Niundes actúa esti xueves en Tierra Astur

El grupu llaniscu Niundes, formáu nel añu 2001 y que vieno acabante de reformar la so composición, actua esti xueves 3 de xineru, na sidrería-restorán de Tierra Astur en Cualloto, depués de que lo ficiere n’Ochobre con un gran éxitu de públicu y una bona amuesa del trabayu que ta desendolcando la banda, dexando de llau la presencia permanente de la gaita en beneficiu d’otros instrumentos de vientu. La actuación cabera del mes d’Ochobre pue recuperase en dellos vídeos qu’ufre Asturnews xunta la galería de fotos de l’actuación.

Dientro de los xueves musicales organizaos pola sidrería Tierra Astur de Cualloto, el grupu llaniscu Niundes va llevar por cuarta vegada a escena nesti escenariu’l so folk nel que la base son los soníos tradicionales asturianos. En directu usen gaita, violín y flauta travesera de madera amas de guitarres acústique, teclaos y, delles veces, buzuki. Esti grupu de música folk reconozse heriede del movimientu folk americanu de los 60, popularizáu por Bob Dylan, asina como del denomináu ‘soníu atlánticu’, representáu por figures como la Bothy Band, Tannahill Weavers, Planxty, Kornog, Altan y los asturianos Llan de Cubel. Poro, anguañu tan empobinando los sos caminos musicales per otros derroteros que darán a conocer darréu na remozada páxina web que preparen.

Niundes espublizaron el so primer discu en 2006, cola producción del guitarrista de Llan de Cubel Xel Pereda, embaxo’l titulo “Enxamás ye pa siempres”.