Ryan Reynolds avanza’l primer trailer de Deadpool 2

L’actor y productor Ryan Reynolds regaló a los sos siguidores daqué que-y taben pidiendo a berríos: el primer avance de Deadpool 2, la remortina del superhéroe más gamberru de Marvel, que l’añu pasáu ufrió la primer entrega siendo la película pa mayores de 18 años más taquillera de la hestoria.

En pocu más de tres minutos y mediu, el teaser amuesa delles pistes de per ónde puede dir la segunda entrega. El protagonista Wade Wilson, alies Deadpool, apaez nuna ciudá estrozada, escura y faciendo guardia vistíu de paisanu pa caltener l’orde. Solo cubre la so cara deforme col capiellu de la sudadera.

Col humor habitual d’esti personaxe, cuando Deadpool ve un atracu na cai decide intervenir. Anque antes tien que camudase y escueye faelo nuna cabina telefónica nuna clara alusión a Superman, con banda sonora incluyida. L’únicu problema ye que la velocidá nun ye una de les grandes cualidaes del cabileñu personaxe interpretáu por Ryan Reynolds y cuando termina de vistise yá ye demasiáu tarde.

Al salir de la cabina pon aldu escontra’l caleyón onde se producía’l robu, pero antes manda a callar al propiu Stan Lee, que nesta ocasión fai d’él mesmu y non otru personaxe figurante de “el so” universu Marvel. Al llegar namá atopa a la víctima muerta nel suelu y ensin rastru del lladrón.

Ente los guiños que s’aprecien nel teaser destaca’l cartelu del estrenu de ‘Logan’ nunos cines. Supuestamente ye la última película del mutante Llobatu que va interpretar Hugh Jackman. Eso ye daqué que quier evitar Ryan Reynolds, quien-y manda flores, duces y requilencies al so amigu pa intentar convencelo de trabayar nel futuru con Deadpool.

Otru detalle que llama l’atención son los cartelos de la serie televisiva ‘Firefly’, protagonizada por Nathan Fillian. Dende va tiempu vien rumoreándose enforma con qu’él daría vida a Cable en Deadpool 2 y esta podría ser la confirmación definitiva.