Remata’l trimestre más difícil de la educación asturiana

Esti xueves 18 de xunu rematen les clases pa los miles d’alumnos d’Infantil y Primaria d’Asturies. Los de Secundaria fadranlo’l día 23 y el cursu va terminar, de forma oficial, el 30 de xunu.

Los estudiantes de segundu de Bachilleratu van ser anguaño los postreros en cerrar los llibros, van facer el 2 de xunetu, última xornada de la EBAU. Entra asina na so recta final el trimestre más díficil de la educación asturiana, el primeru que se celebró ‘online’. El qu’obligó a modificar tol sistema educativu n’apenes una fin de selmana. El que camudó les aules poles pantalles.

Cuando’l xueves 12 de marzu dio la orde de nun volver a los centros educativos a otru día, pocos podíen imaxinar que non solo nun volveríen entós, sinón que nun lo fadríen más en tol cursu. Unos 170.000 estudiantes asturianos de tolos niveles educativos viéronse obligaos a siguir el cursu dende casa, con fienda dixital, problemes de conexón na zona rural, dificultaes añedíes para los alumnos con necesidaes especiales.