Planeta llánzase a la formación con nuevos ciclos de FP

El Grupu Planeta punxo en marcha esti cursu escolar en Barcelona una nueva ufierta de ciclos de formación profesional de grau mediu y superior, que pon el focu nes nueves tecnoloxíes y les práctiques n’empreses, coles mires de responder a les necesidaes empresariales.

Más de 40 empreses participen nesti proyectu, que’l Grupu Planeta llanza anguaño cola apertura d’un centru educativu en Barcelona, nel que van estudiar 200 alumnos, anque entama abrir otros en Madrid, Valencia y Sevilla nun plazu d’unos cinco años pa ufrir estudios de FP Dual a un costu d’unos 2500 euros.

El centru de Barcelona imparte yá delles titulaciones oficiales de grau mediu y superior: d’Aidante d’Enfermería, Xestión alministrativa, Sistemes microinformáticos y redes; y los de grau cimeru de Comerciu Internacional, Xestión de vientes y espacios comerciales, Educación Infantil, Alministración y finances, Desenvolvimientu d’aplicaciones web y Tresporte y loxística.

El director xeneral de la División de Formación del Grupu Planeta, Carlos Giménez, esplicó en rueda de prensa que’l propósitu de la iniciativa, bautizada como iFP (innovación en Formación Profesional), ye promover una FP en conexón col empresariáu y cuantimás coles pymes. Nel so primer añu d’andadura, el Grupu Planeta ufierta 50 beques pa estudiantes con bon currículum y escasos recursos económicos y un preciu de matrícula d’unos 2.500 euros per cursu.

El grupu editorial español invirtió dos millones d’euros na apertura del centru de Barcelona y va a la gueta d’un perfil d’alumnáu que ye’l d’una persona d’ente 17 y 40 años, pa lo que’l plan metodolóxicu contempla flexibilizar los cursos por que puedan ser compatibles col trabayu y la familia, gracies al usu estensivu de les nueves tecnoloxíes.

Ente les empreses collaboradores, destaquen Alain Afflelou, Antena 3, Asepeyo, Caprabo, la Cámara de Comerciu de Barcelona, Celsa Group, Cirsa, DHL, Fundación Bertelsmann, Intel, Microsoft, Pimec, Racc, Simon o Unilever.