Pablo Devigo ganó’l Mac Crimmon superando a Coya, Pablo Carrera y Guardado

El gaiteru gallegu Pablo Devigo ganó’l Troféu Mac Crimmon 2008 nel Festival de Lorient depués d’una de les ediciones más competitives que viviera esti veteranu concursu internacional de Gaita gallega y asturiana. Tres d’elli quedaren clasificaos el tamién gallegu Alberto Coya y los asturianos Pablo Carrera y Marco Antonio Guardado, qu’otra vuelta queda nel cuartu llugar, depués de la so sesta participación nesti Troféu.

Probablemente fuera ún de los Trofeos Mac Crimmon más competitivos que se recuerden incluyendo la dómina na que’l concursu se llamaba Macallan. Competitivu pola calidá del trabayu presentáu polos nueve gaiteros que participaben nel concursu.

La única representante bretona, Marie Le Cam, entama a tocas con soltura les pieces asturianes y gallegues, enforma difíciles pa una escuela, la bretona, que práuticamente desconocía la música de nueso hasta los años 90. Y los que participaben per primer vegada nel concursu, como Llorían García, llograron a pesar de los nervios una interpretación afalagable, sobremanera a la vista de la pergrande dificultá de les pieces qu’escoyeron pal concursu. Cada añu s’exisen más los gaiteros asturianos y gallegos nel MacCrimmon y eso nótase nel concursu.

Algunos requintos estropiaron actuaciones d’intérpretes gallegos nes pieces asturianes amosando la dificultá pa los nuesos vecinos d’averase a la música del país. Y lo mesmo asocedía a la contraria. Pero’l concursu brilló nel planu interpretativu como había munchos años que nun lo facía… Otros años, les coses taben más clares pa ser a albidrar el ganador ensin munchos conocimientos del instrumentu… Esti añu, les coses taben más difíciles.