Sociedá Asturies desmárcase como la única comunidá que pierde un númberu sensible d’habitantes by asturnet 23 d'avientu, 2004 Mil seiscientos habitantes menos, nun añu. Asturies foi la única comunidá autonóma que perdió un númberu reseñable d’habitantes a lo llargo de 2003, con una baxada porcentual del 0,15 de la población nesi periodu y sólo siguida por Galicia, qu’alpenes perdió un 0,003 por cientu de los sos habitantes. El restu d’autonomíes ganaron población, según los datos del padrón oficializaos güei pol Conseyu de Ministros. Con esos datos al llombu, el Principáu afítase como la comunidá que ve marchar o morrer a un mayor númberu de los sos ciudadanos -tanto en términos absolutos como en cifres relatives- por mor de los efectos sumaos de la baxa natalidá, la nueva emigración y la llegada d’una comunidá emigrante en situación regularizada que nun ye a compensar la perda de pobladores. El 1 de xineru de 2004, Asturies tenía un total de 1.073.761 persones empadronaes, 1.620 menos qu’en 2003. Sólo otra comunidá perdió población nesi mesmu periodu, Galicia, pero d’una forma alpenes percibible: L’autonomía vecina perdió sólo 109 habitantes sobro una población total de más de 2,7 millones de ciudadanos, lo que representa’l 0,003 por cientu. Siempre según los datos del padrón que güei declaró oficiales el Conseyu de Ministros, y que cifren la población total del Estáu penriba de los 43 millones de persones, Asturies allúgase como la quinta comunidá autónoma con menor númberu absolutu d’habitantes, sólo per delantre de Cantabria, Baleares, Navarra y La Rioja. 23 d'avientu, 2004 0 FacebookTwitterPinterestEmail
Comunicación La radiotelevisión autonómica naz ‘de fechu’ cola toma de posesión de los conseyeros del ente by asturnet 22 d'avientu, 2004 La radiotelevisión autonómica asturiana naz güei ‘de fechu’. Depués de dos décades d’alderique y d’un llargu procesu alministrativu que llegó al Tribunal Constitucional, los nueve directivos qu’integrarán el másimu muérganu decisoriu del nuevu ente, el conseyu d’alministración, asumen los sos cargos y ponen en marcha la maquinaria de la tv, qu’empezará a emitir a mediaos de 2005. El conseyu que rexirá l’ente públicu de comunicación tendrá, ensin sorpreses d’última hora, sólo representantes de los partíos que gobiernen el Principáu en coalición, PSOE ya Izquierda Xunida-Bloque por Asturies. Fiel al so argumentu de que la tv ye un proyectu caru y prescindible, el PP arrenunció a nomar a los sos conseyeros y tará ausente nel muérganu decisoriu que güei queda constituyíu. Asina, los conseyeros que güei asumen el so cargu son namás nueve, acordies cola llista qu’aprobó el Parlamentu asturianu hai agora venti díes: los ex alcaldes socialistes Jesús Landeira (Valdés) y Manuel Amieva (Llanes), la ex conseyera d’Alministraciones Públiques Angelina Álvarez, l’abogáu Francisco Díaz, la notaria Montserrat Martínez, la economista María Luzdivina Rodríguez; el caderalgu de comunicación Bernardo Díaz Nosty; el profesor de Drechu Constitucional Benito Aláez y l’escritor n’asturianu y técnicu cultural Adolfo Camilo Díaz. Dos décades de camín La idea de contar con una televisión autonómica propia lleva más de dos décades presente, con ciclos socesivos de mayor o menor interés, na sociedá asturiana. Somorguiáu na falta de concreción y consensu políticu, el proyectu permaneció nuna situación dostracismu nos años ochenta, dexando a Asturies al marxe del intensu ciclu de creación de les primeres televisiones autonómiques de titularidá pública (Euskal Telebista, 1982; TV3 de Catalunya, 1983; Televisión de Galicia, 1985; Canal Sur, Canal 9 y Telemadrid, 1989) y faciéndola asistir, amás, al surdimientu de segundos canales (ETB-2, 1986; Canal 33, 1989). Depués que la reforma del Estatutu d’Autonomía recoyera, en 1999, la potestá d’Asturies pa regular, crear y mantener la so propia televisión, radio y prensa, engarradielles internes na Federación Socialista Asturiana (FSA) impidieron que’l proyectu saliere alantre nel primer mandatu de Vicente Álvarez Areces, qu’esi mesmu añu algamó la presidencia’l Principáu. En marzu de 2003, aprobóse a la fin la Llei