Sánchez Vicente presenta ‘Realidaes y ficciones’

Esti martes 30 d’ochobre, a les ocho la tarde, va presentase’l nuevu llibru de Xuan Xosé Sánchez Vicente, perconocíu escritor y políticu asturianista. L’actu va ser nel salón d’actos del Vieyu Institutu Xovellanos. El llibru, asoleyáu pola Fundación Nueva Asturies ye ‘Realidaes y Ficciones’ y tolos asistentes van llevar un exemplar.

‘Realidaes y ficciones’ atropa dos tipos de trabayos y estudios: los de la primera estaya son trabayos de socioloxía y política, los de la segunda, de mena lliteraria. Na primera faza, «Asturies, dentro de veinte años» dibuxa’l panorama que pal autor ye’l que “nos gustaría topar a los asturianistes: una patria meyor, más grande y más asturiana, y señala los problemes que pa llograr esi sueñu esisten güei (el fundamental, los partíos madrileñistes o centralistes y la so indiferencia y despreciu por Asturies y los asturianos)”. Dientro la mesma faza, «La identidá asturiana» traza un análisis a lo llargo de la hestoria, hasta llegar hasta güei, de cuálos son los parámetros la nuestra identidá y cómo se constituyen hestóricamente.

La segunda faza ta centrada na lliteratura asturiana nos años del Surdimientu, ampliando y matizando lo que fuera’l yá clásicu trabayu de Sánchez Vicente, ‘Crónica del Surdimientu’, discutiendo les diverses interpretaciones critiques de la época y faciendo un estudiu detalláu d’autores, modes, tendencies lliteraries, y arreyamientu sociolóxicu. D’ente esos estudios el primeru entitúlase «N’homenaxe a Andrés Solar: Los años del Surdimientu: tendencies lliteraries y sociedá».

El segundu y el terceru, como los sos nomes indiquen, indaguen, respectivamente, sobre la poesía del Surdimientu y sobre la prosa: «La poesía del Surdimientu», «La narrativa del Surdimientu. La década de los setenta». Un pequeñu trabayu, «Dos notes sobre dos pilancos de llectura en Marirreguera», onde aclara dos testos, hasta agora escuros, del padre les nueses lletres.