Porcía conviértese un añu más en capital de la música folk

Esti próximu sábadu 27 d’agostu, a partir de les 22:30 hores va tener llugar na Alamea del llugar de Porcía, como cada añu, a una nueva edición del festival de música folk decanu n’Asturies “A Noite Celta de Porcía”.

Ventiocho ediciones van yá desque unos vecinos del llugar d’El Franco, asitiáu nel conceyu del mesmu nome, tomaren la iniciativa d’entamar un festival de música folk que diera cabida a grupos del folclore tradicional del arcu atlánticu fundamentalmente.

Güei día, el formatu y el prestixu de Porcía tópense dafechu consolidaos y asina, ufierta un escenariu musical nuna redolada privilexada como’l de la islla fluvial de l’Alamea de Porcía, pol que tuvieron oportunidá de pasar grupos y solistes tan emblemáticos como’l míticu Manolo Quirós o Beleñu, l’irlandeses Tamalin, Fred Morrison o la David Munnelly Band, los escoceses Miró o Tannahill Weavers, el bretones D´jboubep o los gallegos Luar na Lubre, y la práctica totalidá de los grupos folk asturianos qu’esisten nel panorama musical contemporaneu.

Ye asina que l’Asociación Cultural Alamea, con sede nel llugar d’El Franco, puede axudicase l’ ésitu al poder celebrar col fiel públicu asistente una nueva edición, que va cuntar coles actuaciones de la Banda de gaites “El Trasno”, de Cuaña, Tuenda, Llangres, Tejedor y La banda… Latira.

Como cada añu, la organización de la Noite Celta de Porcía ufierta serviciu de chigre y les habituales sardines la plancha a disposición del públicu asistente.