Cine

Los realizadores Xuan Lluis Ruíz y Llucía Herrera viaxen nos prósimos díes a Rusia cola intención de rodar pal so documental ‘L’escaezu’ los testimonios de Neños de la Guerra asturianos residentes n’antigua Unión Soviética dende la so evacuación en 1937. Xunta ellos viaxa’l grupu Mus nuna minixira que los va llevar a Moscú y San Petesburgo y na qu’actuarán pa los supervivientes d’esta diáspora. El conciertu ye parte del filu argumental de la película de Ruíz, un proyectu nel que los músicos de Mus van poner dalgo más que la banda sonora.

El proyectu presentóse na Conseyería de Xusticia y Esteriores nun actu que cuntó cola presencia del so titular, Francisco Javier García Valledor, y d’un grupu d’estudiantes d’Hestoria de la Universidá d’Uviéu que realicen un trabayu, nel so casu académicu, tamién sobre la memoria de los Neños de Rusia. Entrambos proyectos cuenten col apoyu económicu de la Conseyería, esmolecida, aseguró García Valledor por “recuperar una parte de la hestoriaescaecida d’esos homes y muyeres”.

Nel actu tuvieron presentes la co-directora de “L’escaezu” Llucía Herrera y Fran Gayo, componente del grupu Mus, al so llau Pablo Montes, en representación del equipu d’investigación de la Universidá d’Uviéu y Carmen García, profesora d’Hestoria Contemporánea y coordinadora académica del trabayu.

El músicu Fran Gayo desplicó los oríxenes del proyectu cinematográficu de Ruíz y Herrera y de la colaboración de Mus nél: “contratáranos p’actuar en Moscú y San Petesburgo y nun principiu pensóse na posibilidá de que nos acompañara un equipu pa grabar les actuaciones, sicasí el fechu d’entamar esos conciertos por sí solos acabó por paecenos insustancial, l’asuntú cambió cola coincidencia del documental que proyectaron facer Xuan Lluis y Llucía, y el proyectu empezó a medrar y cobrar sentíu”. Pal músicu xixonés la posibilidá d’ufiertar un conciertu especial “con un repertoriu que nun ye’l del grupu, basáu en temes populares asturianos, va ser una auténtica preba de madurez pa nós, una esperiencia que nos va marcar y si la receptividá

d’estos ‘neños de la guerra’ ye positiva, diba ser una de les mayores satisfaciones de la nuestra vida musical, nun m’importaría después sacar un discu y que nun vendiéramos nin una copia, ya tábamos bien pagaos con esi conciertu énte esos homes y muyeres”, afirmó p’añedir que “se trata d’un conciertu d’altu riesgu, probablemente el más difícil que vamos dar nunca”. Gayo refirióse al sentíu d’un proyectu como ‘L’escaezu’ na necesidá de “recobrar una parte de la hestoria y la identidá d’Asturies que-yos foi negada” a los neños evacuaos na guerra civil y que “tamién se nos quiso negar a les xeneraciones posteriores”. La realizadora Llucía Herrera afondó nesa “falta de referencies na memoria colectiva d’un tiempu y d’una xente que formen parte de la identidá oculta d’esti país” y agradeció el sofitu de la Conseyería de Xusticia y Esteriores y de l’Axencia Asturiana d’Emigración, que sufraguen los gastos del viaxe del equipu a Rusia: “ensin esi apoyu y sobretoo el moral el proyectu hubiere sío bien difícil de llevar a cabu”. Herrera tamién quiso agradecer y tener una alcordanza especial pa la presidenta de l’Asociación de Neños de Rusia d’Asturies, Araceli García, “por toles facilidaes que nos ufiertó y el so aliendu constante nel proyectu”.