de Medios de Comunicación Social, que’l PSOE modificó poco depués pa poder salvar el bloquéu que’l PP exercía a la creación de la tv: Un cambiu llegal ‘ad hoc’ -recurríu pol Gobiernu d’Aznar énte’l Constitucional y consagráu al aportar Zapatero a La Moncloa- permitió constituyir el conseyu d’alministración con a lo menos sólo ocho miembros en representación de polo menos dos grupos parlamentarios. N’otres pallabres, el cambiu llegal fizo posible que’l conseyu eche a andar sólo colos representantes actuales de PSOE ya IX-Bloque. Archivu. El Gobiernu apuesta pola presencia del asturianu nos programes infantiles de la tv autonómica 22 d'avientu, 2004 0 FacebookTwitterPinterestEmail
Escéniques Cultura pal Arango plantega un teatru de 350 butaques y una fundación pactada con Dermoestética by asturnet 22 d'avientu, 2004 Una sala teatral de 350 butaques na planta baxa y tres opciones nel primer pisu: Un gran centru d’ociu con cafetería y tienda; sales pa esposiciones, congresos y cenes de gala; o les propies instalaciones de Corporación Dermoestética. La plataforma Cultura pal Arango plantega, nel so plan de viabilidá pa recuperar la sala como espaciu cultural, una intervención total sobro 13.300 metros cúbicos y una inversión de 1,6 millones d’euros. Nel estudiu ellaboráu pol collectivu cultural, que recibió l’Ayuntamientu a finales de payares y que va presentase formalmente en públicu el prósimu miércoles, plantéguense siete grandes cifres pa sufragar el ‘rescate’ cultural del teatru xixonés: 900.000 euros p’acondicionamientu del teatru, 240.000 pa la estructura del edificiu, otros 180.000 pa igües nel contiguu cine Albéniz, 160.000 pa equipamientu escénicu y 126.000 euros más empobinaos a mobiliariu. Otres dos partíes menores completen les cantidaes suxeríes pa remocicar el céntricu edificiu de Xixón: 48.000 euros baxo’l conceptu d’instalaciones en xeneral y 14.000 euros más destinaos a valtiamientos y llimpieza. En total, 1.668.000 euros, que los representantes de la plataforma cultural proponen financiar creando una nueva fundación d’investigación, promoción y difusión de la cultura asturiana, liderada pola propia Corporación Dermoestética, qu’asumiría el pagu de 1,2 millones (tola inversión prevista, menos los 434.000 euros necesarios pa dividir horizontalmente el teatru, que pagaría directamente Dermoestética). Pa dotar de recursos a la hipotética fundación, Cultura pal Arango plantega la entrada nel proyectu de “mecenes ya entidaes protectores”, o bien repartir tolos gastos ente les principales instituciones y corporaciones de Xixón: Un 40 por cientu a cargu d’Ayuntamientu y Principáu, a partes iguales; un 30 por cientu, tamién a partes iguales, ente Autoridá Portuaria, Cámara de Comerciu y Caxastur; y participaciones cercanes al 5 por cientu de los sectores hoteleru, hosteleru y del comerciu. El collectivu pola recuperación cultural del teatru Arango mantiénse a la espera de que l’Ayuntamientu decida si l’estudiu de viabilidá pal coliséu ye o non asumible, y en casu afirmativu, propicie’l pactu propuestu con Corporación Dermoestética, que yá ultima la so instalación nel Arango pa convertilu nuna gran clínica de tratamientos estéticos. “Ye una propuesta viable y más que razonable”, defendió güei Boni Ortiz, representante de Cultura pal Arango, en declaraciones a Asturnews. Según Ortiz, la plataforma espera una respuesta inminente de l’Alcaldía nos prósimos díes pa evitar el propósitu de Dermoestética: “que pase’l tiempu y nos aburramos”, señaló. 22 d'avientu, 2004 0 FacebookTwitterPinterestEmail
