 1931), ‘Oh Uomo’ (Yervant Gianikian/Angela Ricci Lucci, Italia, 2004), ‘Anatomie de l’enfer’ (Catherine Breillat, Francia, 2004), ‘La grande bouffe’ (Marco Ferreri, Italia, Francia, 1973), ‘De nens’ (Joaquim Jordá, España, 2003), ‘A place on earth’ (Artour Aristakisian, Rusia, 2001), ‘La piel vendida’ (Vicente Pérez, España, 2004), ‘Ma mere’ (Crsitophe Honoré, Francia/España/Austria, 2004) y ’20 Fingers'(Mania Akbarí, Irán, 2004).

L’asturianu Tomás Cimadevilla, responsable de empresa Telespan 2000, foi escoyíu ayer pola Federación de Productores Audiovisuales d’España (FAPAE) como vicepresidente xunto al cabezaleru de la productora BrB Claudio Biern. Cimadevilla preside anguañu l’Asociación de Productores Independientes (API) y tien nel so haber profesional ésitos cinematográficos como ‘El otro lado de la cama’, ‘Días de fútbol’ o les taquilleres: ‘Torremolinos 73’ y ‘Kárate a muerte en Torremolinos’.

El productor asturianu fundó nel añu 2000 la empresa audiovisual Telespan, qu’en poco tiempu ye una de les productores con mayor proyección nel mercáu de cine y la televisión. Apocayá la empresa de Tomás Cimadevilla firmó un contratu con Telecinco pa producir una serie televisiva de situación titulada ‘Maneras de vivir’ y trabaya agora nel proyectu del prósimu llargometraxe de la realizadora Chus Gutiérrez: ‘El calentito’, una hestoria ambientada nel Madrid del empiezu de la movida, na que la música de los grupos de la dómina tien un papel resaltable.

De la vinculación de Cimavilla con Asturies resalta la collaboración del grupu Doctor Explosion na banda sonora de les dos producciones de la serie ‘Torremolinos’. Agora dende la vicepresidencia de la Federación de Productores Audiovisuales, l’entamador xixonés, va tentar puxar pol desenvolvimientu d’un sector cada vez más importante de la industria cultural.

Los documentales ‘Metallica: Somo kind of Monster”(2004) de Joe Berlinger y Bruce Sinofsky, asina como ‘End of the Century: The Story of The Ramones'(2003) de Jim Fields y Michael Gramaglia, son los platos fuertes de la sección dedicada nel Festival de Cine de Xixón a les películes musicales. L’apartáu ‘Desorden y concierto’ complétase con otru filme sobro Los Ramones: ‘Blank Generation'(1976) y cinco documentales más cola música de vanguardia y el pop de les tres últimes décades como protagonistes.

Per tercer añu el Festival Internacional de Cine de Xixón dedica una apartáu específicu al cine musical embaxo’l títulu ‘Desorden y concierto’. Nesta ocasión van presentase ocho filmes, ente los que destaquen los estrenos de ‘Metallica: Some Kind of the Monster’, un documental de J.Berligner y B.Sinofsky alrodiu de l’actividá de la famosa banda heavy dende 2001 hasta 2003; tamién la primicia de ‘End of the Century: The Story of The Ramones’, de J.Fields y M.Gramaglia, un percorríu hestóricu pel camín andáu nos escenarios pol conxuntu de Joe Ramone dende los sos inicios hasta los sos últimos tiempos. Otru filme colos Ramones de protagonistes: ‘Blank Gemeration’ d’Amos Poe y Ivan Kral, completa l’homenaxe que’l Festival ufierta a una banda que sobrevivió col so enérxicu son a modes, corrientes y traxedies como la desapaeción progresiva de tres de los sos miembros, l’últimu el propiu líder del grupu Joe Ramone.

