“Nenyure” de Jorge Rivero aspira pol Goya al meyor cortu de non ficción

La película “Nenyure” del realizador mierense Jorge Rivero puede algamar esti domingu 29 pela nueche na ceremonia d’entrega de los Goya el premiu al meyor cortometraxe documental. El filme de Rivero ye una de les cuatro qu’opten a esti premiu del que se va desvelar el nome del ganador na gala televisada de la fiesta añal del cine español.

“Nenyure” estrenóse nel Festival de Cine de Xixón y viaxó dende entós per dellos otros certámenes con una bultable acoyida de crítica y públicu. Rodada n’inglés con sotítulos, la cinta del realizador mierense retrata los espacios abstractos y concretos d’una barriada obrera de la cuenca talo s’amuesa anguaño, en plenu fin de la industria del carbón y convertida nuna polvorienta sucesión repetía de nichos, un cementeriu con ventanes y seres inda vivos.

Jorge Rivero pertenez a una xeneración de nuevos realizadores asturianos que tenten definir una triba de cine centrada na realidá y nel retratu despiadáu del entornu ambiental de l’Asturies actual. El so últimu trabayu fue la filmación del poema “Ente nós” de Vanessa Gutiérrez dientro’l proyectu colectivu “Cinco poemes”.Ye autor tamién del documental musical “Pasamientu”, sobre’l discu del mesmu títulu del colectivu etnográficu Muyeres.