Sociedá Un estudiu antropolóxicu retrata’l pasu de la casería a la gran industria llechera nel occidente by asturnet 22 d'avientu, 2004 De la casería familiar a la concentración de la gran industria llechera. El llibru ‘¿Bótoche unha mao?’, que güei se presentó en Xixón, retrata la tresformación social y económica esperimentada nel occidente d’Asturies nos últimos cuarenta años, al traviés de la comparación de dos estudios de Ramón Valdés del Toro y Elisabeth Lorenzi redactaos, respectivamente, nos años 1960 y 2000. Por tener esi valor de comparanza al asoleyar testos antropolóxicos sobro la mesma zona -el conceyu de Tapia- con cuatro décades ente ca ún d’ellos, l’autora de la investigación más reciente, Elisabeth Lorenzi, sorrayó esta mañana el doble valor de la obra: Los antropólogos afayarán nella los datos científicos d’una acusada evolución; el públicu en xeneral verá nel llibru les claves d’una fonda tresformación d’usos, costumes y formes de subsistencia. Nes más de doscientes páxines del volume -editáu pol Gobiernu autonómicu, el Muséu’l Pueblu d’Asturies y los ayuntamientos de Xixón y Tapia- retrátase, poro, un “procesu mui aceleráu” enforma marcáu polos efectos de les disposiciones de la Unión Europea sobro’l campu asturianu, a partir d’un casu concretu, el de Tapia, que según destacó Lorenzi bien pue representar lo qu’ocurrió nes últimes cuatro décades nel restu d’Asturies. Na opinión del director del Pueblu d’Asturies, Juaco López, el llibru cuya segunda parte ellaboró Elisabeth Lorenzi -l’estudiu de Valdés del Toro qu’integra la primer parte ye un clásicu de los años sesenta, agora reproducíu- “ayuda a que los asturianos nos conozamos meyor a nosotros mesmos” y tien el valir añadíu de tomar como amuesa una de les principales comarques de producción de lleche, actividá que sufrió d’un mou singular l’aplicación de la normativa comunitaria. 22 d'avientu, 2004 0 FacebookTwitterPinterestEmail
Sociedá Arias define l’asturianu como “un muséu estraordinariu de documentación” na evolución de les llingües by asturnet 22 d'avientu, 2004 L’idioma asturianu ye “un muséu de documentación estraordinaria” pa estudiar la evolución de les llingües romániques y sedríemos “analfabetos” si lu dexáremos morrer. El profesor Xosé Lluis García Arias defendió güei esa tesis na presentación de la segunda entrega del Atlas Sonoru de la Llingua, un cd qu’agrupa catorce testimonios orales recoyíos nos conceyos occidentales de Miranda, Grao, Tameza, Teberga y Quirós. El discu tien, según García Arias, un doble interés: Pa los estudiosos de la filoloxía y pa los ciudadanos en xeneral, que tienen por primer vegada al so algame un documentu sonoru nel que s’amuesa la práctica d’una llingua viva, tal como la pronuncien los sos falantes. Nesti sen, l’ex presidente de l’Academia de la Llingua recordó qu’esta entidá recibe de contino peticiones d’amueses orales n’asturianu, amás de solicitúes d’información xeneral sobro’l propiu idioma. Y el cd qu’agora sal a la cai -segunda parte d’un Atlas cuya primer entrega recoyó la fala d’Ibias, Degaña, Cangas, Tinéu, Allande, Somiedu y Miranda- ye un preséu fundamental pa responder a esa demanda d’información, al incorporar lleendes, cuentos, romances y otros rellatos na llingua viva de los sos narradores. Nel Muséu Etnográficu’l Pueblu d’Asturies, en Xixón, García Arias felicitóse de qu’una entidá asina valore de forma singular la llingua como espresión de la cultura porque “tan cultural ye saber facer una madreña, como saber cómo se llama una madreña”, y amosó la so esmolición énte l’apertura de nuevos museos nel Principáu yá que, argumentó, eso lleva a pensar “que’l país muerre”. Fízose ecu de les sos pallabres el director xeneral de Promoción Cultural del Principáu, Carlos Madera, quien llamó a lluchar pa qu’Asturies “nun se convierta nun muséu” y convidó a los ciudadanos a trabayar en comuña na recuperación de la llingua asturiana, superando l’argumentu de que “el nuesu valle ye meyor qu’el d’al llau”, pa evitar que l’idioma se pierda “como llárimes na lluvia”. Ellaborada por Jesús Suárez y Xosé ‘Ambás’, la segunda parte del Atlas Sonoru de la Llingua Asturiana ta editáu en comuña pol Principáu, l’Ayuntamientu de Xixón, el Muséu del Pueblu d’Asturies y l’Academia de la Llingua. Un cartafueyu con imáxenes de los rellatores y les trescripciones de les narraciones acompaña al discu compactu nel que puen escuchase los testimonios. 22 d'avientu, 2004 0 FacebookTwitterPinterestEmail
