Xixón entama un fin de selmana de cine al aire llibre cola proyección de tres películes en L’Atalaya

Cine de baldre a la vera’l mar. El departamentu de Festeyos del Ayuntamientu de Xixón proyecta a partir de mañana nel cerru Santa Catalina los llargumetraxes ‘El abrazo partido’, ‘School of rock’ y ‘Good bye, Lenin’, dientro d’un mini-ciclu audiovisual entamáu en comuña col Festival Internacional de Cine de Xixón y col sofitu técnicu del Teatru Prendes de Candás.

La primera de les cintes amosaes sedrá la comedia coral ‘El abrazo partido’, grabada nun centru comercial ya interpretada casi dafechu por actores non profesionales baxo la dirección de Daniel Burman. La película, qu’algamó el Premiu Especial del Xuráu y l’Osu de Plata al meyor actor nel Festival de Berlín, proyectaráse a partir de les 22 hores del vienres nes inmediaciones de L’Atalaya.

Al día siguiente garrará’l relevu la comedia musical ‘School of rock’, obra’l cineasta independiente norteamericanu Richard Linklater y crónica de la patética espulsión d’un músicu de la banda heavy de la que forma parte y la so posterior esperiencia como profesor de música pa neños adineraos.

La tercera de les cintes programaes ye ‘Good bye, Lenin’, ganadora de seis premios na última gala’l cine européu y na que’l director Wolfgang Becker narra la hestoria d’una ma socialista qu’entra en coma na antigua Alemania del Este pocu antes del valtiamientu’l muru de Berlín y al recuperar la consciencia atopase con una familia emperruñada en facela creer qu’inda pervive’l socialismu.