Nesta sección documental van poder vese tamién les producciones: ‘Arvo Pärt: 24 Preludes for a Fugue'(2002) de Dorian Supin, una cinta sobre’l compositor estoniu Arvo Pärt (Paide, 1935). ‘Low in Europe'(2004) de Sebastian Schrade capta la xira del tríu americanu Low pel continente americanu y ‘Festival Express'(2003) de Bob Smeaton recueye ‘l periplu per tierres canadienses d’un elencu de figures clásiques del rock de los setenta: Janis Joplin, Grateful Dead, The Band, Buddy Guy… Los otros filmes que completen la sección ‘Desorden y concierto’ son la producción americana ‘Kill yours Idols'(2004) de Scott Crary, un repasu a la hestoria del punk neoyorquinu con bandes como Suicide, DNA, Black Dice, The Contortions… xunida a los primeros rellumos de bandes posteriores como Sonic Youth o Yeah Yeah Yeahs. La película ‘Fallen Angel'(2004) de Gandulf Henning, cuenta la hestoria del músicu Gram Parsons, muertu de sobredosis a los 27 años, dende los sos inicios en solitariu y la so participación en grupos como ‘The Byrds’ o ‘The Flying Burrito Brothers’.

La memoria d’Aida de Lafuente protagoniza l’últimu trabayu cinematográficu de Ramón Lluis Bande, un documental entamáu alrodiu del testimoniu directu de la única hermana superviviente de la revolucionaria, Pilar de la Fuente, y del cantar popular “Aida” interpretáu por Mari Luz Cristobal Caunedo. La película afonda na hestoria de la mártir d’Ochobre del 34 y del so entornu familiar, fondamente marcáu pola militancia nel comunismu asturianu.

El mediumetraxe titúláu “De Lafuente” concibióse como un nuevu trabayu de la serie qu’en forma de ‘work in progress’ emprimó Ramón Lluis Bande alrodiu de la memoria hestórica d’Asturies y que tuvo’l so prededente nel tamién documental ‘Estratexa'(2003). En palabres del realizador xixonés: ‘Interésame afondar nesta forma de documental partiendo directamente de la realidá, del testimoniu y la presencia de los auténticos protagonistes de la hestoria cuntada, ensin dala interferencia d’elementos ayenos a esi relatu’.

Bande apuesta tamién por ufiertar un testimoniu, nesti casu el de la hermana superviviente d’Aida, Pilar de la Fuente, ‘directu y desnudu, tal lu espresa la protagonista’. Pa consiguir ‘el distanciamientu necesariu ente l’espectador y el testimoniu emocionáu y vívidu’ de Pilar, la figura de la protagonista nun se presenta nel centru de la imaxe, sinón ‘cásique a un marxe d’ella’, nun enfoque arriesgáu col que Bande afirma querer ‘consiguir que l’espectador ponga la so atención na hestoria que se cuenta más que na espresión conmovida de quien la cuenta’. Na primera parte, la más estensa del filme ufiértase el testimoniu de la hermana superviviente d’Aida y la segunda y postrera céntrase na interpretación que fai la cantante Mari Luz Cristóbal Caunedo del cantar popular ‘Aida’, un complementu o segunda versión testimonial alrodiu de lo que l’autor del mediumetraxe califica como ‘un relatu de los fechos membraos en forma de cantar que se correspuende cásique dafechu col que realiza Pilar’. Pa la ocasión la cantante asturiana interpreta ‘Aida’ nuna adaptación propia a les estructures monódiques de la tonada.

La intención de Ramón Lluis Bande de la qu’entamó’l proyectu fai dellos meses yera facer coincidir el so estrenu coles feches de remembranza d’Ochobre del 34. Un retrasu debíu a motivos de financiación del trabayu impidió ver cumplíu el deséu del realizador. Agora la cita pa que los espectadores puedan visionar ‘De la Fuente’ va ser nel trescursu del prósimu Festival Internacional de Cine de Xixón, un sitiu onde ya Bande presentara anteriores películes suyes.

El precedente d’esti documental alrodiu d’Aida de la Fuente, foi ‘Estratexa'(2003), con un formatu asemeyáu al de la nueva cinta, nel que s’afondaba na memoria de los guerrilleros asturianos al través del testimoniu directu d’ún d’ellos, el comunista Manuel García y del testimoniu gráficu alrodiu de la guerra civil y la llucha en monte del fotógrafu Constantino Suárez, esta última parte ensamblada na música del grupu Manta Ray y el so tema del mesmu títulu que la película ‘Estratexa’.Ramón Lluis Bande, confirmó a Asturnews la so intención de siguir esa obra en marcha alrodiu de la memoria hestórica d’Asturies con nuevos trabayos.