El resultáu final de “L’Escaezu” va ser un documental de llarga duración filmáu ente Asturies y Rusia colos testimonios orales de ‘neños’ evacuaos a l’antigua Unión Soviética na caida del frente republicanu d’Asturies en 1937. La presencia latente o perceptible de los sones señaldosos y envolventes de Mus, xunto a la mirada iluminadora de Xuan Lluis Ruíz y Llucía Herrera, serán los testigos de les narraciones reales de los supervivientes al tráxicu tiempu hestóricu que-yos tocó vivir y sobremanera al escaezu na memoria del presente y del futuru.

Los cinco meyores cortometraxes de la edición correspondiente al añu 2003 del Festival Internacional de Cine de Xixón acaben d’apaecer publicaos nun DVD de difusión comercial. El sellu barcelonés theEND ye’l responsable de la escoyeta del certame xixonés, que se presenta dientro una colección na que s’ufierten les meyores producciones en formatu de cortu de los festivales de Sitges, Alcalá d’Henares y InCurt. Na esbilla del festival de Xixón inclúise ‘7,35 de la mañana’ de Nacho Vigalondo, nominada a la última edición de los Oscars.

Los títulos seleccionaos na entrega correspondiente a la edición 41 del certame internacional son amás del musical de Vigalondo, la producción danesa ‘Smá skred/Pequeñas avalanchas’ de Brigitte Staermose; ‘El Patio’, cortometraxe arxentín de la realizadora Milagros Mumenthaler; ‘Les mains froides/Las manos frías’, producción belga de John Shank; y ‘Viernes’ del cineasta español Xavi Puebla.

El sellu barcelonés theEND, editor d’esta serie de DVDés, quier dar a conocer al través d’ella les meyores producciones nacionales y internacionales que se proyectaron en festivales españoles nun formatu que nun siempre llega a les sales cinematográfiques o ye de fácil accesu n’edición comercial. La colección titulada ‘Metraje corto’ consta de cinco DVDdés que recueyen xunto a los cinco cortometraxes del Festival Internacional de Cine de Xixón 2003, esbilles de Animat 10 ed. del Festival de Sitges, una selección de los cinco meyores cortos fantásticos de la 36 edición d’esi mesmu festival, Alcine 33 ed. del Festival Internacional d’Alcalá d’Henares ya InCurt 4 ed. del Festival de Cortometraxes d’Europa y del Mediterráneu.

El sellu editor de ‘Metraje corto’ trabaya anguaño na publicación d’otres dos colecciones de DVDés dedicaes al xéneru documental y al video-clip respectivamente.

La segunda edición de l’amuesa ‘Rellumes’ que tenda dar a conocer el trabayu audiovisual d’autores asturianos nel esterior echa a rodar güei na Filmoteca Española de Madrid con dos sesiones a lo llargo d’esti xueves 17 y viernes 18. Programada dientro les actividaes añales del Festival Internacional de Cine de Xixón el ciclu d’esta segunda edición amuesa diez cortometraxes de realizadores asturianos rodaos nos dos últimos años. L’asociación Asturianos en Madrid (ASMA) collabora na organización de l’amuesa na Filmoteca Española.

El ciclu ‘Rellumes’intenta espeyar la realidá de la creación audiovisual n’Asturies anguaño, un panorama “ciertamente interesante, polo menos en propuestes y teniendo en cuenta les dimensiones reales del país”, afirma Fran Gayo responsable de programación del festival xixonés. Esa ye una de les razones que motivaron la programación de l’amuesa itinerante l’añu pasáu y qu’en vista del interés despertáu agora tien la so segunda edición. Pal programador del ciclu: “trátase d’utilizar los calces habituales pelos que’l Festival canaliza actividaes d’intercambiu pa difundir unos trabayos con calidá bastante como pa dar sentíu a una amuesa d’esti tipu”.

