Nacho Fonseca gana’l Concursu de Cuentos pola Oficialidá

Nacho Fonseca Alonso foi el ganador del Concursu de Cuentos pola Oficialidá del Asturianu, que convoca’l Conceyu Bimenes y qu’esti añu llegó a la so edición númberu catorce. El primer premiu, dotáu con 800 euros, foi pa la so obra “Lluis”. Magar que l’autor ye miembru de l’Academia de la Llingua Asturiana y yá tien ganaos dellos premios lliterarios, ye más conocíu pol so llabor al frente del grupu musical “Xentiquina”, formáu por escolinos del Colexu Públicu de Lieres (Sieru), de los que va despidise esti xueves 30 de xunu nun actu musical nel que van participar dalgunos de los grupos más importantes del país.

El segundu premiu, dotáu con 500 €, foi pal cuentu “Tengo un plan”, de Quique Faes Díaz, autor que yá ganare esti concursu nel añu 2006, y Pablo Rodríguez Alonso algamó’l tercer premiu, al que se-y apurren 350 €, con “¿Qué coño bebe un zulú?”. La entrega premios va tener llugar na Casa la Cultura de Santuyano, de magar les 19’30 hores del prósimu vienres, 1 de xunetu. Nel actu fadráse llectura pública de la obra ganadora.