La obra social y cultural de Caxastur cierra la so temporada de ciclos cinematográficos con una amuesa de seis llargometraxes del cine actual más arriesgáu que van poder vese dende’l 19 d’ochobre al 10 de payares en dellos centros de la rede de la entidá financiera. ‘Nine songs’ del británicu Michael Winterbotton o ‘La herencia’ del danés Per Fly van poder vese nesti ciclu de cine independiente.

Regina Rubio directora de la obra social y cultural de Caxastur, acompañada del programador de l’amuesa, José Luis Cienfuegos, presentaron el ciclu ‘Ángeles caídos’, l’últimu de la temporada d’actividaes d’esta institución. Dende’l prósimu 19 d’ochobre al 10 de payares va proyectase nos centros culturales Cajastur d’Uviéu, Xixón, Mieres y Sama Llangréu, amás de los filmes citaos de Peer Fly y Michael Winterbotton, otros como ‘Primavera, verano, otroño y invierno’ del coreanu Kim Ki-duk; la producción francesa ‘Lee mis labios’; ‘El tiempo del lobo’ del director austriacu Michael Haenke;o el filme canadiense ‘La gran seducción’.

La organización del Festival de Xixón ta enfotada en consolidar la so sección ‘Enfants terribles’ como espaciu d’alcuentru col públicu más mozu y contribuir destamiente a que’l cine entame a ser teníu en cuenta como parte de la formación educativa de los rapaces. Por primer vez les proyecciones van tar complementaes con actividaes didáctiques y la edición d’una guía pedagóxica. Otra novedá na edición qu’empieza’l 26 de payares va ser la incorporación del asturianu nes publicaciones oficiales del festival y na so páxina web.

La sección ‘Enfants terribles’, dirixada a escolinos y estudiantes d’ente los 7 a los 18 años, va proyectar diez películes de conteníos bien diversos, ente les que s’incluin dos filmes d’animación de creadores españoles:’Supertramps’de la factoría vasca Dibulitoon y la coproducción hispanu-británicu-xermana ‘Back to Gaya’.Na sección van poder vese tamién les producciones alemanes ‘Balls’, una comedia alrodiu de la homosexualidá nel mundu del fútbol y ‘Rythm is it!’, documental sobro un taller d’iniciación a la música del director d’orquesta Simon Rattle; ‘Quality of life’, producción norteamericana alrodiu de la cultura’l graffiti; la sueca ‘Hip-hop hurra-L’efectu ketchup’, una comedia realista d’adolescentes; ‘Moi, Cesar, 10 ans et démi, 1,39m’, producción francesa alrodiu de los conflictos del mundu infantil, la finlandesa ‘Pearls and pigs’, ‘The wooden camera’, película sudafricana y la británica ‘Tooth’, completen el ciclu.

Pal director del certame xixonés José Luis Cienfuegos n’España “hai una cierta carencia nos programes educativos del cine como instrumentu didácticu y forma d’espresión cultural, a diferencia de lo qu’ocurre n’otros países como Francia, por exemplu”. La sección ‘Enfants terribles’ y les actividaes complementaries que se van entamar alrodiu d’él tenta, de dalgunamiente, solventar esa carencia allegando el cine a estudiantes de tolos ciclos educativos. Con esti fin el festival va editar una guía pedagóxica y detrás de cada proyección van entamase talleres didácticos coordinaos pola artista plástica Maite Centol. Na pasada edición del certame asistieron a les proyecciones del ciclu mozu alrodiu de 9.000 rapazos de toa Asturies y esti añu espera superase la cifra.José Luis Cienfuegos destaca como importante el fechu de que se trata d’un sección “programada colos mesmos criterios de selección que’l restu de les secciones p’adultos, a diferencia d’otros festivales onde se aveza destinar pal públicu infantil o xuvenil estrenos de Disney o producciones asemeyaes”.

Como novedá la 42 edición del Festival de Cine de Xixón va incorporar la presencia de la llingua asturiana nes sos publicaciones oficiales, asina el catálogu va editase n’inglés, castellanu y asturianu; el periódicu del festival tamién va incluir parte de los sos conteníos n’asturianu y de la mesmamiente la páxina web del certame. Cienfuegos resalta la importancia de la edición trillingüe del catálogu “teniendo en cuenta que se reparte per tol mundu y va haber xente que por primera vez s’entere de la esistencia de la llingua asturiana”. Ente los enfotos de la organización del festival ta el dir incorporando a pasu la presencia del asturianu xunta a les hasta agora únicos idiomes oficiales, el castellanu y l’inglés. La incorporación del asturianu esti añu produzse depués del alcuentru calteníu ente José Luis Cienfuegos y el responsable de la Oficina de Política Llingüística Ramón d’Andrés.