N’anterior edición de ‘Rellumes’ l’amuesa consistió nuna sola proyección na Filmoteca Española de Madrid que presentaba trabayos realizaos por autores asturianos dende 1999. Nesta ocasión el miniciclu céntrase na creación audiovisual más recién, acutando la so esbilla retrospectiva a los dos últimos años. Otra novedá resaltable ye la itinerancia de l’amuesa ‘Rellumes 2005’ que podrá vese amás de nes sesiones de güei y mañana en Madrid, nel Centro Galego d’Arte y Imaxe d’A Coruña los díes 13 y 14 de xunu y na Filmoteca de Valencia nuna fecha inda por concretar de la seronda, que podía ser nel mes d’ochobre.

Los cortometraxes que van poder vese nesti miniciclu itinerante son: “Bon voyeur” de Iraida Lombardía, “María Luisa” de Patricia García, “La casa vacía” de Paulino Ibañez, “Nenyure” de Jorge Rivero, “Amáquina” de Francisco Deborja, “Tierra de guerrilleros” d’Amanda Castro, “Entaína” d’Alberto Pardo, “A la cola” de David Goberna y Adrián Castañera, y “Temporada baja” de Sergio G. Sánchez.

Más información

Una amuesa significativa de los trabayos cinematográficos fechos por una decena de realizadores asturianos va poder vese na Filmoteca Española de Madrid. La iniciativa ye del Festival Internacional de Cine de Xixón en colaboración cola asociación Asturianos en Madrid(ASMA) y pretende esportar pa la so difusión el llabor creativu que desenvuelven nos últimos años realizadores mozos del nuevu cine asturianu.

El miniciclu que se va proyectar na Filmoteca lleva’l títulu de ‘Rellumes’ y tenta ser fiel a él: amosar unos rellumes, significativos y prestosos, del trabayu que desenvuelven nel campu del cortometraxe realizadores asturianos. La cita va ser los díes 16 y 17 de marzu y el programa que se ufierta son los cortometraxes: “Bon voyeur” de Iraida Lombardía, “María Luisa” de Patricia García, “La casa vacía” de Paulino Ibañez, “Nenyure” de Jorge Rivero, “Amáquina” de Francisco Deborja, “Tierra de guerrilleros” d’Amanda Castro, “Entaína” d’Alberto Pardo, “A la cola” de David Goberna y Adrián Castañera, y “Temporada baja” de Sergio G. Sánchez.

Ye la primer vez qu’una amuesa tan amplia de lo que se ta faciendo n’Asturies nel campu del cortometraxe se presenta en Madrid y una ocasión única pa comprebar la calidá del nuevu cine asturianu.

L’ecu qu’en diversos medios ta teniendo la información aparecía en El Diario De Valladolid-El Mundo según la cual José Luis Cienfuegos sería’l candidatu propuestu pa ponese al frente de la Selmana Internacional de Cine de Valladolid, por suxerencia del anterior responsable Fernando Lara, sorprendió al director del Festival Internacional de Cine de Xixón que declaró “nun tener más noticia del tema que la d’esos medios”. Cienfuegos afirmó que’l so sitiu “onde toi trabayando ye esti Festival, concretemente preparando’l treslláu de les oficines pa la so nueva sé y nun hai más”.

El responsable del certame xixonés confesó sentise “plasmáu de que se difunda como noticia dalgo no que nun hai tal” y de tener “que desmentir dalgo que namás sé al través de lo publicao en El Mundo y difundío después por una axencia de noticies”. En declaraciones a Asturnews Cienfuegos reafirmó el so compromisu col festival que dirixe dende 1995: “equí toi, como siempre, nes oficines de siempre, col equipu de siempre” comentó, abrumáu poles múltiples llamaes que ta recibiendo pa pregunta-y pola información según la cual sería’l candidatu propuestu pa facese cargu de la SEMINCI de Valladolid.

