Nuberu cellebra la despedida con conciertos especiales, una esposición y una nueva web

Nesti 2008 y tres más de trenta años de trayectoria, Nuberu van despedise de los escenarios con dellos conciertos y iniciatives especiales. La banda de Chus Pedro y Manolo, van poner sobre les tables tres tipos distintos de conciertu: un básicu, colos dos músicos acompañaos nel escenariu por batería, baxu y pianu; otru de formatu clásicu, cola formación y instrumentación habitual; y un conciertu de gran formatu, nel que la banda va facer un repás por tol so repertoriu. Nestos últimos recitales van sonar les primeres canciones de la banda, tocaes namái con una guitarra de madera, pa dir avanzando poles distintes estayes creatives del grupo, a midía que van amestándose músicos al conciertu.

L’añu nel que Nuberu abandonen la escena musical activa tamien va tener presencia n’internet al travies de la web www.nuberudespedida.com, que va tar operativa a lo cabero d’esti mes de marzu. Nesti espaciu, amás d’información sobre’l grupu y los conciertos, va haber la posibilidá de descargar canciones y distintu material. Amás quier convertise nun espaciu participativu onde los seguidores de Nuberu cuenten les sos propies hestories alredor de les canciones del grupu.

Pa completar esti programa d’actividaes tamien se va poner en marcha una esposición itinerante sobre Chus Pedro y los suyos. “Ya llovió” va repasar, al travies de vídios, prensa, manuscritos, discos, oxetos y material diversu, la historia de la banda (1978 a 2008) que tamien ye parte importante de la hestoria cultural asturiana. Na amuesa va poder vese los oríxenes de Nuberu, venceyaos al movimientu asociativu, los primeros conciertos en Los Maizales, el compromiso con la cultura y la llingua asturiana o los tiempos del nuevu canciu astur.