Un estudiu antropolóxicu retrata’l pasu de la casería a la gran industria llechera nel occidente

De la casería familiar a la concentración de la gran industria llechera. El llibru ‘¿Bótoche unha mao?’, que güei se presentó en Xixón, retrata la tresformación social y económica esperimentada nel occidente d’Asturies nos últimos cuarenta años, al traviés de la comparación de dos estudios de Ramón Valdés del Toro y Elisabeth Lorenzi redactaos, respectivamente, nos años 1960 y 2000.

Por tener esi valor de comparanza al asoleyar testos antropolóxicos sobro la mesma zona -el conceyu de Tapia- con cuatro décades ente ca ún d’ellos, l’autora de la investigación más reciente, Elisabeth Lorenzi, sorrayó esta mañana el doble valor de la obra: Los antropólogos afayarán nella los datos científicos d’una acusada evolución; el públicu en xeneral verá nel llibru les claves d’una fonda tresformación d’usos, costumes y formes de subsistencia.

Nes más de doscientes páxines del volume -editáu pol Gobiernu autonómicu, el Muséu’l Pueblu d’Asturies y los ayuntamientos de Xixón y Tapia- retrátase, poro, un “procesu mui aceleráu” enforma marcáu polos efectos de les disposiciones de la Unión Europea sobro’l campu asturianu, a partir d’un casu concretu, el de Tapia, que según destacó Lorenzi bien pue representar lo qu’ocurrió nes últimes cuatro décades nel restu d’Asturies.

Na opinión del director del Pueblu d’Asturies, Juaco López, el llibru cuya segunda parte ellaboró Elisabeth Lorenzi -l’estudiu de Valdés del Toro qu’integra la primer parte ye un clásicu de los años sesenta, agora reproducíu- “ayuda a que los asturianos nos conozamos meyor a nosotros mesmos” y tien el valir añadíu de tomar como amuesa una de les principales comarques de producción de lleche, actividá que sufrió d’un mou singular l’aplicación de la normativa comunitaria.