Proponen un pautu pola toponimia asturiana nos medios de comunicación

Dientro de les XXX Xornaes Internacionales d’Estudiu de l’Academia de la Llingua Asturiana, los periodistes Próspero Morán ya Inaciu Galán propunxeron a los medios asturianos la firma d’un “Pautu pola recuperación y el fomentu de la toponimia tradicional asturiana”. Un alcuerdu, qu’esplicaron, “bien podría impulsar el Gobiernu d’Asturies o l’Academia de la Llingua Asturiana, col sofitu d’organizaciones civiles, y que supondría la utilización de la toponimia asturiana oficializada o en procesu d’oficialización de forma efeutiva nos medios escritos y audiovisuales asturianos”. La propuesta foi acoyida con interés por Ana Cano, presidenta de la institución organizadora del congresu.

Nesti pautu propuestu nes XIDE “los medios firmantes comprometeríense a utilizar la forma asturiana de los topónimos de forma oral y escrita, incluyendo los casos nos que la oficialización se ficiera cola forma castellanizada o falsificada incluyida nel decretu correspondiente”, de manera que se faiga un usu efeutivu de los mesmos.

Amás, los autores de la comunicación “La toponimia asturiana nos medios de comunicación: situación y perspeutives” falaron de la necesidá de que’l Gobiernu d’Asturies “s’empobine a los medios estatales, pa da-yos a conocer la situación actual de la toponimia asturiana, agora oficial, y afalalos al usu correutu de la mesma, que debería tar usándose”.

Y ye que Morán y Galán barrunten que “según espresa la norma interna de los llibros d’estilu de dalgunos medios de calter estatal la toponimia asturiana habría tar usándose yá nes sos formes tradicionale”. Pa estos dos periodistes “ye probable que’l desconocimientu seya en munchos casos, sobremanera fuera d’Asturies, lo que lleve al usu de topónimos yá derogaos frente a los autócnos yá oficializaos”.

Recordaron amás que ye bien díficil “facer normales los topónimos asturianos, fuera d’un procesu que nun incluya la normalización del idioma nel que s’espresen esos topónimos”.