Una hestoria “apasionante, épica y única n’Europa”. Nesos términos concibe la directora llangreana Lucinda Torre el llargu conflictu llaboral que protagonizaron 232 trabayadores de la constructora de bienes d’equipu Duro Felguera, argumentu’l documental ‘Tiempo de resistencia’, que la realizadora prevé estrenar a primeros de 2005.

“Nun un mundu globalizáu, nel que’l fantasma de los despidos amenaza’l futuru de miles de trabayadores, unos pocos dixeron ‘non'”, resume la sinopsis de la cinta, un trabayu ellaboráu por un equipu técnicu de 25 persones y ensin sofitu dalu de l’Alministración autonómica, pesie a cursar la pertinente solicitú hai agora un añu.

Según Torre, afincada en Madrid y nominada al Premiu Goya al meyor curtiumetraxe por “El Beso de la tierra”, el silenciu alministrativu col que s’atopó al demandar el sofitu institucional amuesa una “incapacidá” pa ver el cine como industria y lleva a pensar, xunta otras consideraciones, si en verdá “podemos dicir qu’esiste un cine asturianu”, más allá, entiende Torre, de “los bonos profesionales asturianos que faen cine”.

De sutaque se ponga de llargu cola so proyección en varios festivales, según les previsiones de la directora asturiana y el so equipu, ‘Tiempo de resistencia’ narrará nes pantalles la hestoria d’una engarradiella que se prollongó una década a partir de 1993 -fecha de los despidos qu’orixinaron el conflictu- y que foi perpetrada por “homes y muyeres que nunca nun se rindieron, que se rebelaron contra’l so despidu y que fueron quien a recuperar la so dignidá, los sos trabayos y los sos talleres”, asegura Lucinda Torre, que defende amás l’exemplu de los trabayadores de Duro como una guía pa entender muncho de lo qu’anguaño ta ocurriendo n’Europa.

Nesti sen, la cineasta llangreana reivindica’l gran “potencial cinematográficu” d’Asturies, tanto n’hestories como en personaxes: “Somos una sociedá enforma plural, mui rica, pero amás vivimos procesos hestóricos y económicos únicos nel mundu, fuimos protagonistes y tuvimos na vanguardia en delles ocasiones”, sostién Torre.

La llucha de los operarios de Duro Felguera por caltener los sos puestos de trabayu motivó, ente otres movilizaciones, un llargu encierru na catedral d’Uviéu, una fuelga de fame y un tema’l grupu de rock Dixebra, ‘Nun llores’, que xeneró’l primer videoclip de la banda.

Monstruos difíciles de creer, lluchadores ‘freaks’, maquetes de goma esgonciaes por héroes inverosímiles. La sesta edición del ciclu cinematográficu ‘Peor imposible’ entama güei en Xixón una serie de diez proyecciones que se prollongarán tola selmana con espaciu propiu pa la ciencia ficción asiática y que van culminar el prósimu sábadu nuna maratón de cine.

‘Los monstruos invaden la tierra’ y ‘El luchador manco’ estrenen esta tarde la llista de películes previstes nel ciclu a partir de les 18 hores, pa dexar pasu mañana a ‘Inframan’ y ‘Made in China’, y el miércoles a les cintes ‘Mad Warrior’ y ‘Robovamp’. Los organizadores de ‘Peor imporible’, iniciativa de la Fundación Municipal de Cultura, Educación y Universidá Popular de Xixón, reserven el xueves pa l’amuesa d’estremaes películes comprendíes baxo la denominación común de ‘Asia Extreme’ y feches n’estremu oriente.

Completen el programa les obres ‘The Breed’, ‘Infraterrestre’ y ‘The shunned house’, les dos primeres previstes pal vienres y la tercera pal mediudía’l sábadu. Esa mesma xornada rematará’l ciclu con una maratón integrada pola proyección sucesiva de les películes ‘Baba Yaga’, ‘Capitán América’, ‘The Punisher’ y ‘Tex y el señor de los abismos’.