El nome del director del Festival Internacional de Cine de Xixón apareció publicáu nuna información de la edición vallisoleta del diariu El Mundo na que se recoyía la suxerencia del anterior responsable de la SEMINCI y actual director del Institutu de les Artes Cinematográfiques Fernando Lara, xunta el d’otros posibles candidatos a empobinar el certame pucelanu. José Luis Cienfuegos, mientres trabayaba nos preparativos pal treslláu de les oficines del Festival a la so nueva sé na Avenida Álvarez Garalla, al ser preguntáu sobro si podía llegar a plantease abandonar Xixón énte una ufierta formal de la organización de la SEMINCI descartólo y bromeó: “paezme que tenía de ser una ufierta lo bastante suculenta como pa faceme cambiar d’idea y de costumes, non nun creo que pagase la pena dexar una ciudá tan afayadiza como Xixón”, pa insistir nun tonu más seriu: “equí ye onde toi trabayando, nesti festival, y estos son los mios planes”.

La película musical ‘Divina lluz’ de Ramón Lluis Bande sobro’l discu d’hermanu títulu del grupu Mus ya puede vese en formatu DVD. El sellu madrilanu Acuarela Discos ye’l responsable de la edición del compactu y de la so distribución comercial per tol estáu. El filme cuenta una hestoria de desrraigañu y muerte nel marcu agónicu d’un llugar de les cuenques y el grupu Mus actúa como ‘narrador’ al través de la interpretación en directu de les sos canciones. Bande afirma que más qu’un trabayu en collaboración trátase d’una adaptación llibre del discu de Mus, un de los grupos asturianos de mayor prestixu alluende les nuestres fronteres.

Nueve canciones del duu formáu polos xixoneses Fran Gayo y Mónica Vacas y una hestoria cola que Bande vuelve a filmar el mundu terminal de les cuenques constitúin el cuerpu d’esti llargometraxe col que’l so autor considera cerráu un ciclu de filmes musicales entamáu con “El Fulgor” y siguíu con “Estratexa”. “La triloxía nun cierra dafechu la realización de futuros musicales”, afirma l’autor de ‘Divina lluz’, que trabaya angüañu nun proyectu sobro’l grupu ‘Viva las Vegas’ tituláu ‘Cometí un error’.

La edición en DVD de la película d’hermanu titulu al discu de Mus ye en palabres de Ramón Lluis Bande “el final del procesu, inda ya nun forme parte del trabayu creativu”. Pal realizador asturianu la difusión en DVD ye “una salida hacia’l públicu interesáu y la so mirada crítica, la única que-yos queda a ciertes obres que tienen trancaes les puertes pa la so eshibicion en sales comerciales”.

Nel DVD editáu por Acuarela inclúise tamién el mediumetraxe ‘L’aire les castañes’, el videoclip de Mus ‘Al debalu’ y un recitáu de José Luis García Rúa de la canción ‘Adiós’ de ‘Divina lluz’. El filme ta interpretáu, xunto a los componentes de Mus, polos actores Fran Sariego, Vera Robert, Xuan Coll y Amor Argüelles.

Una miniserie con formatu televisivu y articulada alrodiu de cinco cortometraxes va xuntar lliteratura y imáxenes nun mesmu proyectu de colaboración artística. Poemes de Roberto González Quevedo, Berta Piñán, Ana Vanessa Gutiérrez, Xuan Bello y Pablo Antón Marín Estrada van cobrar forma visual nel trabayu de cinco autores del nuevu cine asturianu: José Braña, Sergio Sánchez, Jorge Rivero, Xuan Lluis Ruíz y Ramón Lluis Bande. La miniserie va estrenase dientro les actividaes de la Selmana de les Lletres Asturianes.

Ramón Lluis Bande, director de la serie y autor d’un de los cortometraxes, afirmó que la idea surdió énte la necesidá d’afayar “un espaciu nel que s’amosaran les creaciones audiovisuales del nuevu cine asturianu dientro’l marcu de la Selmana Lletres” y después “coyó vuelu solu pa convertise nun proyectu autónomu de busca de nueves formes espresives”.

