Samartín del Rei Aurelio lleva la lliteratura asturiana a los escaparates del conceyu

El comerciu de Samartín pon “La llingua nel escaparate”. La Conceyalía de Cultura y la Oficina de Normalización Llingüística de Samartín del Rei Aurelio acaben d’entamar una nueva campaña pa fomentar la lliteratura n’asturianu con motivu de la XXXIV Selmana de les Lletres Asturianes. Baxo l’eslogan “La llingua nel escaparate” y dende’l 29 d’abril al 3 de mayu 85 comercios de L’Entregu, Sotrondio y Blimea van tener espuestos nos sos escaparates un mínimu de dos llibros n’asturianu.

A tolos establecimientos participantes va entregáse-yos un cartel col eslogan de la campaña, cartel nel que tamién s’incluyen instrucciones pa que la xente interesao pueda participar nella, yá que van poder ganar un llote de llibros n’asturianu si durante esa selmana respuenden d’un mou correutu a les entrugues que se van facer dende la páxina de facebook de la Oficina de Normalización Llingüística del conceyu rellacionaes con toos esos llibros.

Con esta campaña búscase convertir al conceyu de Samartín nun gran escaparate de la nuestra lliteratura, mostrando asina l’arguyu de tener una amplia nómina d’obres y autores d’indiscutible calidá. Por too ello, durante esa selmana van tener cabida nos escaparates títulos de tolos xéneros y pa toles edaes, una bona muestra cola que se pretende dar a conocer a la xente la lliteratura que se fai n’Asturies, animándolos asina a que llean y disfruten d’estos llibros.

Ver semeyes de los escaparates colos llibros