Pedro Pangua tornó a Lorient pa impartir una Master Class

El gaiteru asturianu Pedro Pangua tornó esta edición a Lorient depués de munchos años ensin averase al Festival Intercélticu pa impartir la tradicional Masterclass cola que se abre la programación del Palaciu de Congresos.

Pasara cásique una docena d’años dende que Pedro Pangau tuviera per última vegada el festival Interceltique de Lorient, faciendo compañía al grupu Verdasca que s’estrenaba d’aquella nel festival. Y son enforma d’años, que recuperó nun día. Esti sábadu, enantes de participar como xuráu del 34 Troféu Mac Crimmon, el popular gaiteru asturianu impartió la Master Class cola qu s’abren les actividaes del Festival na so primer fin de selmana nel Palaciu de Congresos.

La Master Class qu’impartió Pedro Pangua xuntu al gaiteru gallegu José Manuel López tuvo llugar a les diez de la mañana nel Palais de Congrés de Lorient, nel mesmu escenariu onde pela tarde tuvo que xulgar a los gaiteros concursantes del Troféu MacCrimmon.