El proyectu complétase con otru asemeyáu de cuñes radiofóniques con poemes de Taresa Lorences, Lourdes Álvarez, Antón García, Felipe Prieto y Martín López Vega. Según Bande, el trabayu ta pensáu como miniserie televisiva, cinco cortometraxes de cuatro minutos de duración col fin d’emitise ún al día y al final la serie entera. El proyectu cuenta col apoyu económicu de la Conseyería de Cultura y inclúise ente les actividaes programaes coles que la prósima Selmana de les Lletres Asturianes rendirá-y homenaxe a la poesía asturiana contemporánea.

Na so vixesimosesta edición, la principal cita añal de la lliteratura n’asturianu contará amás cola destacada participación del poeta y críticu lliterariu irllandés Seamus Heaney, Premiu Nobel, quien según publica’l diariu ‘La Nueva España’ na so edición de güei yá confirmó la so presencia nos actos entamaos, a partir de finales d’abril, pola Conseyería de Cultura.

Ye preciso evitar que se pierda la diversidá cultural, que ta en “peligru real” de desapaición. El cineasta británicu Ken Loach, qu’asiste en Xixón a la proyección de cuatro de les sos películes, llama a lluchar contra la homexeneización del pensamientu, reivindica la comedia como “una forma de resistencia” y alita a esixi-yos a los políticos más ayudes pal cine européu.

Na so primer comparecencia pública na ciudá, que se produxo a última hora de la tarde d’ayeri nel Atenéu Obreru -güei sedrá recibíu nel Ayuntamientu y mantendrá un alcuentru col públicu-, Loach defendió l’amiestu de traxedia y comedia que define los sos llargumetraxes porque, dixo, d’esi mesmu material ta fechu la vida. Énte situaciones como la perda’l trabayu, “o ríes o llores”, sentenció’l cineasta.

Una realidá, sorrayó Ken Loach, qu’inspira les sos películes dende la realidá británica, pero que pue esportase perfectamente a Xixón con casos como la inminente privatización de los astilleros públicos. Tres d’esi procesu, alertó’l director, ta’l “desaniciu de la comunidá” y el riesgu de qu’ocurra como en ciertos llugares d’Escocia onde la desapaición del sector naval propició que la principal industria neses llocalidaes “seya agora el tráficu de drogues y los solarium”.

Pa poder siguir realizando películes de marcada fondura social, Loach -qu’ironizó con que nun tien l’estáu físicu adecuáu pa ser el Michael Moore européu- el cineasta británicu fizo un llamáu altu y claru a les autoridaes comunitaries pa que sofiten con más enerxía el cine fechu n’Europa y ayuden asina a lluchar contra un gran desequilibriu: Cada película ‘made in USA’, recordó Loach, tien sólo pa promoción un presupuestu tres vegaes mayor que tol presupuestu d’un llargumetraxe européu.

El cineasta tuvo tiempu amás p’amosar la so rocea respecto a la Constitución europea, qu’al so xuiciu privatizará más empreses y debilitará a los sindicatos, y pa destacar la perda de llibertaes cíviques depués del 11-S. “La xente tiende a vivir en paz”, sostuvo Loach, pero esa tendencia ta amenazada pola falta de desarrollu económicu y l’enfotu de países como Estaos Xuníos y Gran Bretaña n’entamar “guerres ilegales que maten a 200.000 persones”.

Ken Loach mantendrá esta nueche un alcuentru col públicu nel teatru Xovellanos nel intermediu de la proyección de dos de les sos películes, ‘My name is Joe’ y ‘Raining Stones’, con entraes a la venta a un preciu únicu de 5 euros. Mañana habrá un nuevu doble pase, con ‘Sweet sixteen’ y ‘Navigators’.

