Rap y karaoke pa falar llingua fuera de les aules

A lo llargo de tola mañana, 500 estudiantes de Secundaria de dolce centros de la ciudá qu’imparten asturianu tomaron parte un añu más nuna perbona iniciativa. Sol lema ‘¡Saca la llingua!, l’oxetivu yera que «los mozos axuntárense fuera de les aules y demostraren les sos conocencies d’asturianu nun contestu risonderu, informal y distintu», según apuntó la responsable de la oficina, María Xosé Rodríguez.

Nesta ocasión, había diez actividaes que teníen la música como exa central, pos «anguaño la cuadraxésima Selmana de les Lletres Asturianes ta dedicada a esta disciplina». Asina, los estudiantes rapearon, aldovinaron cantares interpretaos con acordión y participaron nun concursu de karaoke. Pa la ocasión, cuntaron cola presencia de cinco músicos asturianos: Xune Elipe, David Varela, Toli Morilla, Ruma Barberu y Delfo Valdés. «Cada centru presenta un cantar n’asturianu y finalmente dan premios a la meyor coreografía, meyor voz solista ya interpretación», apuntó María Xosé Rodríguez.

Anguaño sumábase’l IES El Piles. «Tienen bien bon nivel de llingua y cultura asturiana», dicia ayeri Xandru Díaz al rematar los decimosestos ‘Alcuentros de la Mocedá’ col asturianu, entamaos pola Oficina de Normalización Llingüística del Conceyu de Xixón nel Muséu del Pueblu d’Asturies.