Mónica Jiménez Art propón “Indispensables” nel Palaciu de Valdecarzana

El Palaciu de Valdecarzana abrió esta selmana al públicu una nueva esposición, “Indispensables”, un percorríu poles pintures ya ilustraciones de l’artista gráfica asturiano Mónica Jiménez Art, que podrá visitase de forma gratuita hasta’l llunes 26 de setiembre.

En “Indispensables” la creadora fai una repasada de la so trayectoria, una obra qu’amuesa a la perfección el so activismu y calter reivindicativu. En palabres de l’autora, ye “reflexu de deseos y esmoliciones, buelga de dolores, denuncia de les inxusticies, memoria histórica feminista, solidaridá ente pueblos, anticolonialismo, ye tomar aliendu nos malos momentos pa poder volver alendar”.

Nos trabayos espuestos realiza un homenaxe a les muyeres que lluchen polos derechos colectivos, con un mensaxe claru: “visualizar lo invisible”, o lo que ye lo mesmo, amosar “la responsabilidá polo qu’asocede y querer camudalo”, como ella mesma diz: “Yeme más fácil glayar dende’l llenzu, anque tamién cueyo pancarta y megáfonu, el pincel y el lápiz siguir, formando cada ferramienta parte d’un tou”.

El públicu va poder ver semeyes de muyeres de tol planeta, que s’atrevieron a dar un berru de llibertá y rebelión en distintos ámbitos, como Virginia Wolf, Ursula K. Leguin, Gloria Fuertes, Nina Simone o Wangari Maathai.

L’horariu de visita na sala d’esposiciones de Valdecarzana va ser de llunes a vienres de 11.00 a 14.00 y de 18.00 a 21.00 hores.