L’Academia ultima la edición d’un diccionariu básicu de gallego-asturianu ellaboráu por tres espertos

El gallego-asturianu tendrá un diccionariu básicu. L’Academia de la Llingua, al traviés de la so Secretaría del Navia-Eo, ultima la ellaboración d’un vocabulariu d’esa variedá llingüística a cargu de los espertos Ignacio Vares, Rafael Cascudo y Xosé Miguel Suárez, toos ellos orixinarios del occidente asturianu y fondos conocedores, asegura l’Academia, de la realidá llingüística d’esi territoriu.

Pesie a que los trabayos pa la fechura’l diccionariu tán en marcha yá hai un añu, l’Academia asoleyó güei una nota pública na que recuerda que’l proyectu ta nuna fase avanzada y precisa que’l diccionariu tien una importancia capital na Enseñanza, yá que’l nuevu vocabulariu sedrá un preséu de primer orde pa los escolinos de Primaria y Secundaria que cursen estudios de gallego-asturianu.

Nesti sen, la institución académica yá asoleyó ‘El meu primeiro vocabulario na fala’, un material empobináu a los estudiantes del primer ciclu de Primaria, tamién al traviés de la Secretaría Llingüística del Navia-Eo, sección de l’Academia dedicada monográficamente a caltener, recuperar y dignificar el gallego-asturianu.

Esti organismu ta a puntu de publicar, asinamesmo, el númberu 21 de la revista ‘Entrambasauguas’, publicación qu’acumula ocho años de camín y en cuyes páxines atoparon sonadía, hasta agora, más de 160 artículos especializaos.

Web de l’Academia de la Llingua