Netflix apurre un millón d’euros a una llínea d’ayudes audiovisuales n’España

Netflix al pie d’Acción Cultural Española (AC/Y), l’Academia de Cine y l’Institutu de Cinematografía y Artes Audiovisuales (ICAA), dependiente del Ministeriu de Cultura, anunciaron estos díes una llínea d’ayudes pa los profesionales del audiovisual más afectaos pola crisis de la COVID-19 n’España.

Según un comunicáu conxuntu espublizáu la selmana pasada, les ayudes van tar dirixíes “a trabayadores del apartáu artísticu y/o técnicu que tean travesando una situación económica precaria y nun puedan trabayar debíu al cese de la producción audiovisual” y Netflix va contribuyir a llanzar esta llínea d’ayuda n’España dotándola d’un millón d’euros.

Esi millón d’euros forma parte del fondu global de 100 millones de dólares anunciáu por Netflix el pasáu 20 de marzu, del cual un 85 % destinase a les producciones de Netflix y el 15 % restante a fondos d’emerxencia dedicaos a los profesionales del sector audiovisual en distintos países.

El Ministeriu de Cultura, qu’hasta’l momentu nun apurrió fondos específicos para combatir esta crisis, celebró esta collaboración ente organizaciones públiques y privaes pola axilidá de la so puesta en marcha” y pola garantía de “rigor y tresparencia” que dexa esa collaboración.

El presidente de l’Academia de Cine, Mariano Barrosu, aseguró que “nesti momentu escepcional son necesaries midíes escepcionales”, animó a que s’articulen otres iniciatives priváu y públicu y espresó el so enfotu en que “los poderes públicos impulsen y enríen cuantes midíes sían necesaries” pa garantizar la supervivencia de la industria.

Desque empezó la crisis, el ministru de Cultura caltuvo delles rondes de xuntes pa escuchar les demandes del sector cultural, incluyíu l’audiovisual, pero la principal, l’adopción de midíes y fondos específicos, tal que fixeron otros países europeos, foi refugada hasta’l momentu.