Portada Música Pepín Robles repite como candidatu a la meyor canción n’asturianu, xunta Chus Pedro y Skanda

Pepín Robles repite como candidatu a la meyor canción n’asturianu, xunta Chus Pedro y Skanda

by asturnet

Pepín Robles repite. El compositor, vencedor del premiu a la meyor canción n’asturianu na primer y hasta agora única edición fallada’l galardón, concurre tamién esti añu na final con un tema cantáu por Vicente Díaz. La terna de finalistes al premiu, que l’Academia de la Música entregará’l 22 d’abril en Madrid, complétenla Chus Pedro Suárez y el grupu Skanda.

Según asoleyaron esti mediudía representantes de la entidá musical, tres temes d’estremáu xéneru opten a algamar el galardón: ‘Agora sal a bailar’, interpretáu por Chus Pedro Suárez ya iguáu por ésti xunta Gabino Antuña; ‘La Pola de Siero’, compuestu por Pepín Robles y na voz de Vicente Díaz; y ‘Sangre d’ochobre’, d’autoría collectiva ya interpretáu pola banda Skanda.

Trátase de la segunda ocasión na que se convoca y falla la categoría de meyor canción en llingua asturiana dientro de la convocatoria xeneral de los Premios de la Música, que s’entregarán nuna gala que sedrá restransmitida en directu pola cadena pública Televisión Española. Hasta esi mesmu momentu, na nueche’l 22 d’abril, nun se conocerán los ganadores.

En 2004, la concesión del premiu a Robles pol tema ‘Nunca máis’, interpretáu por Manolo Morán, obtuvo una recepción marcada pola rocea nel mundu de la música n’asturianu, yá qu’estremaos autores y músicos restáron-y representatividá a la canción ganadora. El propiu Víctor Manuel San José declaró a Asturnews que la mayoría de los que votaron el tema de Robles “nun lu conocíen”.

Llista oficial de finalistes al meyor tema n’asturianu

Tamién te podria gustar