Plástiques Muerre’l pintor Juan Barjola, figura clave del espresionismu ya inspirador d’un muséu en Xixón by asturnet 21 d'avientu, 2004 L’espresionismu español pierde a una de les sos figures claves nel sieglu XX. El pintor estremeñu Juan Barjola, inspirador del muséu que lleva’l so nome en Xixón y Fíu Adoptivu d’Asturies, falleció esta tarde nuna clínica de Madrid a los 85 años d’edá y dexa tres d’él un bayurosu regueru de cuadros neofigurativos enllenos de collor y contrastes cromáticos. Nacíu en 1919 na llocalidá pacense de Torre de Miguel Sesmero, Barjola recibió a lo llargo de la so carrera los Premios Nacionales de Pintura (1963), de Debuxu (1965) y de ‘Bellas Artes’ (1985), y más recientemente, nel añu 1991, la Medalla d’Estremadura. A finales de la década de los noventa, el Muséu Estremeñu ya Iberoamericanu d’Arte Contemporáneu entamó la primer esposición antolóxica de Barjola a partir d’un cientu d’obres del artista. Creador prolíficu, la relación de Juan Barjola con Asturies tien como episodiu fundamental les dos donaciones de cuadros que’l pintor fizo en 1985, una d’elles con destín al Muséu de ‘Bellas Artes’ d’Uviéu y la otra pal equipamientu xixonés qu’anguaño lleva’l so nome y que’l pasáu xueves cumplió 16 años de vida. En viéspores de l’apertura del Muséu ‘Barjola’ de Xixón, el pintor estremeñu recibió la distinción de Fíu Adoptivu d’Asturies, reconocencia que se completó en 1994 cola concesión del títulu de Fíu Adoptivu de Xixón. Cultivador del xéneru tremendista, Juan Barjola estampó nos sos lienzos imáxenes crudes a mediu camín ente la pura angustia y la realidá más descarnada, ensin filtros nin dulcificaciones. Nes sos creaciones amiéstense perfiles distorsionaos y deformes que falen, dende un sentíu éticu mui personal, del sufrimientu y la inxusticia del mundu. 21 d'avientu, 2004 0 FacebookTwitterPinterestEmail
Gastronomía Asturnews entrega la so cesta de navidá al ganador del sortéu, Pablo Pastor Camporro by asturnet 21 d'avientu, 2004 El llector d’Asturnews Pablo Pastor Camporro, vecín d’Uviéu, recoyó esta mañana la cesta navidiega que’l diariu cultural sorteaba ente los sos llectores, un llote de productos gastronómicos artesanos de primer calidá ellaboraos o distribuyíos pola empresa La Payariega, firma pionera nel etiquetáu en llingua asturiana. Depués de resultar ganador nel concursu abiertu por Asturnews, que rexistró gran participación, Pablo Pastor pondrá na so mesa navidiega un llote compuestu por turrones artesanos, sidra natural y gasificao, zumos, conserves vexetales, condimentos, fervíos, aceites, productos cárnicos, fabes, marmellaes y galletes d’ellaboración casera. Los llectores participantes del sortéu navidiegu d’Asturnews, cuya entruga única consistía en designar la ‘noticia del añu’ publicada nesti diariu cultural a lo llargo de 2004, destacaron l’aniversariu de Conceyu Bable, les cifres de matriculación en Llingua Asturiana, el pieslle de la Xunta d’Escritores y la preparación d’un nuevu discu del grupu Dixebra, ente otres informaciones apaecíes n’Asturnews. 21 d'avientu, 2004 0 FacebookTwitterPinterestEmail
Educación El rector augura que la falta de financiación impedirá executar planes d’innovación na Universidá by asturnet 21 d'avientu, 2004 Nun habrá más innovación por falta de dineru. El rector de la Universidá d’Uviéu, Juan Vázquez, sacó alantre ayeri les primeres cuentes del so segundu mandatu cola aprobación d’un presupuestu de casi 176 millones d’euros pa 2005, una cantidá que’l rector xulga insuficiente p’acometer los proyectos naguaos y na qu’echa en falta a lo menos 6 millones más pa renovar la docencia n’escueles y facultaes. El llamentu de Vázquez estendióse amás al aumentu porcentual del presupuestu universitariu respecto al añu qu’agora acaba: Poco más d’un 2,5 por cientu, lo que representa un espoxigue perbaxo del aumentu del nivel de vida nos últimos doce meses -acordies col Índiz de Precios de Consumu-. Cifres que, a los güeyos del rector, nun permiten falar siquiera d’un crecimientu na partida presupuestaria, sinón más bien d’un descensu. Con eses blimes, Juan Vázquez declaró que la Universidá asturiana habrá dirixise a lo llargo del añu prósimu con un presupuestu austeru y “de contención”, y responsabilizó dafechu d’ello a les cuentes trazaes pola Alministración autonómica, institución que sufraga les dos terceres partes de los gastos totales de la Universidá d’Uviéu. Vázquez fizo esi reproche darréu de la primer xuntanza de trabayu del nuevu conseyu de gobiernu universitariu, que dirixe la institución académica asturiana depués de l’aniciu, en mayu pasáu, del segundu cuatrieniu de Juan Vázquez al frente’l rectoráu. El pasáu 1 d’abril, Vázquez convirtióse nel primer rector que resulta reelixíu na Universidá asturiana na democracia reciente, depués de ganar al so únicu oponente, el caderalgu de Química Vicente Gotor, por alpenes 150 votos de diferencia. 21 d'avientu, 2004 0 FacebookTwitterPinterestEmail