Un total de 2.575.000 espectadores en doce meses. Les sales de cine asturianes despacharon esa cantidá de llocalidaes a lo llargo de 2004, según una estadística asoleyada pol Ministeriu de Cultura qu’alluga al Principáu nel númberu 14 de la llista de provincies o comunidaes uniprovinciales con mayor recaudación en taquilla durante l’añu pasáu.

Asina, Asturies, con 91 sales en funcionamientu, facturó pa la industria cinematográfica 12,6 millones d’euros correspondientes a les entraes vendíes, una cantidá nel umbral de lo recaudao nos cines de Zaragoza o Cádiz, pero per detrás de los casi 15 millones atropaos por exemplu en Girona, que cuenta con una cifra de sales asemeyada a la d’Asturies (98), o los 15,7 millones recaudaos nos 98 cines de Las Palmas.

Si, pol contrariu, quier vese’l vasu mediu enllenu, la facturación nes taquilles asturianes superó a la rexistrada en Tarragona, Guipúzcoa y Coruña, nuna llista liderada a gran distancia por Madrid y Barcelona, con 139 y 108 millones d’euros, respectivamente.

No que cinca a la programación, nes grandes pantalles d’Asturies siguiéronse les pautes xenerales cuantificaes a nivel estatal, con un desequilibriu ente la producción europea y la norteamericana: Proyectáronse más películes feches n’Europa, pero el cine d’Estaos Xuníos casi triplicó la recaudación en taquilla: Los llargumetraxes ‘made in USA’ vendieron 450 millones d’euros n’entraes, frente a los 174 millones facturaos pol cine européu.

Asinamesmo, Asturies tampoco nun destacó nuna especial actividá en nenguna de les sos sales que-y valiera figurar na llista de los 25 cines con mayor recaudación de taquilla en 2004. Nesi llistáu predominen cines de Madrid, Barcelona y Valencia, pero figuren tamién sales de Coruña, Sevilla, Málaga y Zaragoza.

Ken Loach apunta Xixón na so axenda. El director británicu, consideráu un referente del llamáu ‘cine social’ facturáu anguaño, visitará la ciudá na primer quincena de xineru pa esplicar la so filmografía énte’l públicu y asistir a la proyección abierta de cuatro de los sos llargumetraxes: ‘Lloviendo piedres’, ‘My name is Joe’, ‘The navigators’ y ‘Sweet sixteen’.

La visita de Loach débese a un ciclu monográficu entamáu pol Atenéu Obreru de Xixón que se cellebrará ente los prósimos 11 y 13 de xineru, y que va completase con una recepción oficial al director británicu nel Ayuntamientu y un alcuentru’l realizador col públicu, na nueche’l 12 de xineru, nel teatru Xovellanos.

Sedrá nesta sala onde se proyecten les cuatro películes previstes: ‘Lloviendo piedres’ y ‘My name is Joe’ el día 12, y ‘The navigators’ y ‘Sweet sixteen’ al otru día, 13 de xineru. Toes elles son amueses representatives del cine cultiváu por Ken Loach, ocupáu en llevar a la pantalla hestories de personaxes urbanos en contestos decadentes y situaciones siempres na llende de dalgún abismu.

Asina, en ‘My name is Joe’ retrátase l’amor difícil ente un ex alcohólicu y una trabayadora social, mientres que nel llargu ‘Lloviendo piedres’ asoléyase l’enfotu d’un desemplegáu en problemes económicos que llucha por proporciona-y a la so fía una primer comunión al altor de les esixencies sociales.

Escenarios problemáticos y trames cercanes a la marxinalidá repítense nes otres dos películes de Loach que se proyectarán en Xixón: Un quinceañeru metíu n’enguedeyos pa face-y prestosa a so ma la salida de la cárcele (‘Sweey sixteen’) y el crucie de caminos al que tá abocáu un grupu de ferroviarios a los que la compañía obliga a optar ente’l despidu indemnizáu o l’acatamientu d’unos nuevos principios.