Ochobre trai Certame de Curtiumetraxes a Samartín

Samartín del Rei Aurelio celebra nesti mes d’ochobre una nueva edición del Certame Nacional de Cortometraxes Aula 18, con una cartelera d’esceición compuesta por 52 cintes, ente les que figuren les meyores producciones nacionales del momentu.

La inauguración del certame va tener llugar el día 5 d’ochobre, a les 19, 30 hores, nel Teatru Municipal, en L’Entregu, cola proyección de los 12 curtios de la Sección Asturiana.

Un añu más, el certame recibió una amplia respuesta de distintes localizaciones d’España, con un total de 685 curtiumetraxes presentaos, ente los cualos 30 yeren asturianos y unu foi rodáu en Samartín del Rei Aurelio. Toos ellos fueron visionaos pola organización a quien-y correspondió la xera d’escoyer los meyores curtiumetraxes a concursu.

Los curtiumetraxes escoyíos a concursu dientro de la Sección Oficial, un total de 40, van poder vese los díes 6, 7, 8, 13 y 14 d’ochobre, a les 19,30 hores, nel Teatru Municipal; na Casa de la Mocedá, en Sotrondiu; l’Antiguu Institutu, en Xixón; en Llata de Cinc, n’Uviéu, y nel chigre Ochobre, en L’Entregu. Como novedá, dempués de casa sesión cinematográfica va tener llugar la proyección d’un curtiu de los varios que fueron arrexuntaos na sección paralela ‘Con otra mirada’, consideraos trabayos de gran calidá pero que quedaron escluyíos de la sección oficial.

Los curtiumetraxes a concursu toquen prácticamente tolos xéneros cinematográficos: ficción, terror, comedia, thriller, melodrama, fantasía… etc… y cunten en munchos casos cola collaboración de renombraos actores y actrices de la talla de Belén Rueda, Marisa Paredes, Carlos Álvarez Novoa, Carmelo Gómez o Jorge Sanz. Otros curtiumetraxes yá pasaron por certames de prestíu nacional ya internacional, como Sitges o Cannes.

El 15 de setiembre la programación contempla la proyección del llargumetraxe ‘L’Amor Bruxu’, (1986), de Carlos Saura, sobre la idega del amor imposible, y galardonáu con dos Goya a la meyor fotografía y meyor vestuariu. Precisamente, esta película exerze de filu conductor de la gala de clausura, qu’anguaño rinde homenaxe al musical español. La gala va tener llugar el 14 de payares, nel Teatru Municipal, cola entrega de los premios: Primer, Segundu y Tercer Premiu, Meyor Curtiu de dirección asturiana, rodáu nel Principáu o en llingua asturiana y Meyor Interpretación.

El certame de cine, entamáu por Aula 18, cuenta col patrociniu del Conceyu de Samartín del Rei Aurelio y la Conseyería d’Educación y Cultura. La entrada ye llibre y el votu popular exercelu’l públicu en cada sesión, al rematar les proyecciones.