Sociedá L’Academia ultima la edición d’un diccionariu básicu de gallego-asturianu ellaboráu por tres espertos by asturnet 21 d'avientu, 2004 El gallego-asturianu tendrá un diccionariu básicu. L’Academia de la Llingua, al traviés de la so Secretaría del Navia-Eo, ultima la ellaboración d’un vocabulariu d’esa variedá llingüística a cargu de los espertos Ignacio Vares, Rafael Cascudo y Xosé Miguel Suárez, toos ellos orixinarios del occidente asturianu y fondos conocedores, asegura l’Academia, de la realidá llingüística d’esi territoriu. Pesie a que los trabayos pa la fechura’l diccionariu tán en marcha yá hai un añu, l’Academia asoleyó güei una nota pública na que recuerda que’l proyectu ta nuna fase avanzada y precisa que’l diccionariu tien una importancia capital na Enseñanza, yá que’l nuevu vocabulariu sedrá un preséu de primer orde pa los escolinos de Primaria y Secundaria que cursen estudios de gallego-asturianu. Nesti sen, la institución académica yá asoleyó ‘El meu primeiro vocabulario na fala’, un material empobináu a los estudiantes del primer ciclu de Primaria, tamién al traviés de la Secretaría Llingüística del Navia-Eo, sección de l’Academia dedicada monográficamente a caltener, recuperar y dignificar el gallego-asturianu. Esti organismu ta a puntu de publicar, asinamesmo, el númberu 21 de la revista ‘Entrambasauguas’, publicación qu’acumula ocho años de camín y en cuyes páxines atoparon sonadía, hasta agora, más de 160 artículos especializaos. Web de l’Academia de la Llingua 21 d'avientu, 2004 0 FacebookTwitterPinterestEmail
Sociedá La Xunta de Toponimia movilizó en siete meses a la cuarta parte de los conceyos asturianos by asturnet 21 d'avientu, 2004 En siete meses, venti conceyos. La Xunta Asesora de Toponimia del Principáu, en funcionamientu dende mayu, pieslla l’añu con venti solicitúes d’otros tantos municipios pa recuperar los sos nomes de llugar en llingua asturiana, una cifra qu’amuesa l’interés de la cuarta parte de los ayuntamientos asturianos por entamar un procesu alministrativu hasta agora inéditu pa ‘rescatar’ los sos topónimos tradicionales. La última petición cursóla la Corporación de Cangas del Narcea, que suma’l númberu venti nel llistáu de conceyos interesaos n’entamar el llargu trámite alministrativu pa validar a tolos efectos los nomes de llugar n’asturianu. L’últimu pasu d’esa cadena ye l’aprobación por decretu, nel Conseyu de Gobiernu, de la validez de la toponimia de cada municipiu, una culminación qu’estrenarán nes prósimes selmanes los primeros conceyos que solicitaron l’acción de la Xunta, Carreño, El Franco y Llanes. Pesie a que la cantidá d’ayuntamientos interesaos hasta agora na recuperación toponímica supón al rodiu d’un 25 por cientu sobro’l total de conceyos d’Asturies, esi porcentaxe medra sustentivamente si se mira pa la población qu’habita esos municipios, yá que na llista de la Xunta de Toponimia figuren conceyos mui poblaos, ente ellos Xixón, Llangréu, Siero y Mieres. La Xunta Asesora de Toponimia del Principáu echó a andar en mayu pasáu, ensertada nel organigrama de la Conseyería de Cultura, Comunicación Social y Turismu, col envís d’afitar l’usu de la toponimia tradicional en cartelos indicadores, mapes y documentos oficiales no que queda de llexislatura autonómica, hasta 2007. L’organismu cellebró la so última xuntanza de trabayu la pasada selmana en Llangréu, dientro d’una práctica que prevé desendolcar les reuniones ordinaries nos propios conceyos que soliciten la recuperación de los sos topónimos. 21 d'avientu, 2004 0 FacebookTwitterPinterestEmail