Presentada la imaxe del Parque Científicu y Tecnolóxicu Avilés “Isla de la Innovación”

El conceyal de Promoción Económica d’Avilés, Manuel Riola, presentó esta selmana pasada la nueva imaxe corporativa del Parque Científicu y Tecnolóxicu “Avilés Isla de la Innovación” y les actividaes promocionales que se van desenvolver hasta xineru.

Nun actu celebráu nel ITMA, unu de los centros d’investigación que formen parte del Parque, la nueva imaxe corporativa del Parque Científicu y Tecnolóxicu “Avilés Isla de la Innovación” cola participación tamién de José Manuel Fernández, del estudiu creativu Trisquel Media, empresa autora del logo del Parque.

Manuel Riola, destacó qu’esta imaxe “representa que’l Parque ye un emisor d’idees, un emisor de la imaxe de marca de la ciudá y un emisor de la nuesa actividá empresarial. Nun partimos de cero, tenemos un Parque yá construyíu compuestu por empreses de producción primaria d’aceru, per centros d’investigación piqueros internacionalmente y por empreses que supieron tresformase y que se dediquen a producir productos rellacionaos col aceru pero apurriéndo-y valor añedíu y una productividá enorme de la que se beneficia la economía de la ciudá”.

Fernández esplicó que nesta imaxe quíxose reflexar los atributos más identificativos del proyectu, remembrando oportunidá, modernidá y talentu. Una isla, un símbolu, un estímulu xenerador, un emisor d’idees, una exa en redol al que xirar, un nuevu horizonte pa la ciudá. Esta identidá visual va tar presente en tolos productos promocionales del parque, tantu en comunicación escrita como dixital, en publicaciones, nel portal web y na señalización.