Refugu na comunidá educativa a la vuelta a clas de los neños d’Infantil

El refugu ye xeneralizáu na comunidá educativa a la posible vuelta a les aules de los neños d’Infantil. Los y les directores de los centros consideren «complicao ya inseguro» recibir a los pequeños, mentantu que pa los que preparen la EBAU atalanten que nun habría inconvenientes.

La reacción xeneral de la comunidá educativa asturiana ye de sorpresa al escuchar al presidente del Gobiernu dicir qu’a partir del 25 de mayu puen volver a les aules los menores de 6 años si el proxenitores trabayen. Nengún centru educativu cuntaba con ello, menos pa camentar que volvieren los de segundu de Bachilleratu, como va asoceder, pa les clases de repasada antes de la EBAU. Inclusive podía cuntase colos estudiantes d’otros finales d’etapa, como cuartu d’ESO ya, inclusive, sestu de Primaria, que van pasar al insitutu en septiembre. Pero naide esperaba a los más pequenos.

Asina que l’anunciu de Pedro Sánchez, qu’enagora nun foi acompañáu de más esplicaciones, causó sorpresa y tracamundiu, pero tamién malestar y refugu. Coinciden les direiciones de colexos en que nun se trata d’una midida con una justifición educativa, sinón social, de conciliación familiar.

Poro, en Bachilleratu nun hai tanta esmolición. Va Haber que desagafar, poner mázcaros, guardar distancies y estremar grupos, pero trabayar con alumnos preuniversitarios ye más fácil nesti sentíu. Poro, toos esperen instrucciones de la Conseyería d’Educación, que tien d’afaer a Asturies la decisión del Gobiernu.