Amás de les proyecciones, el ciclu ‘Peor imposible’ inclúi la cellebración d’un cursu d’introducción a l’animación que se desendolca a partir de güei baxo la dirección del director y escenógrafu Valentín Lorca y qu’analizará la hestoria, los fundamentos y la técnica de l’animación pa rematar na ellaboración d’un curtiumetraxe d’animación en plastilina.

El británicu Peter Watkins, el taiwanés Tsai Ming-liang y el suecu Lukas Moodysson. El 42 Festival Internacional de Cine de Xixón, qu’albergará unes 250 proyecciones del 25 de payares al 3 d’avientu, centrará’l so programa en tres ciclos monográficos dedicaos a esos tres directores, nuna edición que s’ocupará tamién del nuevu cine norteamericanu y cuyos organizadores quieren afitar como una amuesa alternativa a la “uniformidá formal y narrativa” de les grandes factoríes audiovisuales.

Nesos términos se pronunció esta mañana en Xixón el director del festival, José Luis Cienfuegos, que destacó como novedaes de la prósima edición del certame l’aumentu nel númberu d’espacios de proyección -esti añu sedrán 8 sales “funcionando a tou tren”, una más qu’en 2003- y l’espoxigue del presupuestu’l festival hasta los 722.000 euros, con un novedosu crecimientu nel apoyu económicu’l Ministeriu de Cultura, qu’hasta agora venía sofitando’l certame xixonés con una cantidá invariable.

Na so edición númberu 42, el Festival Internacional de Xixón quier ser un escaparate del cine “distintu, el más vivu, xuvenil, frescu ya independiente”, en pallabres del conceyal xixonés de Festeyos, Ivan Álvarez Raja, y pa ello, amás de llevar a la ciudá a la triada de directores ‘fetiche’ polos que s’apuesta esti añu, l’eventu lideráu por Cienfuegos dedicará-y un ciclu a los cines “periféricos” realizaos en Norteamérica al marxe de los parámetros dominantes en Hollywood.

D’esi espaciu monográficu, nel que se-yos pasará revista a les corrientes pop, documental, ‘underground’ ya independiente ‘made in USA’, habrá espaciu amás pa los denominaos ‘nuevos bárbaros’ de Hollywood, y toles pieces proyectaes cuayarán na edición d’una monografía de más de 500 páxines coordinada por Antonio Weinrichter y Roberto Cueto, como cuarta aportación del festival xixonés a la crónica de la nueva cinematografía.

Lo que Cienfuegos, Álvarez Raja y el propiu Roberto Cueto presentaron güei en Xixón ye un primer avance de la programación del certame. El programa completu incluyirá, xunta los ciclos anunciaos esta mañana, l’habitual sección oficial a concursu, el monográficu ‘Enfants terribles’, el ciclu ‘Esbilla’ y varies sesiones de curiumetraxes, amén de conciertos y esposiciones paraleles.

Web oficial del Festival Internacional de Cine de Xixón

Cine de baldre a la vera’l mar. El departamentu de Festeyos del Ayuntamientu de Xixón proyecta a partir de mañana nel cerru Santa Catalina los llargumetraxes ‘El abrazo partido’, ‘School of rock’ y ‘Good bye, Lenin’, dientro d’un mini-ciclu audiovisual entamáu en comuña col Festival Internacional de Cine de Xixón y col sofitu técnicu del Teatru Prendes de Candás.

La primera de les cintes amosaes sedrá la comedia coral ‘El abrazo partido’, grabada nun centru comercial ya interpretada casi dafechu por actores non profesionales baxo la dirección de Daniel Burman. La película, qu’algamó el Premiu Especial del Xuráu y l’Osu de Plata al meyor actor nel Festival de Berlín, proyectaráse a partir de les 22 hores del vienres nes inmediaciones de L’Atalaya.

Al día siguiente garrará’l relevu la comedia musical ‘School of rock’, obra’l cineasta independiente norteamericanu Richard Linklater y crónica de la patética espulsión d’un músicu de la banda heavy de la que forma parte y la so posterior esperiencia como profesor de música pa neños adineraos.

La tercera de les cintes programaes ye ‘Good bye, Lenin’, ganadora de seis premios na última gala’l cine européu y na que’l director Wolfgang Becker narra la hestoria d’una ma socialista qu’entra en coma na antigua Alemania del Este pocu antes del valtiamientu’l muru de Berlín y al recuperar la consciencia atopase con una familia emperruñada en facela creer qu’inda pervive’l socialismu.