Récord de filmes inscritos nel XVI Certame de cortometraxes “Avilés Acción”

Un total de 570 curtiumetraxes presentáronse na XVI Edición del Certame Nacional de Curtiumetraxes del Avilés Acción Film Festival, partíos ente la Sección Oficial y la Sección Asturies lo que supón un récord na hestoria del festival, que volvió recibir el Certificáu AIC calidable pa Festivales de Curtiumetraxes.

El Certame cunta dende’l 2016 col Certificáu AIC calidable pa Festivales de Curtiumetraxe, y volvió a recibilu anguaño calteniendo asina esta distinción añal pa estremar y premiar a los festivales que realicen una función exemplar pal espardimientu, protección y profesionalización del cine y la so industria, y n’especial del curtiumetraxe.

Cerráu’l plazu d’inscripción, sacante la Sección Aules Móvil, que remata’l 1 de mayu, la organización del festival superó’l mediu millar de curtiumetraxes presentaos, lo que supon un récord de participación na hestoria del Avilés Acción Film Festival. Ponse asina de manifiestu que’l curtiumetraxe nel nuesu país gocia de bien bona salú, tal que demostró anguaño Juanjo Giménez col so curtiumetraxe ‘Timecode’, Palma d’Oru en Cannes y nomáu al Óscar a meyor curtiumetraxe d’acción en vivu.

El festival va celebrase del 27 de mayu al 3 de xunu, calteniendo los ocho díes d’actividaes debíu al ésitu de convocatoria na pasada edición, que lo consoliden como una de les cites cinematográfiques más importantes de la rexón. Anguaño, el festival va potenciar de manera considerable la exhibición de llargumetraxes internacionales, y mientres les selmanes previes al festival, volverá tenese una cita col Cine nos Barrios.

La cuantía de los premios del certame xube a 7.250  euros, aumentando al respective de la edición anterior y convirtiéndose n’unu de los más elevaos de too el circuitu de festivales d’España.